នៅថ្ងៃទី១៦ ខែកក្កដា ឆ្នាំ២០២៦នេះ វិទ្យាល័យគោកព្រីង ស្ថិតក្នុងឃុំគោកព្រីង ស្រុកស្វាយជ្រំ បានរៀបចំពិធី «ពិពណ៌កម្រងស្នាដៃសិស្ស» ក្រោមអធិបតីភាពដ៏ខ្ពង់ខ្ពស់របស់ ឯកឧត្ដម ង៉ោ សុវណ្ណ រដ្ឋមន្រ្តីប្រតិភូអមនាយករដ្ឋមន្រ្តី រួមជាមួយ លោក ម៉ែន អេង និងលោក ញ៉ែម សារី អភិបាលរង តំណាងដ៏ខ្ពង់ខ្ពស់របស់ឯកឧត្តម ប៉េង ពោធិ៍សា អភិបាលខេត្តស្វាយរៀង។
កម្មវិធីនេះរៀបចំឡើងក្នុងគោលបំណងលើកកម្ពស់ការសិក្សា និងការច្នៃប្រឌិតរបស់សិស្សានុសិស្ស ដែលស្របតាមយុទ្ធសាស្ត្របញ្ចកោណរបស់រាជរដ្ឋាភិបាលក្នុងការអភិវឌ្ឍធនធានមនុស្ស។ តាមរយៈការដាក់តាំងពិពណ៌ស្នាដៃនាពេលនេះ សិស្សានុសិស្សមានឱកាសបង្ហាញពីទេពកោសល្យ និងសមត្ថភាព ដែលជាមូលដ្ឋានគ្រឹះសម្រាប់ការសិក្សានៅថ្នាក់ខ្ពស់ និងទីផ្សារការងារនាពេលអនាគត។
ក្នុងពិធីនេះ ក៏មានការចូលរួមពីលោកអភិបាលស្រុកស្វាយជ្រំ, លោក-លោកស្រីប្រធានមន្ទីរ-អង្គភាពជុំវិញខេត្ត, កងកម្លាំងប្រដាប់អាវុធ, មន្ត្រីរាជការ, លោកគ្រូ-អ្នកគ្រូ, សិស្សានុសិស្ស, ព្រមទាំងមាតាបិតា និងអាណាព្យាបាលសិស្សជាច្រើននាក់។ ក្នុងរបាយការណ៍សង្ខេប លោកនាយកវិទ្យាល័យ បានលើកឡើងពីវឌ្ឍនភាពនៃការសិក្សា និងការខិតខំប្រឹងប្រែងរបស់សិស្សានុសិស្ស។ បន្ទាប់មក តំណាងកាន់គម្រោង KAPE ក៏បានឡើងធ្វើរបាយការណ៍សង្ខេបអំពីកិច្ចសហការ និងការគាំទ្រលើការអនុវត្តគម្រោងនានា ដើម្បីពង្រឹងសមត្ថភាពសិស្ស និងគ្រូនៅក្នុងវិទ្យាល័យ។
ថ្លែងក្នុងពិធីនោះ លោក ម៉ែន អេង អភិបាលរងខេត្តស្វាយរៀង បានកោតសរសើរចំពោះកិច្ចខិតខំប្រឹងប្រែងរបស់លោកគ្រូ អ្នកគ្រូ និងដៃគូអភិវឌ្ឍន៍ ដែលបានបង្កើតឱ្យមានវេទិកាបង្ហាញស្នាដៃនេះឡើង ដោយលោកចាត់ទុកថាជាគំរូដ៏ល្អសម្រាប់ការអភិវឌ្ឍធនធានមនុស្សនៅមូលដ្ឋាន។
ជាចុងក្រោយ ឯកឧត្ដម ង៉ោ សុវណ្ណ បានមានប្រសាសន៍សំណេះសំណាល និងដាក់ចេញនូវទិសដៅមួយចំនួនដល់សិស្សានុសិស្ស និងលោកគ្រូអ្នកគ្រូ។ ឯកឧត្ដមបានគូសបញ្ជាក់ថា ការដាក់តាំងពិពណ៌នេះ គឺជាការឆ្លើយតបយ៉ាងសកម្មទៅនឹងយុទ្ធសាស្ត្របញ្ចកោណរបស់រាជរដ្ឋាភិបាល។ ឯកឧត្ដមបានលើកទឹកចិត្តឱ្យសិស្សបន្តការសិក្សាស្រាវជ្រាវ និងច្នៃប្រឌិត ដើម្បីក្លាយជាទំពាំងស្នងឫស្សីដ៏រឹងមាំក្នុងការអភិវឌ្ឍប្រទេសជាតិទៅថ្ងៃអនាគត។
