ខេត្តបន្ទាយមានជ័យ ៖ នៅល្ងាចថ្ងៃទី៨ខែមិថុនាឆ្នាំ២០១៧នេះ នៅភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ បានធ្វើពីសម្ពោធផ្សារក្បាលស្ពានថ្មីនិងមណ្ឌលមហាសាល ដាក់ឲ្យប្រើប្រាស់ជាផ្លូវការ។
ពិធីនេះមានការចូលរួម ឯកឧត្តម សួន បវរ អភិបាលខេត្តបន្ទាយមានជ័យ លោកឈឹមសារឿនហៅចិនខ្មៅ និងភ្ញៀវកិត្តិយសជាច្រើននាក់ទៀតបានចូលរួមផងដែរ។
លោក ឈឹម សារឿន ហៅចិនខ្មៅម្ចាស់ផ្សារក្បាលស្ពានបានប្រាប់អ្នកយកព័ត៌មានឲ្យដឹងថាផ្សារក្បាលស្ពាននេះមានទំហំដីសរុប ៨.៥ហិកតា បានមកពីទិញពីប្រជាពលរដ្ឋហើយបានចាក់ដីបំពេញដើម្បីឲ្យបានផុតពីទឹក ក្រោយពីបាក់ដីបំពេញរួចមកបានចាប់កសាងនៅថ្ងៃ២២ខែសីហាឆ្នាំ២០១៦ហើយបញ្ចប់ការសាងសង់ធ្វើរួចរាល់នៅខែមិថុនាឆ្នាំ២០១៧នេះហើយបានដាក់ឲ្យប្រើប្រាស់ជាផ្លូវការតែម្តង។
លោក ឈឹម សារឿន ហៅចិនខ្មៅ បានបញ្ជាក់ទៀតថា សំណង់អគារផ្សារក្បាលស្ពានថ្មីនេះមានចាក់បេតុងជុំវិញផ្សារ និងប្រកដំបូលសង្គ័សីមាន២ខ្នងទំហំ ២.៥០០ម៉ែត្រការេដែលចែកចេញជា ស្តង់ខាងក្នុង ផ្សារសម្រាប់លក់សម្ភារៈប្រើប្រាស់ មានដូចជាខោអាវ ឥវ៉ាន់ផ្សេងៗមានទំហំ២.៥ម៉ែត្រ គុណនិង២.៥ម៉ែត្រមានចំនួន២៥០ស្តង់ ស្តង់ លក់សាច់ជ្រូក សាច់គោ ត្រីសាច់ផ្សេងៗមានទំហំ២.៥ម៉ែត្រគុណ២.៥ម៉ែត្តមានចំនួន៦០ស្តង់ ស្តង់លក់បន្លែបង្កា ផ្លែឈើមានទំហំ២.៥ម៉ែត្រគុណនិង២.៥ម៉ែត្រមានចំនួន១០០ស្តង់ ស្តង់ខាងក្រៅផ្សារជាស្តង់ដែលមានទំហំ៤ម៉ែត្រ គុណនិង៨ម៉ែត្រមានចំនួន៤០ស្តង់និងមានផ្ទះល្វេងនៅជុំវិញផ្សារដែលមានទំហំ៤.១ម៉ែត្រគុណនិង១៦ម៉ែត្រមានចំនួន១៥០ល្វែងនិងមានភោជនីយដ្ឋានហាសាល១ខ្នងនិងសណ្ឋាគារ១ខ្នង។លោកចិនខ្មៅបានបញ្ជាក់ឲ្យដឹងទៀតថាផ្សារនេះបានរៀបចំបណ្តាញផ្លូវជុំវិញផ្សារ និងមានប្រព័ន្ធលូ និងសង់ផ្លូវបេតុងចូលទៅកាន់ផ្សារនិងមានប្រព័ន្ធលូសង់ផ្លូវកាត់ទទឹងជុំវិញផ្សារនិងដាក់ប្រព័ន្ធលូ និងសព្វថ្ងៃនេះកំពង់អនុវត្តសកម្មភាពបន្ត ការកសាងស្តង់ខាងក្រៅ មានផ្លូវនិងមានរៀបចំដាក់លូបង្ហូទឹកបន្តហើយបច្ចុប្បន្នផ្សារក្បាលស្ពានថ្មីនេះដំណើរការបាន៩០ភាគរយហើយនិងមានអតិថិជនកំពង់ចូលលក់ជាបន្តបន្ទាប់ក្រោយពីដាក់ឲ្យដំណើរការរួចមក ។
លោក ចិន ខ្មៅ បានបញ្ជាក់ទៀតថា ផ្សារនេះមានផាសុខភាពណាស់ព្រោះមានខ្យល់ចេញចូលគ្រប់គ្រាន់ហើយសំខាន់ទៅទៀតនោះផ្សារនេះមានលក់បោះដុំគ្រប់មុខ និងលក់រាយដែលប្រជាពលរដ្ឋយកមកលក់នៅតាមស្រុកនិងពីប្រទេសថៃ។ក្នុងពិធីសម្ពោធនោះដែរលោកសួនបវរបក៏បានមានប្រសាសន៍ដែរថាខេត្តបន្ទាយមានជ័យគឺជាខេត្តមួយដែលបំបែកចេញពីខេត្តបាត់ដំបងនៅឆ្នាំ៨០ប្លាយក្នុងរយះពេលជិត៣០នេះខេត្តបន្ទាយមានជ័យមានការរីកចំរើនខ្លាំងលើគ្រប់វិស័យ ពិសេសវិស័យកពាណិជ្ជកម្ម ដែលកំពង់មានការប្រគួតប្រជែងនិងតាមតម្រូវការរបស់ប្រជាពលរដ្ឋដែលត្រូវការទីផ្សារសម្រាប់ការលក់ដូរនូវផលិតផល ក្នុង ស្រុក ក៏ដូចជានាំចូលពីក្រៅស្រុកផងដែរនិងម្យ៉ាងទៀតដើម្បីអភិវឌ្ឍខេត្តឲ្យកាន់តែរីកចំរើនថែមទៀត ។ ក្នុងនោះឯកឧត្តម សួន បវរ បានធ្វើការកោតសរសើរយ៉ាងក្រៃលែងចំពោះលោកឈឹមសារឿន ហៅ ចិនខ្មៅដែលបានខិតខំកសាងផ្សារដ៏ថ្មីមួយនេះឡើងសំរាប់បំពេញសេចក្តីត្រូវការរបស់ប្រជាពលរដ្ឋក្នុងខេត្តបន្ទាយមានយើងនេះ៕
