កែប ៖ ខួបលើកទី៦៨ទិវាកុមារអន្តរជាតិ ១មិថុនា និងខួបលើក ១៦ទិវាពិភពលោកប្រឆាំងពលកម្មកុមារ១២មិថុនា ត្រូបានប្រារព្វឡើងនៅព្រឹកថ្ងៃទី១៩ខែមិថុនា ឆ្នាំ២០១៧ ក្នុងបរិវេណអនុវិទ្យាល័យអង្កោល ក្នុងឃុំអង្កោល ស្រុកដំណាក់ចង្អើរ ក្រោមវត្តមានដ៏ខ្ពង់ខ្ពស់ លោកកែន សត្ថា អភិបាលនៃគណៈអភិបាលខេត្តកែប ហែរហមដោយសហការីជាច្រើនរូប និងអាជ្ញាធរដែនដីគ្រប់លំដាប់ថ្នាក់ លោកគ្រូ អ្នកគ្រូ សិស្សានុសិស្ស ព្រមទាំងអាណាព្យាបាល សរុប៧៦០នាក់។
តាមរបាយការណ៍របស់ លោកឌិត ឡាយហ៊ាក ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកែប បានឲ្យដឹងថា ជារៀងរាល់ឆ្នាំព្រះរាជាណាចក្រកម្ពុជាតែងប្រារព្វទិវាកុមារអន្តរជាតិ១មិថុនា ទិវាពិភពលោកប្រឆាំងពលកម្មកុមារ១២មិថុនា និងទិវាកុមារកម្ពុជា ដើម្បីេរំលឹកដល់ការអនុវត្តសិទ្ធិជាមូលដ្ឋានរបស់កុមារ និងបង្ហាញពីការយកចិត្តទុកដាក់របស់រាជរដ្ឋាភិបាលចំពោះកុមារ ស្របតាមរដ្ឋធម្មនុញ អនុសញ្ញាស្តីពី សិទ្ធិកុមាររបស់អង្គការសហប្រជាជាតិ អនុសញ្ញាលេខ១៨២របស់អង្គការពលកម្មអន្តរជាតិស្តីពីការហាមប្រាមនិងសកម្មភាពបន្ទាន់សម្រាប់លុបបំបាត់ទម្រង់ធ្ងន់ធ្ងរបំផុតនៃពលកម្មកុមារ និងបទដ្ឋានជាតិ អន្តរជាតិស្តីពីសិទ្ធិរបស់កុមារផ្សេងៗទៀត។
លោកបានសង្កត់ធ្ងន់ថា ទិវាពិភពលោកប្រឆាំងកុមារ បានប្រារព្វឡើងទូទាំងពិភពលោកនិងនៅពេលនេះត្រូវបានលើកជាប្រធានបទដ៏សំខាន់ ហើយបើទោះជាមានពលកម្មកុមាររាប់លាននាក់ទូទាំងពិភពលោកបែបនេះក្តី ប៉ុន្តែបែបលក្ខណៈធម្មជាតិនៃស្ថានភាពទាំងនេះ ជាធម្មតាពុំសូវមានអ្នកមើលឃើញពីការលំបាករបស់ពួកគេឡើយ។ពួកគេមិនអាចទាមទារសិទ្ធិ និងគ្មានលទ្ធភាពប្រើប្រាស់ប្រព័ន្ធផ្សព្វផ្សាយដើម្បីប្រាប់រឿងរបស់ពួកគេនោះទេ។ចំពោះថ្ងៃនេះ យើងទាំងអស់គ្នា កំពុងតែធ្វើការតស៊ូមតិដល់បញ្ហាពលកម្មកុមារនិងធ្វើយុទ្ធនាការសំរាប់ពួកគេអាចចាប់ផ្តើមទៅបាន ខណៈដែលយើងទាំងអស់គ្នាមានការយល់ដឹងពីបញ្ហាពលកម្មកុមារ អនាគតរបស់កុមារនិងមានភាពប្រសើរឡើង។
ថ្លែងក្នុងឱកាសនោះ លោកកែន សត្ថា ដែលជាគណៈអធិបតីក្នុងពិធីនេះ បានអានសារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយមានអត្ថន័យថា ឆ្នាំនេះទិវាកុមារកម្ពុជា និងទិវាកុមារអន្តរជាតិ១មិថុនា ត្រូវបានប្រារព្វឡើងក្រោមប្រធានបទ”លើកកម្ពស់ការចូលរួមរបស់កុមារ ដើម្បីអភិវឌ្ឍន៍សង្គម”និងទិវាពិភពលោកប្រឆាំងពលកម្មកុមារ១២មិថុនា ក្រោមប្រធានបទ”សូមការពារកុមារពីពលកម្មកុមារ នៅក្នុងស្ថានភាពជម្លោះ និងគ្រោះមហន្តរាយ”ដើម្បីរំលឹកដល់សិទ្ធិជាមូលដ្ឋានរបស់កុមារ និងបង្ហាញពីការយកចិត្តទុកដាក់របស់រាជរដ្ឋាភិបាល ក្នុងការដោះស្រាយបញ្ហាប្រឈមទាំងឡាយរបស់កុមារជាពិសេសជម្រុញកុមារឲ្យបានចូលរួមគ្រប់សកម្មភាព ដែលមានផលប្រយោជន៍ដល់សង្គមនិងការពារកុមារពីពលកម្មកុមារគ្រប់ទម្រង់។ជាមួយនឹងប្រធានបទខាងលើ ទិវាដ៏មានសារសំខាន់នេះ បានជម្រុញឲ្យយើងត្រូវខិតខំឲ្យបានខ្លាំងក្លាថែមទៀតលើការអនុវត្តសិទ្ធិចម្បងទាំងបួនរបស់កុមារឲ្យមានប្រសិទ្ធិភាព ក្នុងនោះត្រូវយកចិត្តទុកដាក់លើសិទ្ធិចូលរួមរបស់កុមារ ដោយផ្តល់ឱកាសឲ្យកុមារបានជួបជុំដោយសន្តិវិធី សម្តែងមតិយោបល់ ទទួលបានព័ត៌មាននិងការចូលរួមធ្វើការសម្រេចចិត្ត ដើម្បីឆ្លើយតបទៅនឹងតម្រូវការជាក់ស្តែង លើបញ្ងាដែលពាក់ព័ន្ធនឹងកុមារ ដោយឈរលើគោលការណ៍គ្មានរើសអើងនិងឧត្តមប្រយោជន៍របស់កុមារ។
ជាចុងក្រោយ លោកកែន សត្ថា អភិបាលខេត្តកែប ក៏បានភ្ជាប់មកជាមួយ នូវឧបករណ៍ សម្ភារៈសិក្សានិងថវិការមួយចំនួន ដល់សិស្សានុសិស្ស ព្រមទាំងអាណាព្យាបាលដែលមកចូលរួមក្នុងឱកាសនេះផងដែរ ៕
ណារិទ្ធ
