កំពត ៖ យោងតាមរបាយការណ៍របស់ការិយាល័យប្រឆាំងបទល្មើសគ្រឿងញៀន ខេត្តកំពតបានឲ្យដឹងថា បន្ទាប់ពីសមត្ថកិច្ចចេញប្រតិបតិ្តការតាមបណ្តាក្រុង-ស្រុកទាំង៨ក្នុងរយៈពេល៣ថ្ងៃនេះកំលាំងក៏បានបង្ក្រាបបទល្មើសគ្រឿងញៀនបានជាច្រើនករណី។ជាមួយគ្នានេះ កំលាំងសមត្ថកិច្ចក៏បានឃាត់ខ្លួនជនសង្ស័យចំនួន១៥នាក់ និងដកហូតវត្ថុតាងថ្នាំញៀនមួយចំនួនធំផងដែរ។
លោកវរសេនីយ៍ឯក ទូច ឌន នាយការិយាល័យប្រឆាំងបទល្មើសគ្រឿងញៀនខេត្តកំពតបានប្រាប់ឲ្រដឹងថា ដោយអនុវត្តតាមបទបញ្ជារបស់ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត និងមានការសម្របសម្រួលពីតំណាងអយ្យការអមសាលាដំបូងខេត្តផងនោះ ទើបកំលាំងអន្តរាគមន៍ពិសេស(ឈុតខ្មៅ)របស់ស្នងការនគរបាលខេត្ត ដឹកនាំដោយរូបលោកផ្ទាល់រួមនឹងលោក លក ញ៉ាវ នាយការិយាល័យព្រហ្មទណ្ឌកម្រិតស្រាល បានចុះប្រតិបតិ្តការដោយសហការរវាងបណ្តាកំលាំងនៃអធិការដ្ឋាននគរបាលក្រុង-ស្រុកទាំង៨ទូទាំងខេត្តកំពត។
លោកបានបញ្ជាក់ថា ក្នុងរយៈពេលបីថ្ងៃចាប់ពីថ្ងៃទី៥រហូតដល់ថ្ងៃទី៧ខែឧសភា ឆ្នាំ២០១៧នេះ កំលាំងសមត្ថកិច្ចបង្ក្រាបបានជនសង្ស័យចំនួន១៥នាក់និងដកហូតសារធាតុញៀនបានចំនួន៤០កញ្ចប់(មានតូច ធំ)ស្មើនឹងទម្ងន់១៤,៦៦ក្រាមនិងឧបករណ៍សេធគ្រឿងញៀនមួយចំនួនផងដែរ ។
លោកបានឲ្យដឹងទៀតថា ក្រុមជនសង្ស័យទាំង១៥នាក់ដែលបង្ក្រាបបានបន្តបន្ទាប់គ្នានោះ លោកបានសាងសំណុំរឿង១០នាក់បញ្ជូនទៅសាលាដំបូងរួចរាល់ហើយ ។ ដោយឡែក ជនសង្សីយ៥នាក់ទៀត ដែលកំលាំងឃាត់ខ្លួននៅយប់ថ្ងៃទី៦និងទី៧ខែឧសភា ឆ្នាំ២០១៧រួមមាន៖ទី១.ឈ្មោះ ស៊ូ គីរីន ភេទប្រុស អាយុ៣០ឆ្នាំ មានទីលំនៅ ភូមិត្រើយកោះ ក្រុងកំពត(ជួញដូរ)ទី២.ឈ្មោះ វង្ស សុភ័ក្រ ភេទប្រុស អាយុ១៧ឆ្នាំ មានទីលំនៅ ភូមិទី្វខាងត្បូង សង្កាត់អណ្តូងខ្មែរ ក្រុង-ខេត្តកំពត(ប្រើប្រាស់)ទី៣.ឈ្មោះបាវ គា ភេទប្រុស អាយុ២២ឆ្នាំ ទីលំនៅក្នុងភូមិខ្នាយ នៃស្រុកបន្ទាយមាស(ជួញដូរ)ទី៤.ឈ្មោះ ជួប ភារម្យ ភេទប្រុស អាយុ៣៧ឆ្នាំនិងទី៥.ឈ្មោះ ហេង សុខា ភេទស្រី អាយុ៣៣ឆ្នាំ (២នាក់នេះជាប្តីប្រពន្ធ) និងជាមេក្លោងជួញដូរដែលជាមុខសញ្ញាចាស់ត្រូវសមត្ថកិច្ចតាមប្រមាញ់ជាយូរមកហើយ ដោយមានទីលំនៅភូមិច្រកឃ្លៃ ឃុំទូកមាសខាងលិច ស្រុកបន្ទាយមាស ខេត្តកំពត។
បច្ចុប្បន្នជនសង្ស័យទាំង៥នាក់ត្រូវបានសមត្ថកិច្ចការិយាល័យប្រឆាំងបទល្មើសគ្រឿងញៀនកសាងសំណុំរឿងបញ្ជូនទៅសាលាដំបូងខេត្តកំពត ចាត់ការតាមនីតិវិធី៕
ណារិទ្ធ
