កំពត ៖ ផ្លូវលំក្នុងភូមិសាស្ត្រឃុំចំនួន៥ក្នុងស្រុកកំពង់ត្រាច ខេត្តកំពត ដែលកំពុងរងការខូចខាតជាច្រើនអន្លើ ត្រូវបានបើកការដ្ឋានជួសជុលឡើងវិញ នៅព្រឹកថ្ងៃទី០៧ខែឧសភា ឆ្នាំ២០១៧ ក្រោមវត្តមានដ៏ខ្ពង់ខ្ពស់ លោកចាន់ ចេស្តា អភិបាលនៃគណៈអភិបាលខេត្តកំពត អមដំណើរដោយមន្ត្រីក្រោមឱវាទ រួមនឹងអាជ្ញាធរក្នុងតំបន់គ្រប់លំដាប់ថ្នាក់។
អភិបាលនៃគណៈអភិបាលស្រុកកំពង់ត្រាច លោក អ៊ុម ស៊ីណាត បានឲ្យដឹងថា ផ្លូវលំដែលកំពុងរងការខូតខាតស្ថិតក្នុងតំបន់ឃុំចំនួន ៥ រួមមាន ៖ ឃុំបឹងសាលាខាងជើង ឃុំបឹងសាលាខាងត្បូង ឃុំអង្គសុរភី ឃុំឫស្សីស្រុកខាងកើតនិងឃុំឫស្សីស្រុកខាងលិច បច្ចុប្បន្នកំពុងរងការខូចខាត និងទ្រុឌទ្រោមជាច្រើនកន្លែង ហើយផ្លូវលំដែលកំពុងស្មុគស្មាញនិងរំខានដល់ការធ្វើដំណើរដល់មហាជននោះគឺផ្លូវលំតភ្ជាប់ពីផ្លូវជាតិលេខ១៦១ឆ្លងកាត់ឃុំបឹងសាលាខាងជើងមកទល់នឹងភូមិសាស្ត្រឃុំបឹងសាលាខាងត្បូង ហើយចំណុចផ្លូវលំនេះ ក៏ជាដងផ្លូវផ្សាភ្ជាប់ចរន្តសេដ្ឋកិច្ចដ៏សំខាន់សម្រាប់ជាមធ្យោបាយដឹកជញ្ជូនក៏ដូចជាការធ្វើដំណើររបស់ប្រជាពលរដ្ឋក្នុងតំបន់ខាងលើទៅកាន់ព្រំដែននៃប្រទេសវៀតណាម។
មានមតិសំណេះសំណាលនាព្រឹកនេះ លោកចាន់ ចេស្តា អភិបាលខេត្តកំពត បានលើកឡើងថា ក្នុងនាមអាជ្ញាធរខេត្ត ក្រោយពីបានទទួលព័ត៌មានទាក់ទិននឹងផ្លូវលំដែលកំពុងរងការខូតខាតជាច្រើនអន្លើនោះ លោកក៏បានរៀបចំគម្រោងដើម្បីធ្វើការជួសជុលកែលម្អជាបន្ទាន់ផងដែរ ប៉ុន្តែដោយសារតែបញ្ហាកញ្ចប់ថវិកា ទើបរដ្ឋបាលខេត្តមានលទ្ធភាពជួសជុលតែក្នុងរយៈចម្ងាយតែ១២គមសិន ចំពោះផ្លូវមួយចំនួនដែលនៅសេសសល់ លោកនឹងរិះរកវិធានការសម្រាប់កែលម្អជាបន្តបន្ទាប់នាពេលដ៏ខ្លីខាងមុខ។ ចំពោះការបើកការដ្ឋានផ្លូវក្នុងព្រឹកនេះ លោកក៏បានដាស់តឿនដល់ប្រជាពលរដ្ឋក្នុងតំបន់សូមកុំជឿរការញុះញង់ពីសំណាក់ក្រុមខិលខូចដែលតែងតែបំប៉ោងសភាពការណ៍និងបង្កអសន្តិសុខសង្គមពិសេសគណបក្សនយោបាយ ដោយពួកគេបានត្រឹមតែនិយាយភូតកុហកនិងសន្យាខ្យល់តែមិនបានធ្វើជាប្រយោជន៍ដល់ប្រជាពលរដ្ឋនិងសង្គមជាតិនោះឡើយ។លោកបានផ្តាំផ្ញើរទៀតថា បើមានផ្លូវល្អស្អាតហើយសូមជួយថែរក្សាឲ្យបានស្ថិតស្ថេរគង់វង្ស និងរួមគ្នាការពារទុកដូចជាទ្រព្យសម្បតិ្តរបស់យើងទាំងអស់គ្នា។
ជាមួយនឹងពិធីបើកកាេដ្ឋានជួសជុលផ្លូវនេះដែរលោកអភិបាលខេត្ត ក៏បានប្រគេននូវថវិកាដល់ព្រះចៅអធិការវត្ត អង្គជុំ ថ្មបើក មួយចំនួន សម្រាប់ជួសជុលនិងសាងសង់សមិទ្ធផលក្នុងវត្តនិងជូនថវិកាមួយចំនួនដល់ប្រជាពលរដ្ឋក្នុងពិធីនោះផងដែរ ៕
ណារិទ្ធ
