កែប ៖ សំណង់អគារនៃមណ្ឌលសុខភាពចំការបី ស្ថិតក្នុងឃុំពងទឹក ស្រុកដំណាក់ចង្អើរ ខេត្តកែប ត្រូវបានធ្វើពិធីសម្ពោធបើកឲ្យប្រើប្រាស់ជាផ្លូវការនៅព្រឹកថ្ងៃទី០៨ខែឧសភា ឆ្នាំ២០១៧ ក្រោមការចូលរួមពីសំណាក់ លោក កែន សត្ថា អភិបាលនៃគណៈអភិបាលខេត្តកែប និងអស់លោកជាអភិបាលរង ព្រមទាំងថ្នាក់ដឹកនាំនៃមន្ទីរ ជំនាញគ្រប់អង្គភាព និងប្រជាពលរដ្ឋចូលរួមប្រមាណ២១៧នាក់។
លោក ម៉ែន សុធីរ ប្រធានមន្ទីរសុខាភិបាលខេត្តកែបបានឲ្យដឹងថា ការសាងសង់នូវ មណ្ឌលសុខភាពនេះគឺដោយសារមានការទទូចស្នើសុំពីសំណាក់លោកមេឃុំប្រចាំតំបន់ ទើបអាជ្ញាធរខេត្តសុំគោលការណ៍ពីប្រមុខរាជរដ្ឋាភិបាលហើយចាប់ផ្តើមស្ថាបនាភ្លាមតែម្តង ។ លោកបានបន្តថា ក្នងមណ្ឌលសុខភាពទាំងមូលមានពេទ្យប្រចាំការដែលសុទ្ធតែមានជំនាញសរុប៨នាក់។
ថ្លែងមតិសំណេះសំណាលនាឱកាសនោះ លោក កែន សត្ថា អភិបាលខេត្តកែបបានលើកឡើងថា កាលពីអតីតកាលតំបន់នេះជាសមូរភូមិប្រយុទ្ធដ៏ស្វិតស្វាញ ឥឡូវបានប្រែក្លាយជាតំបន់អភិវឌ្ឍន៍និងមានភាពចម្រើនលូតលាស់ ពិសេសហេដ្ឋារចនាសម្ព័ន្ធ ដូចជាការស្ថាបនាផ្លូវលំខ្វាត់ខ្វែងរហូតមានការស្ថាបនាផ្លូវក្រាលកៅស៊ូដ៏ធំទូលាយ ហើយតំបន់ខាងលើក៏បានរៀបចំឲ្យមានទំនប់ទឹក ប្រឡាយទឹក មន្ទីរពេទ្យ វត្តអារាម សាលារៀន ។ល។ ហើយក្នុងភូមិសាស្ត្រខាងលើក៏បានបែងចែកជាដីលំនៅឋាន និងដីសម្រាប់ប្រកបការងារកសិកម្មដែលមានផ្ទៃដីរាប់សិបហិកតា ។ ក្រៅពីនោះ ប្រជាពលរដ្ឋក្នុងតំបន់ក៏បានបង្កើនការងារអាជីវកម្មផ្សេងៗនិងធ្វើឲ្យជីវភាពកាន់តែរីកចម្រើនពីមួយថ្ងៃទៅមួយថ្ងៃផងដែរ ។
លោកបានបញ្ជាក់ទៀតថា បច្ចុប្បន្នវិស័យសុខាភិបាលត្រូវបានលើកកម្ពស់សំរាប់បម្រើសេវាជូនប្រជាពលរដ្ឋគ្រប់មូលដ្ឋាន ហើយការព្យាបាលគឺមិនសំដៅលើនិន្នាការណ៍ឬគណបក្សនយោបាយណានោះទេ ។
ទន្ទឹមនេះ រាជរដ្ឋាភិបាលតាមរយៈក្រសួងសុខាភិបាលបានធ្វើកំណែទម្រង់ហេដ្ឋារចនាសម្ព័ន្ធរូបវ័ន្ត ធនធានមនុស្ស ថវិកា ។ល។ សំដៅធ្វើយ៉ាងណាឲ្យការផ្តល់សេវាសុខាភិបាល ឲ្យកាន់តែខិតជិតប្រជាពលរដ្ឋតាមមូលដ្ឋានដោយការព្យាបាលជម្ងឺដោយសមធម៌ គុណធម៌និងមានប្រសិទ្អភាពជូនប្រជាពលរដ្ឋ ។ អគារសុខភាពដែលស្ថិតនៅចំពោះមុខយើងរួមទាំងឱសថ សម្ភារៈបរិក្ខាពេទ្យទាំងអស់គឺបានមកពីការចំណាយថវិការបស់រាជរដ្ឋាភិបាលដែលជាថវិការួមវិភាគទាន ។ ដូច្នេះមណ្ឌលសុខភាពត្រូវចេះយកចិត្តទុកដាក់ថែទាំនិងថែរក្សាទាំងអស់គ្នា ហើយបងប្អូនលោកយាយលោកតាសូមមកពិនិត្យព្យាបាលជម្ងឺនៅទីនេះតាមតម្រូវការជាក់ស្តែង។លោកបានសង្កត់ធ្ងន់ថា មណ្ឌលសុខភាពនឹងស្វាគមន៍បងប្អូនគ្រប់ពេលវេលា បើអ្នកទីទ័លក្រនឹងមានថ្លៃសេវាសម្រាប់ជាមធ្យោបាយវិលទៅកាន់ទីលំនៅវិញផងដែរ។
ជាកិច្ចបញ្ចប់ លោកសូមផ្តាំផ្ញើរក្រើនរំឮកដល់បងប្អូនសូមកុំជឿរពាក្យញុះញង់កុហកបោកប្រាស់របស់ក្រុមអ្នកនយោបាយដែលតែងតែភូតភរនិងបានតែត្រឹមពាក្យសន្យាខ្យល់តែប៉ុណ្ណោះនោះ។
គ្រានោះដែរ លោកក៏បានជូនវត្ថុស្សាវរីនិងជូនថវិកាមួយចំនួនជូនដល់ប្រជាពលរដ្ឋដែលបានចូលរួមក្នុងពិធីនេះនិងកាត់ខ្សែបូដើម្បីសម្ពោធនូវអគារមណ្ឌលសុខភាពចំការបីឲ្យប្រើប្រាស់តាមតម្រូវការ ៕ ណារិទ្ធ
