កែប ៖ ករណីគ្រោះថ្នាក់ចរាចរណ៍ដ៏គួរឲ្យហួសចិត្តមួយ បានបណ្តាលឲ្យស្ត្រីម្នាក់ ដែលគេស្គាល់ថាជាម្ចាស់បឹងហ្កាឡូក្នុងរមណីយដ្ឋានឆ្នេរកែបបានទទួលគ្រោះថ្នាក់យ៉ាងធ្ងន់ធ្ងរនិងបង្កឲ្យមានការខូចខាតម៉ូតូយ៉ាងដំណំផងដែរ។
គ្រោះថ្នាក់ចរាចរណ៍ខាងលើបានកើតឡើងនៅវេលាម៉ោង១និង៤៥នាទីរសៀល ថ្ងៃទី២២ខែឧសភា ឆ្នាំ២០១៧ត្រង់ចំណុចខាងលិចវិមានឯករាជ ចម្ងាយ៥០ម៉ែត្រ នៃសង្កាត់កែប ក្រុង-ខេត្តកែប រវាងម៉ូតូC125និងរថយន្តដឹកដីពណ៌ស។
តាមប្រភពព័ត៌មាននៅកន្លែងកើតហេតុបាននិយាយថា ចំណុចបង្កគ្រោះថ្នាក់ខាងលើគឺជាដងផ្លូវដ៏ធំទូលាយ និងមានសភាពស្ងាត់ដោយពុំសូវមានអ្នកដំណើរណាមួយឆ្លងកាត់ទៅមកឡើយ ស្រាប់តែមកកើតករណីគ្រោះថ្នាក់ចរាចរណ៍ទៅរួចដែរ ។
ប្រភពបានបញ្ជាក់ថា មុនពេលកើតហេតុគេឃើញស្ត្រីរងគ្រោះជិះម៉ូតូម្នាក់ឯងចេញពីផ្លូវលំ ពីលិចទៅកើតនៃផ្នែកខាងស្តាំបំណងជិះបន្តទៅមុខ គាប់ជួនក៏មានរថយន្តបែនដឹកដីបោះពួយយ៉ាងលឿនមកពីជើងទៅត្បូង ក៏វាក់អើុគ្នា ទើបអ្នកបើកបររថយន្តខំបួងចង្កូតគេច តែគេចមិនផុតទើបអ្នកបើកម៉ូតូជ្រុលទៅបុករថយន្តទាំងកំរោលបួនជ្រុង បណ្តាលឲ្យរងរបួសធ្ងន់តែម្តង។ដោយឡែករថយន្តក៏ជ្រុលទៅធ្លាក់ក្នុងរណ្តៅលូធ្វើដំណើរទៅមុខមិនរួចទើបម្ចាស់រថយន្តសម្រេចចិត្តដាក់មេប្រូចបាត់ស្រមោលសូន្យ។
សមត្ថកិច្ចចរាចរណ៍ដែលកំពុងវាស់វែងបាននិយាយថា គ្រោះថ្នាក់នេះវាហាក់មិនទំនង ព្រោះការកើតឡើងនេះ វាស្ថិតក្នុងទីតាំងមួយគ្មានមនុស្សណាម្នាក់មករំខានសោះ ពោលគឺជាចំណុចដងផ្លូវទើបតែស្ថាបនាមានភាពធំទូលាយ បែបនេះអាចកើតឡើងដោយសារតែកក្តាមនុស្សដែលបានបង្កើតឡើងដោយខ្វះភាពម្ចាស់ការថែមទាំងបើកបរលឿន ហើយមិនមើលឧបសគ្គនៅខាងមុខ។
ប៉ូលិសបានឲ្យដឹងទៀតថា ជនរងគ្រោះមានឈ្មោះ ស្រី ភេទស្រី អាយុ៥៦ឆ្នាំ ជាម្ចាស់បឹងហ្កាឡូដ៏ធំមួយនៅក្នុងខេត្តកែប គាត់ជិះម៉ូតូម៉ាកC125ពណ៌ខ្មៅ ផលិតឆ្នាំ2016 ពាក់ស្លាកលេខ កែប 1A-5201បានរងរបួសធ្ងន់បាក់ជើងនិងរបួសដងខ្លួនស្ទើគ្រប់កន្លែង ពេលនេះត្រូវបានរថយន្តរបស់ស្នងការដ្ឋាននគរបាលខេត្តកែប ដឹកបន្តទៅសង្គ្រោះនៅមន្ទីរពេទ្យខេត្តកំពតហើយ។ចំណែកម្ចាស់រថយន្តដឹកដីគេចខ្លួនបាត់ឈឹងតែម្តង។
ក្រោយពីវាស់វែង មធ្យោបាយពាក់ព័ន្ធត្រូវបានសមត្ថកិច្ចនាំយកទៅរក្សាទុកនៅអធិការដ្ឋាននគរបាលក្រុងកែបសំរាប់ដោះស្រាយនៅពេលក្រោយ ៕
ណារិទ្ធ
