កែប ៖ ខួបអនុស្សាវរីយ៍លើកទី១៣១ទិវាពលកម្មអន្តរជាតិ១ឧសភា ២០១៧ក្រោមប្រធានបទ”ដើម្បីសន្តិភាពការងារ មុខរបរ និងអភិវឌ្ឍន៍” ត្រូវបានប្រារព្វនៅរសៀលថ្ងៃទី០៥ខែឧសភា ឆ្នាំ២០១៧ក្រោមវត្តមាន លោកកែន សត្ថា អភិបាលនៃគណៈអភិបាលខេត្តកែបអមដំណើរដោយមន្ត្រីក្រោមឱវាទ ព្រមទាំងមានការចូលរួមពីសំណាក់អស់លោកជាប្រធាន អនុប្រធាន មន្ទីរ អង្គភាពជំនាញ មានទាំងអាជីវករ កម្មករ និយោជិត និងអាជ្ញាធរគ្រប់លំដាប់ថ្នាក់ផងដែរ។
លោកឌិត ឡាយហ៊ាក ប្រធានមន្ទីរការងារនិងបណ្តុះបណ្តាលវិជ្ជាជីវៈខេត្តកែប បានឲ្យដឹងថា ទិវាពលកម្មអន្តរជាតិ ១ឧសភាគឺជាព្រឹត្តិការណ៍ប្រវតិ្តសាស្ត្រនៃចលនាកម្មករអន្តរជាតិដែលចាប់ផ្តើមនាឆ្នាំ១៨៨៦ក្នុងគោលបំណងធ្វើឲ្យប្រសើរឡើងនូវស្ថានភាពនៃលក្ខខណ្ឌការងារនិងជីវភាពរស់នៅរបស់ប្រជាពលករ ។ នៅសតវត្សទី១៩ពលករ កម្មករ នៅបណ្តាប្រទេសមួយចំនួនក្រោមការដឹកនាំត្រួតត្រារបស់ពួកថៅកែនៅប្រទេសអាមេរិក ដោយពលករ កម្មករ ត្រូវរងការជិះជាន់សង្កត់សង្កិនយ៉ាងធ្ងន់ធ្ងរ ហើយកម្មករត្រូវបង្ខំឲ្យធ្វើការ១០ម៉ោងទៅ១២ម៉ោងក្នុង១ថ្ងៃនិងមានថ្ងៃខ្លះធ្វើការរហូតដល់ទៅ១៦ម៉ោងគឺគ្មានពេលសម្រាក គ្មានការរៀនសូត្រឬលម្ហែកម្សាន្តឡើយ ថែមទាំងពួកគេទទួលបានប្រាក់កម្រៃយ៉ាងទាបមិនគ្រប់គ្រាន់ក្នុងជីវភាពរស់នៅធ្វើឲ្យការរស់នៅជួបភាពលំបាក វេទនាជាទីបំផុត ។ លើសពីនេះ មានពេលខ្លះត្រូវថៅកែវាយធ្វើបាបយ៉ាងព្រៃផ្សៃទៀតផង។ដោយសារតែរងនូវអំពើជិះជាន់សង្កត់សង្កិនទាំងនេះ ទើបមានការរើបម្រះធ្វើការតស៊ូជាបន្តបន្ទាប់ពីទ្រង់ទ្រាយតូចរហូតក្លាយជាកំលាំងតស៊ូទ្រង់ទ្រាយធំ តាមរយៈអង្គការចាត់តាំងជាសមាគមន៍កម្មករ”សហជីព”ដើម្បីទាមទារឲ្យបន្ថយម៉ោងធ្វើការនិងទាមទារការតម្លើងប្រាក់បៀវត្ស ។
លោកបានឲ្យដឹងទៀតថា ចំពោះថ្ងៃទី១ខែឧសភា ឆ្នាំ១៨៨៦ដដែលនោះគឺជាការតស៊ូរបស់កម្មករចំនួន១២.៥០០នាក់នៅទីកន្លែងធ្វើការតែម្តងដោយដណ្តើមបានជ័យជំនះពីលក្ខខណ្ឌការងារគឺ១ថ្ងៃតែ៨ម៉ោង ទើបគេបានកំណត់យកថ្ងៃទី១ឧសភាសម្រាប់រក្សាទុកជាថ្ងៃអនុស្សាវរីយ៍ប្រវតិ្តសាស្ត្រប្រពៃណីសាមគ្គី តស៊ូរបស់កម្មករលើសកលលោករហូតមកទល់បច្ចុប្បន្ន។
ថ្លែងសំណេះសំណាលនាឱកាសនោះ លោកកែន សត្ថា អភិបាលខេត្តកែប ក៏បានលើកនូវសារលិខិតរបស់សម្តេចនាយករដ្ឋមន្ត្រី ហ៊ុន សែន ដោយមានអត្ថន័យថា នៅក្នុងព្រះរាជាណាចក្រកម្ពុជាយើង ទិវាពលកម្មអន្តរជាតិ ថ្ងៃទី១ ខែឧសភា ត្រូវបានប្រារព្វឡើងជារៀងរាល់ឆ្នាំ ចាប់តាំងពីថ្ងៃរំដោះពីរបបប្រល័យពូជសាសន៍ថ្ងៃ៧មករា ឆ្នាំ១៩៧៩រហូតមក។លើសពីនេះរាជរដ្ឋាភិបាលកម្ពុជាក៏បានកំណត់យកជាថ្ងៃឈប់សម្រាករបស់មន្ត្រីរាជការ និងកម្មករនិយោជិតផងដែរ ។
ទន្ទឹមនឹងនេះ ក្នុងនាមជាសមាជិកអង្គការអន្តរជាតិខាងការងារ យើងមានមោទនភាពណាស់ ដោយកន្លងមកកម្ពុជាផ្តល់សច្ចាប័នលើអនុសញ្ញាអន្តរជាតិខាងការងារចំនួន១៣រួចហើយ ក្នុងនោះមានអនុសញ្ញាស្នូលទាំង៨ទៀតផង ដែលនេះជាកក្តាមូលដ្ឋានក្នុងការអនុវត្តសិទ្ធិរបស់កម្មករនិយោជិតហើយដែលកម្ពុជាក៏ជាប្រទេសមួយដែលបានអនុវត្តតាមបទដ្ឋានអន្តរជាតិខាងការងារដ៏ខ្ជាប់ខ្ជួន ជាពិសេសព្រះរាជាណាចក្រកម្ពុជាក្នុងឆ្នាំ២០១៤ត្រូវបានបោះឆ្នោតជាសមាជិកពេញសិទ្ធិនៃក្រុមប្រឹក្សាភិបាលអង្គការអន្តរជាតិខាងការងារ(ILO)សម្រាប់អាណតិ្តឆ្នាំ២០១៤-២០១៧ជាលើកដំបូងក្នុងប្រវត្តសាស្ត្រផងដែរ ។
ក្នុងនោះរាជរដ្ឋាភិបាលបានដាក់ចេញនិងអនុវត្តដោយជោគជ័យនូវយុទ្ធសាស្ត្រចតុកោណដំណាក់កាលទី១និងទី២និងបានបន្តដាក់ចេញយុទ្ធសាស្ត្រចតុកោណដំណាក់កាលទី៣ដើម្បីកំណើនការងារ សមធម៌និងប្រសិទ្ធភាពនៅកម្ពុជា សម្រាប់រាជរដ្ឋាភិបាលនីតិកាលទី៥នៃរដ្ឋសភា ដោយផ្តោតការយកចិត្តទុកដាក់យ៉ាងខ្លាំងលើកំណែទម្រង់លើគ្រប់វិស័យ ឆ្ពោះទៅកាន់ភាពរីកចម្រើនពីមួយថ្ងៃទៅមួយថ្ងៃ ៕
ណារិទ្ធ
