កែប ៖ អ្នកនេសាទម្នាក់បានស្លាប់បាត់បង់ជីវិត បន្ទាប់ពីជនរងគ្រោះរូបនោះ បានយកត្រីកំពតដែលនេសាទបាន មកចំអិនធ្វើម្ហូបអាហារ កាលពីវេលាម៉ោង១២និង០៥នាទីថ្ងៃត្រង់ ថ្ងៃទី១០ខែមិថុនា ឆ្នាំ២០១៧នេះ។
ជនរងគ្រោះដែលស្លាប់ដោយសារហូបត្រីកំពតនោះ មានឈ្មោះ ឈូក ប៊ុន ភេទប្រុស អាយុ៤៥ឆ្នាំ មុខរបរ អ្នកនេសាទសមុទ្រ មានទីលំនៅចំណុចកោះពោធិ ក្នុងភូមិកែប សង្កាត់កែប ក្រុង- ខេត្តកែប។
តាមប្រភពពីសាច់ញាតិបានឲ្យដឹងថា មុនពេលកើតករណីនេះ បុរសរងគ្រោះបានយកត្រីកំពតមកធ្វើម្ហូប ដោយខណៈនោះជនរងគ្រោះហូបតែម្នាក់ឯងទេ លុះបន្តិចក្រោយមកជនរងគ្រោះ ត្អូញត្អែរថាមិនស្រួលខ្លួន ទើបក្រុមគ្រួសារកោសខ្យល់ឲ្យ ប៉ុន្តែបែរជាមិនធូរស្រាល ហើយជនរងគ្រោះកាន់តែមានសភាពដុនដាបខ្លាំងរួចក៏ដាច់ខ្យល់ស្លាប់តែម្តង។
ទាក់ទិននឹងករណីនេះដែរ សមត្ថកិច្ចក្នុងតំបន់បានបញ្ជាក់អះអាងថា បុរសខាងលើពិតជាបានស្លាប់ដោយសារពុលត្រីកំពតមែនព្រោះមុនពេលស្លាប់បាននិយាយប្រាប់កូនថា បានយកត្រីកំពតមកចំអិនធ្វើជាអាហារ។សមត្ថកិច្ចបានឲ្យដឹងផងដែរថា រឿងពុលត្រីកំពតនេះវាបានកើតឡើងច្រើនករណីមកហើយដែរ គឺមិនមែនទើបតែកើតឡើងលើកទីមួយនោះទេ។ដូច្នេះក៏សូមណែនាំប្រជាពលរដ្ឋ ពិសេសប្រជានេសាទគ្រប់តំបន់នៃដែនទឹក សូមកុំយកត្រីកំពតមកធ្វើម្ហូបអាហារឲ្យសោះ ប្រយ័ត្នមានគ្រោះថ្នាក់ដល់អាយុជីវិតដូច បុរសរងគ្រោះខាងលើនេះ។
សពជនរងគ្រោះ ត្រូវបានក្រុមគ្រួសារកំពុងចាត់ចែងធ្វើបុណ្យ តាមប្រពៃណី ៕
ណារិទ្ធ
