កំពត ៖ ទោះជា តំបន់ការពារទេសភាពឬតំបន់អភិរក្ស័សត្វក្រៀលអន្លង់ព្រីង ស្ថិតក្នុងឃុំបឹងសាលាខាងត្បូង ស្រុកកំពង់ត្រាច ខេត្តកំពតនោះ ទោះជាបច្ចុប្បន្នពុំសូវសំបូរពពួកសត្វព្រៃប្រភេទបក្សីដូចសម័យមុនបែបណាក៏ដោយ ក៏នៅតែមានស្ថាប័នពាក់ព័ន្ធបាននឹងកំពុងយកចិត្តទុកដាក់ ថែទាំអភិរក្ស័ជាប្រចាំដើម្បីអភិរក្ស័វា ហើយតំបន់ខាងលើក៏បានស្រូបទាញក្រុមអ្នកទេសចរណ៍ ដើម្បីមកទស្សនា មើលសត្វស្លាបគ្រប់ប្រភេទនៅទីនោះផងដែរ។
បើតាមការលើកឡើងពីមន្ត្រីជំនាញដែលប្រចាំនៅតំបន់ខាងលើបានអះអាងថា ជាទូទៅការគ្រប់គ្រងនិងថែរក្សាសត្វស្លាបដ៏កម្រនៅតំបន់នេះនឹងមានភាពងាយស្រួលជាងមុន ដោយសារបច្ចុប្បន្នប្រជាពលរដ្ឋរស់នៅតាមតំបន់នោះមានការយល់ដឹងខ្ពស់ពីអត្ថប្រយោជន៍របស់វា ហើយក៏យល់ច្បាស់ស្តីពីភាពចាំបាច់ក្នុងការអភិរក្ស័សត្វស្លាបដ៏កម្រ ពិសេសពួកគាត់នាំគ្នាបញ្ឈប់លើការប្រមាញ់ដោយខុសច្បាប់ ដោយបង្វែទិសមកចូលរួមសហការសម្រាប់ជួយទ្រទ្រង់ពពួកសត្វព្រៃប្រភេទបក្សីទាំងនោះឲ្យកាន់តែសំបូរនិងគង់វង្សយូរអង្វែងកុំឲ្យផុតពូជ ដើម្បីមនុស្សជំនាន់ក្រោយបានស្គាល់ពីតម្លៃរបស់សត្វព្រៃទាំងនោះផងដែរ។
មន្ត្រីខាងលើបានឲ្យដឹងទៀតថា តំបន់ការពារទេសភាពអន្លង់ព្រីងក្រៅពីអភិរក្ស័សត្វស្លាបដ៏កម្រ ក៏មានតួនាទីក្នុងការការពារក្រុមមច្ឆាជាតិគ្រប់ប្រភេទ ព្រោះតំបន់ខាងលើជាតំបន់ដីសើមដែលផ្តល់ភាពងាយស្រួលដល់ពពួកសត្វស្លាបស្វែងរកចំណី ហើយនៅរដូវវស្សាក៏ជាទីតាំងដែលមានទឹកជោរជន់សម្រាប់ផ្តល់កន្លែងឲ្យហ្វូងមច្ឆារកចំណីនិងបន្តពូជទៀតផង។
មន្ត្រីខាងលើបានបញ្ជាក់យ៉ាងដូច្នោះថា នៅតំបន់ការពារទេសភាពដែលគ្រប់គ្រងដោយមន្ទីរបរិស្ថានខេត្តកំពតនោះ គឺមានបែងខណ្ឌចែកទឹកដោយឡែកពីគ្នា ម្ខាងជាបឹងស្តុកដោយទឹកសាបនិងម្ខាងទៀតជាកន្លែងមានទឹកប្រៃ អីចឹងហើយទើបសត្វស្លាបពេលរកស៊ីចំណីឆ្អែតឆ្អន់គឺវានាំគ្នាហើរសំដៅមកផឹកទឹកសាបដែលនៅក្បែរនោះស្រាប់។
គេបានឲ្យដឹងផងដែរថា ពពួកសត្វស្លាបដែលរស់នៅតំបន់នោះគឺមានច្រើនប្រភេទស្ទើរាប់មិនអស់ដូចជា សត្វក្រៀល កុកក្រកក្បាកត្នោតខ្ចី ទិតលិត កុកគ្រោង កុកតូច កុកមធ្យម កុកធំ ក្រសារធ្នង់ ស្វាយត្រោក ទាកាបព្រៃ ទម ក្អែកទឹកតូច ក្អែកទឹកធំ សត្វត្រយ៉ង ប្រវឹក ក្លំ មាន់ទឹក ចចាតក្រឹម កដបទ្រូងស ពពិចថ្មទ្រូងត្នោត ខ្វែកត្រោក ត្រដេវវិចទួល ទៀវខៀវ ចាបក្រុក ជើងទៀន ល្វាចេក គ្រួចអិន កុកសំបកត្រពាំង លលកបូល លលកទ្រាំង និងមានពពួកសត្វស្លាបជាច្រើនទៀត។
មន្ត្រីខាងលើក៏បានបន្ថែមថា ជាមួយនឹងការអភិរក្ស័នេះដែរក្រៅពីមានការជ្រោមជ្រែងពីមន្ទីរបរិស្ថានក៏មានកិច្ចសហការដ៏ស្អិតរមួតរវាងអាជ្ញាធរពិសេសអង្គការ Bird Diversity of Anlung Pring ជាដើម។
ទោះជាបែបណាតំបន់អភិរក្ស័សត្វក្រៀលពិតជាមានកក្តាប្រឈមខ្លះៗ ដោយសារតំបន់នោះជាចំណុចពិបាកវិនិច្ឆ័យ ដោយប្រការខ្លះអាចបណ្តាលមកពីឆ្មាំការពារមានកំលាំងតិចតួចពេក។ប៉ុន្តែបើផ្អែកតាមការយល់ឃើញពីសំណាក់មហាជន គេបានសំដែងក្តីរីករាយដោយសារការបង្កើតតំបន់ការពារទេសភាពនេះឡើង ដែលជាចំណុចសំខាន់មួយជម្រុញការអភិរក្ស័សត្វស្លាបដ៏កម្រកុំឲ្យផុតពូជដែលចាត់ទុកជាធនធានធម្មជាតិបន្សល់តាំងពីយូរលង់ណាស់មកហើយ ជាពិសេសការយល់ពីសារសំខាន់របស់បក្សីដែលស្ទើផុតពូជ ដោយពួកគាត់ជួយទប់ស្កាត់មិនឲ្យមានការបរបាញ់សម្លាប់សត្វទាំងនេះទៀតហើយ។
លើសពីនេះបន្ទាប់ពីបង្កើតជាស្នាក់ការ ការពារទេសភាពនៅតំបន់អន្លង់ព្រីងមកនោះ នឹងបានអូសទាញដល់ភ្ញៀវទេសចរណ៍មកកំសានដោយគេចង់ស្គាល់នូវប្រភេទសត្វស្លាបជាច្រើនដែលកំពុងរស់រានមានជីវិតនៅទីនោះ ដោយសុខសាន្តបំផុត ៕
ណារិទ្ធ
