ស្ត្រីមេម៉ាយម្នាក់ ដាក់ពាក្យប្តឹងអតីតប្តីរបស់ខ្លួន រួមជាមួយអ្នកជិតខាង៣នាក់ ចោទប្រកាន់ករណីធ្វើឱ្យ ខូចខាតដំណាំ ជេរប្រមាថ និងហិង្សាដោយចេតនា ខណ:តុលាការកោះហៅចុងចោទទៅសួរនាំ

ស្ត្រីមេម៉ាយម្នាក់ ដាក់ពាក្យប្តឹងអតីតប្តីរបស់ខ្លួន រួមជាមួយអ្នកជិតខាង៣នាក់ ចោទប្រកាន់ករណីធ្វើឱ្យ ខូចខាតដំណាំ ជេរប្រមាថ និងហិង្សាដោយចេតនា ខណ:តុលាការកោះហៅចុងចោទទៅសួរនាំ
ខេត្តប៉ៃលិន ៖ រហូតមកដល់ព្រឹកថ្ងៃទី០៩ ខែមិថុនា ឆ្នាំ២០២២នេះ អយ្យការអមសាលាដំបូង ខេត្តប៉ៃលិន បានកោះហៅបុរសម្នាក់ ជាអតីតប្តីស្រ្តីមេម៉ាយម្នាក់ រួមជាមួយនឹងស្រ្តីអ្នកភូមិចំនួន០៣នាក់ ផ្សេងទៀត ទៅកាន់សាលាដំបូងខេត្តប៉ៃលិន បន្ទាប់ពីស្រ្តីរូបនោះ បានដាក់ពាក្យបណ្តឹងទៅតុលាការខេត្តប៉ៃលិន ដោយចោទប្រកាន់ ពាក់ព័ន្ធទៅនឹងបទល្មើសធ្វើឱ្យខូចខាតដោយចេតនា ជេរប្រមាថដោ យចេតនា និងហិង្សាដោយចេតនា ខណ:បុរសជាប្តី ព្រមទាំងអ្នកជិតខាងក្នុងភូមិបានឆ្លើយបំភ្លឺឡើងថា មិនដូចអ្វីដែលគាត់ប្តឹងចោទប្រកាន់នៅក្នុងពាក្យបណ្តឹងនោះឡើយ លុះបន្ទាប់ពីខាងតុលាការសួរនាំម្នាក់ម្តងៗ រហូតដល់ម៉ោង៣ និង០០រសៀលថ្ងៃដដែល ក៏អនុញ្ញាតឱ្យត្រឡប់ទៅផ្ទះរៀងៗខ្លួនវិញ។
បើតាមពាក្យបណ្តឹងរបស់ស្រ្តីមេម៉ាយម្នាក់ ឈ្មោះ ទូច សុខឃឿន អាយុ៥៦ឆ្នាំ ជាកសិករ រស់នៅក្នុងភូមិអូរខ្ទីង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន បានរៀបរាប់ឱ្យដឹងថា ៖ គាត់សុំប្តឹងពី ទី១. ឈ្មោះ នួន គឹមឈាន ភេទប្រុស អាយុ៥៤ឆ្នាំ អតីតប្តី ពីបទ «ធ្វើឱ្យខូចខាតដោយចេតនា» ប្រព្រឹត្តនៅភូមិខាងលើ កាលពីថ្ងៃទី០៤ ខែមិថុនា ឆ្នាំ២០២២ ទី២. ឈ្មោះ សុខ ចាន់ឌី ភេទស្រី អាយុ២៤ឆ្នាំ ទី៣. ឈ្មោះ សុខ ចាន់ធី ភេទស្រី អាយុ៣៤ឆ្នាំ និងទី៤. ឈ្មោះ សុខ ស្រីម៉ៅ ភេទស្រី អាយុ៣១ឆ្នាំ ពីបទជេរប្រមាថជាសាធារណ: និងហិង្សាដោយចេតនា» ប្រព្រឹត្តនៅភូមិអូរខ្ទីង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។ ប្រភពបន្តទៀតថា កាលពីពេលថ្មីៗ នេះ មានបុរសម្នាក់ ត្រូវជាអតីតប្តីរបស់គាត់ បានយកកាំបិតខ្វែវ ទៅកាប់បំផ្លាញ ដំណាំដើមទាប និងដើមខ្នុរ អស់ជាច្រើនដើម លុះក្រោយពីមានការឈ្លោះប្រកែកគ្នាដោយសាររឿងកាប់ដើមឈើនេះ ស្រាប់តែមានអ្នកជិតខាងទាំងបីនាក់ខាងលើ បានចូលទៅកាត់ត្រួយស្អំនៅក្នុងដីរបស់គាត់ដែរ ហើយក៏ជួយខាងបុរសជាអតីតប្តី ដោយជេរប្រមាថមើល ងាយទៅលើគាត់ ធ្វើឱ្យប៉ះពាល់កិត្តិយស សេចក្តីថ្លៃថ្នូរ និងការរស់នៅរបស់គាត់ ទើបសម្តេចចិត្តដាក់ពាក្យបណ្តឹងតែម្តង។
ពាក់ព័ន្ធទៅនឹងបញ្ហានេះ លោក នួន គឹមឈាន អតីតប្តីរបស់ស្រ្តីមេម៉ាយខាងលើ បានឱ្យដឹងថា ៖ គាត់មិនបានកាប់ដើមឈើហូបផ្លែនៅលើដីរបស់ស្រ្តីមេម៉ាយជាអតីតប្រពន្ធខ្លួនឡើយ គឺកាត់នៅលើដីរបស់ខ្លួន ដែលត្រូវបានចៅសង្កាត់អូរតាវ៉ៅ បែងចែកជូន បន្ទាប់ពីលែងលះគ្នារួចមកប៉ុណ្ណោះ។ លោកបន្តទៀតថា ចំពោះស្រ្តីបីនាក់ នៅក្នុងភូមិខាងលើនេះ ក៏មិនបានទៅកាត់ត្រួយស្អំ នៅលើដីរបស់នាងដែរ គឺសុំកាត់ត្រួយស្អំនៅលើដីរបស់លោកដដែល ដោយសុំការអនុញ្ញាតត្រឹមត្រូវ។ ពាក់ព័ន្ធនឹងបណ្តឹង នេះ លោក ហើយនឹងអ្នកជិតខាងទាំងអស់ខាងលើ ក៏បានចូលទៅបំភ្លឺនៅក្នុងសាលាដំបូងខេត្តប៉ៃលិន រួចរាល់អស់ហើយដែរ ដោយអ្វីៗនៅក្នុងពាក្យបណ្តឹងសុទ្ធតែជាការមួលបង្កាច់របស់ស្រ្តីខាងលើនោះប៉ុណ្ណោះ ហើយលោកនឹងសម្រេចចិត្តថា នៅថ្ងៃខាងមុខ នឹងឈប់រស់នៅក្បែរស្រ្តីរូបនេះទៀត ព្រោះមិន បានទទួលក្តីសុខទាំងផ្លូវកាយ និងផ្លូវចិត្ត។ លោកបញ្ជាក់ថា មូលហេតុដែលនាំឱ្យមានការលែងលះគ្នា អស់រយ:ពេលមួយឆ្នាំកន្លងមក គឺដោយសារតែស្រ្តីខាងលើ តែងតែយកលុយកាក់ដែលខ្លួនរកបានទៅលេងល្បែងកាស៊ីណូ ហើយក៏បង្ខំឱ្យលោកទៅចងការមីក្រូហិរញ្ញវត្ថុ ដើម្បីយកប្រាក់ឱ្យគាត់ទៅលេងល្បែង លុះទ្រាំមិនបានក៏ស្តីបន្ទោស ទើបស្រ្តីរូបនេះខឹងសុំលែងលះ បែងចែកដីគ្នា ដោយគាត់សុខចិត្តទៅរស់នៅក្នុងខ្ទមតូចជាប់គ្នាខាងកើតស្រ្តីរូបនេះ។ រីឯស្រ្តីជាអតីតប្រពន្ធឱ្យរស់នៅលើផ្ទះថ្មធំ ខណ:បានគ្នាអស់រយ:ពេលជាង៣០ឆ្នាំមកហើយ ក៏បង្កើតបានកូនស្រ្តីម្នាក់ កំពុងរស់នៅខេត្តផ្សេង។ លោកពិតជាសុំខ្លាចស្រ្តីខាងលើមែន សូម្បីតែមេភូមិ ឬអ្នកជិតខាងជុំវិញភូមិក៏មិនហ៊ានទៅក្បែរស្រ្តីរូបនេះដែរ ព្រោះតែងតែជេរបញ្ឆិតបញ្ឆៀងដាក់គេឯងគ្រប់ៗគ្នា។
ចំណែកលោក ម៉ែន ឆន មេភូមិអូរខ្ទីង បានឱ្យដឹងដែរថា ៖ ប្តីប្រពន្ធខាងលើនេះ បានចែកផ្លូវ គ្នាជាង១ឆ្នាំ ដោយមានលិខិតលែងលះចេញពីខាងសង្កាត់អូរតាវ៉ៅ មិនបានឡើងទៅដល់តុលាការនោះ ទេ ព្រោះអត់មានសំបុត្រអាពាហ៍ពិពាហ៍។ លោកបន្តទៀតថា រឿងហេតុកើតឡើង គឺដោយសារស្រ្តីជា ប្រពន្ធទាំងអស់ ព្រោះប្តីស្លូតបូតមិនចេះមាត់ក.នោះទេ ខណ:ប្តីខិតខំប្រឹងប្រែងរកលុយកាក់ឥតឈប់ឈរ រហូតដល់ទិញដីចម្ការបានជាង២០ហិកតា ត្រូវប្រពន្ធបង្ខំឱ្យលក់អស់ រួចយកថវិកាទៅលេងល្បែងកាស៊ីណូចាញ់អស់គ្មានសល់ ហើយក៏ចេះតែឈ្លោះគ្នាឥតឈប់ឈររហូតដល់ចំណុចចុងក្រោយតែម្តង ៕