ខេត្តបន្ទាយមានជ័យ ៖ ព្រឹកថ្ងៃទី២ ខែឧសភា ឆ្នាំ២០១៧នេះ នៅសាលប្រជុំសាលាខេត្តបន្ទាយមានជ័យបានប្រារព្វទិវាពិភពលោកកាកបាទក្រហម អឌ្ឍចន្ទក្រហម៨ឧសភាឆ្នាំ២០១៧ ក្រោមប្រធានបទកាកបាទក្រហមកម្ពុជាមានគ្រប់ទីកន្លែងសម្រាប់គ្រប់ៗគ្នា ហើយក្នុងនោះសប្បុរសជនក្នុងខេត្តបន្ទាយមានជ័យបានចូលរួមឧប្ថម្ភថវិកាដល់កាកបាទក្រហមមានសរុបចំនួនជិត១០០.០០០ដុល្លា ។
ពិធីនេះមានការអញ្ជើញចូលរួមលោកជំទាវ ម៉ៅ ម៉ាល័យ កែ គឹនយ៉ាន ប្រធានកិត្តិយសសមាគមន៍នារីកម្ពុជាដើម្បីសន្តិភាពនិងអភិវឌ្ឍ ឯកឧត្តម សួន បវរអភិបាលខេត្តបន្ទាយមានជ័យ ឯកឧត្តម លី សារីអភិបាលរងខេត្តបន្ទាយមានជ័យនិងជាប្រធានសាខាកាកបាទក្រហមកម្ពុជាខេត្តបន្ទាយមានជ័យ លោកជំទាវ សុង ផល្លីន ភរិយា ឯកឧត្តមអភិបាលខេត្ត មានមន្ត្រីជាន់ខ្ពស់ និងអាជីវករជាច្រើននាក់ទៀតបានចូលរួមផងដែរ។
ក្នុងនោះឯកឧត្តម សួន បវរ បានមានប្រសាសន៍ថា ការបង្កើតកាកបាទក្រហមកម្ពុជានេះឡើង ដែលមានលោកជំទាវ ប៊ុន រ៉ានី ហ៊ុន សែន ជាប្រធានកាកបាទក្រហមកម្ពុជា ដើម្បីសម្រាលការលំបាក និងជួយអ្នកងាយរងគ្រោះគ្រប់ប្រទេភនិងគ្រប់ទីកន្លែងជួយកាត់បន្ថយភាពក្រីក្រ និងជួយការពារសេចក្តីថ្លៃថ្នូរបស់ជនងាយរងគ្រោះនិងលើកកំពស់តម្លៃមនុស្សធម៌របស់មនុស្សជាតិតាមរយៈវិស័យស្នូលការងារធំៗចំនួន៤គឺ ១វិស័យគ្រប់គ្រងគ្រោះមហន្តរាយ ២ វិស័យថែទាំសុខភាពក្នុងសគមន៍ ៣ វិស័យលើកកំពស់គោលការណ៍គ្រិះនិងតម្លៃមនុស្សធម៌៤ វិស័យអភិវឌ្ឍស្ថាប័ននិងការអភិវឌ្ឍធនធាន ។
ឯកឧត្តម សួន បវរ បានបញ្ជាក់ទៀតថាក្នុងរយៈពេល១២ខែកន្លងមកនេះ សាខាកាកបាទក្រហមកម្ពុជាខេត្តបន្ទាយមានជ័យបានធ្វើការចែកអំណោយមនុស្សធម៌ជូនដល់ប្រជាពលរដ្ឋ
ងាយរងគ្រោះសរុបចំនួន៣.៩០៦គ្រួសារក្នុងនោះថ្នាក់កណ្តាលកាកបាទក្រហមកម្ពុជាបានជួយចំនួន៨០៤គ្រួសារជួយប្រជាពលរដ្ឋដោយគ្រោះថ្នាក់ ខ្យល់កន្ត្រាក់ អគ្គីភ័យ ផ្ទុះម៉ីន រន្ទះបាញ់ និងគ្រោះរាំងស្ងួតសរុបមានចំនួន១.០៧៨គ្រួសារ គ្រួសារទីទាល់ក្រនិងចាស់ជរាគ្មានទីពឹងសរុបចំនួន៥១៥គ្រួសារ និងជំនួយសុខមាលភាពសង្គម មានអ្នកផ្ទុកមេរោគអេដស៍ គ្រោះថ្នាក់ចរាចរណ៍ និងផ្សេងៗទៀត ។
ឯកឧត្តម សួន បវរ បានបញ្ជាក់ទៀតថា កាកបាទក្រហមកម្ពុជាខេត្តបន្ទាយមានជ័យ ចាប់ពីត្រីមាសទី២ឆ្នាំ២០១៦ដល់ត្រីមាសទី១ឆ្នាំ២០១៧នេះរកចំណូលបានមកពីសប្បុរសជនចំនួន១២២,០២៥.០៩ដុល្លាចំណាយសរុបចំនួន៩៧.១៩៨.៣១ដុល្លាក្នុងនោះបានចំណាយលើគ្រោះមហន្តរាយ ការថែទាំសុខភាពសហគមន៍លើកកំពស់តំលៃមនុស្សធម៌ អភិវឌ្ឍធនធានមនុស្ស រដ្ឋបាលនិងការគ្រប់គ្រង និងក្រៅផែនការគ្រោងទុកជាដើម។ឯកឧត្តម សួន បវរ បានបញ្ជាក់ទៀតថា កាកបាទក្រហម អឌ្ឍចន្ទក្រហមមានចំណុច៧ប្រការដើម្បីយកមកអនុវត្ត ភាពមនុស្សធម៌ ភាពមិនលំអៀង ភាពអព្យាក្រឹតភាព ឯករាជភាព សេវាកម្មស្ម្រ័គចិត្ត ឯកភាព និងសកលភាពជាដើម៕
