អភិបាលខេត្តកំពត អំពាវនាវឱ្យពលរដ្ឋរស់នៅតាមព្រំដែនកម្ពុជា-វៀតណាម ចូលរួមដាំដើមត្នោត ដើម្បីបញ្ជាក់អត្តសញ្ញាណជាតិ

(កំពត)៖ លោកបណ្ឌិត ម៉ៅ ធនិន អភិបាលខេត្តកំពត នាថ្ងៃទី២៦ ខែកក្កដា ឆ្នាំ២០២២នេះ បានអំពាវនាវឲ្យអាជ្ញាធរ និងប្រជាពលរដ្ឋ រស់នៅតាមតំបន់ព្រំដែនកម្ពុជា-វៀតណាម ចូលរួមដាំដើមត្នោត ដើម្បីបញ្ជាក់អត្តសញ្ញាណជាតិ។

ការអំពាវនាវបែបនេះធ្វើឡើងក្នុងឱកាសចូលរួមក្នុងពិធីអបអរបុណ្យរុក្ខទិវា ៩កក្កដា ឆ្នាំ២០២២ ដែលប្រារព្ធធ្វើឡើង នៅក្នុងឃុំព្រែកក្រឹស ស្រុកកំពង់ត្រាច ខេត្តកំពត។

លោកបណ្ឌិត ម៉ៅ ធនិន បានលើកឡើងថា ដើមត្នោត គឺជាកេរ្តិ៍ដំណែលរបស់ដូនតា និងជាអត្តសញ្ញាណជាតិខ្មែរ ដែលមានជាយូរលង់ណាស់មកហើយ ដូចនេះក្នុងនាមជាប្រជាពលរដ្ឋខ្មែរមួយរូប ពិសេសពលរដ្ឋរស់នៅតំបន់ព្រំដែនកម្ពុជា-វៀតណាម ត្រូវស្រឡាញ់ ថែរក្សាការពារ និងចូលរួមដាំដើមត្នោត យ៉ាងតិចណាស់ក្នុងមួយគ្រួសារឲ្យបាន ៣ទៅ ៤ដើមក្នុងមួយឆ្នាំ។ ដោយឡែក បុណ្យ «រុក្ខទិវា» មានអត្ថន័យនយោបាយ និងមានសារៈសំខាន់ ដ៏ជ្រាលជ្រៅបំផុតសម្រាប់បំផុសស្មារតី ឲ្យប្រជាពលរដ្ឋទាំងអស់ ចេះស្រឡាញ់ព្រៃឈើ និងដើមត្នោត។

ទន្ទឹមនេះ លោកអភិបាលខេត្ត ក៏បានក្រើនរំលឹក ដល់អាជ្ញាធរ ប្រជាពលរដ្ឋក្នុងប្រទេស ពិសេសពលរដ្ឋក្នុងខេត្តកំពត ដែលរស់នៅតាមតំបន់ព្រំដែនជាប់ជាមួយប្រទេសជាមិត្ត ឲ្យចេះថែរក្សាទុកកេរ្តិ៍ដំណែលនេះ ជាប្រវត្តិសាស្ត្រ សម្រាប់កូនចៅ ក្មេងជំនាន់ក្រោយៗទៀត។ ហើយសកម្មភាពនេះ ក៏ដើម្បីឆ្លើយតបទៅនឹងកម្មវិធីនយោបាយព្រៃឈើ ជាតិរបស់រាជរដ្ឋាភិបាល ដែលបានអនុវត្តកំណែទំរង់វិស័យព្រៃឈើ និងបានកំណត់យកបញ្ហា ព្រៃឈើជាអាទិភាព ដើម្បីស្តារនិងអភិវឌ្ឍន៍ប្រទេសជាតិឱ្យបានរីកចំរើន។

លោកអភិបាលខេត្តបានបន្តថា ការដាំកូនឈើ និងដាំកូនត្នោត នៅសងខាងផ្លូវខ្សែក្រវាត់ព្រំដែន កម្ពុជា-វៀតណាម ក្នុងឃុំព្រែកក្រឹសនាពេលនេះ បានបង្ហាញអំពីឆន្ទៈស្មារតីស្រឡាញ់ជាតិ ថែរក្សាការពារកេរ្តិ៍តដំណែលដូនតា ពិសេសដើម្បីរក្សាទុកជាប្រវត្តិសាស្ត្រ សម្រាប់ក្មេងជំនាន់ក្រោយៗទៀត។

ជាមួយគ្នានេះដែរ លោក ចាន់ រិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពត បានលើកបញ្ជាក់ក្នុងរបាយការណ៍ថា ដោយទទួលបានការណែនាំពីលោកអភិបាលខេត្ត ខណ្ឌរដ្ឋបាលព្រៃឈើកំពត នៅឆមាសទី១ បានបណ្តុះកូនត្នោតបានចំនួន ១ម៉ឺន២ពាន់ដើម ហើយបានចែកចាយកូនឈើប្រណិតទៅឲ្យពលរដ្ឋ សាលារៀន វត្តអារាម និងមន្ទីរអង្គភាព ដាំបានចំនួន៥១១ដើម។

ដោយឡែកក្នុងពិធីបុណ្យរុក្ខទិវា ៩កក្កដា ឆ្នាំ២០២២នេះ បានដាំដើមត្នោតនៅសងខាងផ្លូវ ខ្សែក្រវ៉ាត់ព្រំដែនកម្ពុជា-វៀតណាម ប្រវែង ១០គីឡូម៉ែត្រ ក្នុងគម្លាត ៤ម៉ែត្រ១ដើម ស្មើនឹងកូនត្នោត ៥,០០០កូន និងមានកូនឈើប្រភេទ ឈើទាលចំនួន១,០០០ដើម សម្រាប់ចែកចាយជូនអង្គភាពរដ្ឋសាលារៀន វត្តអារាម និងបងប្អូនប្រជាពលរដ្ឋផងដែរ។

សូមបញ្ជាក់ផងដែរថា ក្នុងពិធីបុណ្យរុក្ខទិវា នាពេលនេះ គឺមានការដាំដើមត្នោតនៅសងខាងផ្លូវខ្សែក្រវ៉ាត់ព្រំដែន កម្ពុជា-វៀតណាម ដែលមានប្រវែង១០គីឡូម៉ែត្រ ពីចំណុចតន់ហន់ ស្ថិតនៅភូមិព្រៃព្រូស, ភូមិព្រះទ្រហឹង, ភូមិកោះត្នោត និងភូមិកោះតាកូវ ក្នុងឃុំព្រែកក្រឹស ស្រុកកំពង់ត្រាច ខេត្តកំពត៕