នៅព្រឹកថ្ងៃទី១៧ ខែកក្កដា ឆ្នាំ២០២៦នេះ ស្នងការដ្ឋាននគរបាលខេត្តមណ្ឌលគិរី បានរៀបចំកិច្ចប្រជុំបូកសរុបលទ្ធផល កិច្ចសហប្រតិបត្តិការ រក្សាសន្តិសុខ សណ្ដាប់ធ្នាប់តាមតំបន់ព្រំដែនប្រចាំឆមាសទី១ ឆ្នាំ២០២៦ និងលើកទិសដៅសហប្រតិបត្តិការឆមាសទី២ ឆ្នាំ២០២៦ រវាងស្នងការដ្ឋាននគរបាលខេត្តមណ្ឌលគិរី (កម្ពុជា) និងស្នងការដ្ឋាននគរបាលខេត្តដាក់ឡាក់ (វៀតណាម) ។
+ដឹកនាំកិច្ចប្រជុំដោយ លោកឧត្តមសេនីយ៍ត្រី ជា ចិត្រា ស្នងការនគរបាលខេត្តមណ្ឌលគិរី ព្រមទាំង លោកឧត្តមសេនីយ៍ត្រី ឆាយ សុខា អនុប្រធាននាយកដ្ឋាន ទទួលបន្ទុកកិច្ចការព្រំដែន កម្ពុជា-វៀតណាម នៃអគ្គស្នងការដ្ឋាននគរបាលជាតិ ប្រធានប្រតិភូនិងលោក លោកស្រីស្នងការរង លោកអធិការនៃអធិការដ្ឋាននគរបាល ស្រុកជាប់ព្រំដែន និងលោកនាយការិយាល័យជំនាញបានអញ្ជើញចូលរួមកិច្ចប្រជុំនាឱកាសនោះផងដែរ ។
+ភាគីវៀតណាម ដឹកនាំដោយលោកឧត្តមសេនីយ៍ត្រី ផាន ថាញ់តាម ស្នងការខេត្តដាក់ឡាក់ ព្រមទាំងមានការអញ្ជេីញចូលរួមជាអធិបតីភាព លោកវរសេនីយ៍ឯក ង្វៀន ថាញ់យ៉ាង អនុប្រធាននាយកដ្ឋានទទួលបន្ទុកកិច្ចការសន្តិសុខ តំណាងក្រសួងនគរបាលវៀតណាម ប្រចាំព្រះរាជា ណាចក្រកម្ពុជា។ អញ្ជើញមកចូលរួមកិច្ចប្រជុំនៅក្នុងស្នងការដ្ឋាននគរបាលខេត្តមណ្ឌលគិរី ។
ក្នុងកិច្ចប្រជុំនោះដែរភាគីទាំងពីរបានលើកយកកិច្ចពិភាក្សាលើកិច្ចការងារដូចជា រួមគ្នាសហការទប់ស្កាត់ បង្ក្រាបបទល្មើសឆ្លងដែនខុសច្បាប់គ្រប់ប្រភេទ ដែលកើតមាននៅតាមខ្សែបន្ទាត់ព្រំដែនប្រទេសភូមិផងរបងតែមួយ នាឱកាសនោះផងដែរលោកឧត្តមសេនីយ៍ត្រី ជា ចិត្រា ស្នងការនគរបាលខេត្តមណ្ឌលគិរី បានមានប្រសាសន៍ថា សុំអោយគ្រប់ផែនការងារនិងការិយាល័យពាក់ព័ន្ធ បន្តសហការរក្សាការពារសន្តិសុខ សណ្ដាប់ធ្នាប់តាមតំបន់ព្រំដែន ទប់ស្កាត់ត្រួតពិនិត្យ ការឆ្លងដែនចេញចូលខុសច្បាប់ ជាពិសេសសហការទប់ស្កាត់ លុបបំបាត់ឱ្យបានទាន់ពេលវេលា នូវបទល្មើសអនឡាញស្កេម(Online Scams) ក្នុងទូទាំងខេត្ត ។
ភាគីទាំងពីរបានឯកភាពគ្នាចុះហត្ថលេខាលើកំណត់ហេតុនៃកិច្ចប្រជុំស្ដីពី កិច្ចសហប្រតិបត្តិការ រក្សាសន្តិសុខ សណ្ដាប់ធ្នាប់តាមតំបន់ព្រំដែន ដែលជាទិសដៅអនុវត្តបន្តរវាងស្នងការដ្ឋាននគរបាលខេត្តទាំងពីរ(ខេត្តមណ្ឌលគិរី ខេត្តដាក់ឡាក់)។
ក្នុងឱកាសនោះដែរគណ:ប្រតិភូនៃស្នងការដ្ឋាននគរបាលខេត្តទាំងពីរ ក៏បានជូនកាដូរអនុស្សាវរីយ៍ប្រកបទៅដោយភាពស្និទ្ធស្នាលជាទីបំផុត៕
