កំពត ៖ ប្រជាពលរដ្ឋរស់ក្នុងភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត ប្រមាណជិត៥០នាក់ តំណាងឲ្យ១៨៩គ្រួសារ បាននាំគ្នាមកកាន់សាលាខេត្តកំពត នៅព្រឹកថ្ងៃទី០៨ខែមិថុនា ឆ្នាំ២០១៧ ដើម្បីសុំឲ្យលោកអភិបាលខេត្តកំពត ជួយរកដំណោះស្រាយ ខណៈក្រុមហ៊ុន លោកស្រី ហ៊ាង គន្ធី រំលោភយកដីពួកគាត់ដែលកំពុងរស់នៅនិង អាស្រ័យផលរយៈពេលជាង១០ឆ្នាំមកហើយនោះ។
ពាក់ព័ន្ធនឹងករណីដដែលនេះ ត្រូវបានតំណាងពលរដ្ឋអះអាងថា ក្រុមហ៊ុនរបស់លោកស្រី ហ៊ាង គន្ធី និងឈ្មួញដីធ្លីម្នាក់ទៀត ឈ្មោះ អាំ ផល្លីន បានហៅកំលាំងទាហានមករុះរើ ផ្ទះសំបែងរបស់ពួកគាត់ ហើយដឹកជញ្ជូនយកទៅកាលពីព្រឹកថ្ងៃទី០៧ខែមិថុនា ឆ្នាំ២០១៧ ហើយក្រុមទាំងនោះបានប្រើអំពើហិង្សា វាយដំ ទាត់ធាក់ ក្នុងការរំលោភបំពានយកដីពួកគាត់ ដោយពុំខ្លាចរអានឹងច្បាប់ឡើយ។ជាងនេះទៅទៀត បើតាមតំណាងពលរដ្ឋទាំងនោះ បានឲ្យដឹងបន្ថែមទៀតថា ទង្វើរបស់ក្រុមហ៊ុនមួយនេះ ធ្វើសកម្មភាពរុះរើផ្ទះសំបែងនិងដេញប្រជាពលរដ្ឋចេញពីចំណុចដីខាងលើ ហាក់ដូចជាមកប្លន់យកដីពួកគាត់ផងដែរ។ពួគាត់បានបញ្ជាក់ទៀតថា ពេលក្រុមហ៊ុនលោកស្រី ហ៊ាង គន្ធី មករុះរើលំនៅដ្ឋាននោះ ទោះបីសមត្ថកិច្ចក្នុងតំបន់ក៏មិនហ៊ានមកជួយអន្តរាគមន៍ដែរ ព្រោះក្រុមរបស់នោះ បញ្ជាដោយក្រុមទាហានដែលមានអាវុធកាន់នៅដៃទើបពួកគាត់គ្មានលទ្ធភាពតតាំងជាមួយពួកគេបែបនេះ។
តំណាងប្រជាពលរដ្ឋបានប្រាប់ទៀតថា កាលពីឆ្នាំមុនខាងមន្ទីររៀបចំដែនដី នគរូបនីយកម្មនិងសំណង់ ខេត្តកំពត បានទៅវាស់វែងដីនៅចំណុចខាងលើ ដើម្បីធ្វើប្លង់កម្មសិទ្ធិជូនពួកគាត់ ប៉ុន្តែពេលចេញប័ណ្ណកម្មសិទ្ធិ បែរទៅជាឈ្មោះអ្នកផ្សេងទៅវិញ តើរឿងនេះមកពីមូលហេតុអី្វ?។តំណាងដដែលបានបញ្ជាក់អះអាងថា ប្លង់កម្មសិទ្ធិចំនួន១០៣ប្លង់ ក្នុងចំណោមផ្ទៃដីជាង១០០០ហិកតា របស់ប្រជាពលរដ្ឋទាំង១៨៩គ្រួសារ ខណៈនេះត្រូវធ្វើរួចរាល់ហើយ តែពុំមានឈ្មោះរបស់ប្រជាពលរដ្ឋស្ថិតក្នុងតំបន់នោះទេ។
ប្រជាពលរដ្ឋខាងលើ សំណូមពរដល់អាជ្ញាធរខេត្តកំពត គឺលោកចាន់ ចេស្តា មេត្តាជួយរកយុត្តិធម៌ជូនដល់ពួកគាត់ផង ព្រោះខណៈនេះលំនៅដ្ឋានពួកគាត់ត្រូវគេរឹបអូសយកដោយគ្មានបញ្ជាក់ពីមូលហេតុអី្វបន្តិចឡើយ គឺសុខៗមកបណ្តេញហើយរុះរើយកតែម្តង។
ទាក់ទិននឹងករណីចោទប្រកាន់ការរំលោភបំពានដីធ្លី ខាងលើ នៅព្រឹកថ្ងៃដដែលនេះ អ្នកយកព័ត៌មាន ពុំអាចសុំការពន្យល់ណាមួយពីភាគី ក្រុមហ៊ុនរបស់លោកស្រី ហ៊ាង គន្ធី បានទេ។ ដោយឡែកនៅព្រឹកនេះតំណាងអាជ្ញាធរខេត្តក៏ពុំទាន់បានធ្វើការសម្របសម្រួលណាមួយ ជូនប្រជាពលរដ្ឋនៅឡើយ ដោយរង់ចាំកិច្ចពិភាក្សានិងសេចក្តីសម្រេច ពីអាជ្ញាធរថ្នាក់លើសិន៕
ណារិទ្ធ
