កែប ៖ នៅរសៀលថ្ងៃទី១៣ខែឧសភា ឆ្នាំ២០១៧ នៅមន្ទីរគណបក្សប្រជាជនកម្ពុជាខេត្តកែប បានរៀបចំពិធីសំណេះសំណាលជាមួយមន្ត្រីគណបក្សសង្កាត់កែប ក្រោមវត្តមាន លោកកែន សត្ថា ប្រធានគណៈកម្មាធិការគណបក្សប្រជាជនខេត្ត អមដោយសការីជាច្រើនរូប ព្រមទាំងសមាជិក សមាជិកា ក្នុងជួរគណបក្សចូលរួមយ៉ាងច្រើនកុះករ។
ថ្លែងក្នុងកិច្ចសំណេះសំណាលនេះដែរ លោកកែន សត្ថា បានលើកឡើងថា សភាពការណ៍បច្ចុប្បន្នទោះជាមានភាពធូរស្រាលដោយសារគណបក្សនយោបាយមួយចំនួនមានភាពរង្គោះរង្គើបែបណាក្តី ប៉ុន្តែសម្រាប់គណបក្សប្រជាជននៅតែមានគោលដៅច្បាស់លាស់ដើម្បីស្រូបយកប្រជាប្រិយភាពនិងភាពជឿរជាក់ជាងមុន ហើយភាពប្រាកដប្រជារបស់គណបក្សប្រជាជននឹងបាននាំមកនូវជោគជ័យដ៏ត្រចះត្រចង់ ដោយសារតែមានការគាំទ្រពីសំណាក់មជ្ឈដ្ឋានទូទាំងប្រទេស ពិសេសប្រជាពលរដ្ឋដែលជាម្ចាស់ឆ្នោត ម្យ៉ាងវិញទៀតអំឡុងពេលបច្ចុប្បន្ន ប្រជាពលរដ្ឋភាគច្រើនលែងជឿរឬទុកចិត្តក្រុមអ្នកនយោបាយនោះទៀតហើយ ព្រោះពួកគេតែងតែភូតកុហកបោកប្រាស់ម្តងហើយម្តងទៀតសូម្បីតែសកម្មជនរបស់បក្សនយោបាយនោះក៏លែងមានជំនឿរចិត្តមកលើមេដឹកនាំរបស់ខ្លួនទៅហើយនោះ។លោកក៏បានបញ្ជាក់នូវជំហរដ៏មុឺងម៉ាត់របស់គោលនយោបាយគណបក្សប្រជាជន ដែលជានិច្ចកាលតែងតែធ្វើអី្វៗដើម្បីផលប្រយោជន៍ប្រជាពលរដ្ឋនិងសង្គមជាតិទាំងមូល ពិសេសដើម្បីការស្តានិងអភិវឌ្ឍន៍ប្រទេសជាតិប្រកបដោយភាពរីកចម្រើនឥតឈប់ឈរពីបាតដែទទេរហូតមានអី្វៗគ្រប់បែបយ៉ាងរហូតមកដល់សព្វថ្ងៃនេះ។
លោកបានសង្កត់ធ្ងន់យ៉ាងដូច្នេះថា ក្នុងការបោះឆ្នោតក្រុមប្រឹក្សាឃុំ សង្កាត់ ដែលនឹងប្រព្រឹត្តទៅក្នុងថ្ងៃទី០៤ខែមិថុនា ឆ្នាំ២០១៧ខាងមុខនេះ ក៏សូមក្រើនរំលឹកដល់មន្ត្រីនៃគណបក្សទាំងអស់ដើម្បីត្រៀមលក្ខណៈសម្រាប់ចូលរួមបោះឆ្នោតឲ្យបានគ្រប់ៗគ្នា។
ក្នុងខណៈនោះដែរ លោក កែន សត្ថា ក៏បានភ្ជាប់ជាមួយនូវថវិកាមួយចំនួនសម្រាប់ជូនដល់សមាជិក សមាជិកា ក្នុងពិធីនេះផងដែរ ៕
ណារិទ្ធ
