កែប ៖ យុទ្ធនាការផ្តល់ថ្នាំបង្ការជំងឺកញ្ច្រឹលនិងស្អូច ត្រូវបានអនុវត្តនាព្រឹកថ្ងៃទី០២ខែឧសភា ឆ្នាំ២០១៧នេះក្រោមការអញ្ជើញចូលរួមដ៏សកម្មពីសំណាក់លោកកែន សត្ថា អភិបាលខេត្តកែបហែរហមដោយមន្ត្រីក្រោមឧវាទជាច្រើនរូប។
ពិធីនេះបានធ្វើឡើងនៅមណ្ឌលសុខភាពអូរក្រសា សម្រាប់ជួយបង្ការទប់ស្កាត់រាល់ការរាតត្បាតជំងឺកញ្ច្រឹល-ស្អូចដល់កុមារ។
លោកម៉ែន សុធីរ ប្រធានមន្ទីរសុខាភិបាលខេត្តកែប បានឲ្យដឹងថា ក្នុងអំឡុងពេលយុទ្ធនាការផ្តល់បន្ថែមថ្នាំបង្កាជំងឺកញ្ច្រឹល-ស្អូចនេះគ្រប់មណ្ឌលសុខភាព/ប៉ុស្តិ៍សុខភាពនឹងផ្តល់វ៉ាក់សាំងកញ្ច្រឹល-ស្អូចដល់កុមាររៀងរាល់ថ្ងៃពីម៉ោង៧ព្រឹកដល់ម៉ោង៥ល្ងាច។ការផ្តល់ថ្នាំបង្កាមណ្ឌលសុខភាព/ប៉ុស្តិសុខភាពនៅតែបើកផ្តល់វ៉ាក់សាំងដ៏ទៃទៀតដូចធម្មតាហើយកុមារភាគច្រើននឹងត្រូវបានគ្របដណ្តប់តាមរយៈយុទ្ធសាស្ត្រនេះ ។ គ្រប់ភូមិនឹងមានយ៉ាងហោចណាស់មួយទិវាផ្តល់ថ្នាំបង្ការ ដែលចាប់បើកពីម៉ោង៧ព្រឹកដល់ម៉ោង៥ល្ងាច ដោយក្រុមផ្តល់ថ្នាំបង្ការនេះ បានធ្វើសកម្មភាពផ្តល់ថ្នាំបង្ការនៅនឹងទីតាំងប៉ុស្តិផ្តល់ថ្នាំបង្ការ នៅពេលព្រឹក និងដើរតាមផ្ទះនៅពេលរសៀល ដើម្បីស្វែងរកកុមារដដែលខកខានមិនបានទទួលវ៉ាក់សាំងនៅក្នុងតំបន់នោះ ។ ការផ្តល់វ៉ាក់សាំងគឺអនុវត្តរយៈពេល១០ថ្ងៃ ចាប់ពីក្មេងមានអាយុ៦ខែ ដល់៥៩ខែ គឺត្រូវតែទទួលថ្នាំបង្ការទាំងអស់ ទោះជានៅក្នុងកាលៈទេសៈណាក៏ដោយគឺផ្តល់គ្រប់ទិសទី ។ និងការចាំបាច់បំផុតនៅគ្រប់ស្រុកប្រតិបតិ្ត/មណ្ឌលសុខភាពត្រូវតែមានក្រុមបន្ថែម/ក្រុមចល័តសម្រាប់ជំនួយដល់ការផ្តល់ថ្នាំបង្ការនៅកន្លែងស្មុគស្មាញផងដែរ។
ឆ្លើយតបនឹងតម្រូវដ៏ចាំបាច់នេះ លោកកែន សត្ថា អភិបាលខេត្តកែប បានលើកជាប្រយោគយ៉ាងសំខាន់ថា ការផ្តល់បន្ថែមនូវថ្នាំបង្ការជំងឺកញ្ច្រឹល-ស្អូចនេះពិតជាមានសារៈសំខាន់ ពិសេសជួយទ្រទ្រង់ជីវិតកុមារនិងថែទាំសុខភាពដល់កុមារនៅគ្រប់តំបន់ហើយទិវានេះនឹងត្រូវអនុវត្តរយៈពេល១០ថ្ងៃដោយគិតចាប់ផ្តើមពីថ្ងៃទី០២ខែឧសភាឆ្នាំ២០១៧នេះតទៅ ។
លោកបានបញ្ជាក់ថា រាល់សកម្មភាពផ្តល់វ៉ាក់សាំងបង្កាជំងឺកញ្ច្រឹល-ស្អូចនេះក្រុមការងារក្រៅពីអនុវត្តនៅតាមស្រុកប្រតិបតិ្តឬមណ្ឌលសុខភាពនិងតាមប៉ុស្តិសុខភាពគឺក្រុមការងារនឹងចុះទៅដល់តាមភូមិ ឃុំ ដែលបងប្អូនរស់នៅតែម្តង ដើម្បីផ្តល់ថ្នាំបង្ការជូនកុមារដែលមិនទាន់បានទទួលវ៉ាក់សាំងនេះ ។ លោកអភិបាលខេត្តក៏បានក្រើនរំឭកអាណាព្យាបាលក្មេងទាំងអស់កុំធ្វេសប្រហែស គឺត្រូវតែនាំពួកគេមកទទួលវ៉ាក់សាំងបង្កាជំងឺកញ្ច្រឹល-ស្អូចឲ្យបានគ្រប់ៗគ្នា នេះសម្រាប់សុខភាពនិងសុខមាលភាពរបស់កុមារ ដែលយើងត្រូវយកចិត្តទុកដាក់លើកុមារនិងបុត្រ-បុត្រធីតារបស់យើង ។
ក្នុងនោះដែរ លោកក៏សូមថ្លែងអំណរគុណដល់លោកស្រី តំណាងឲ្យអង្គការសុខភាពពិភពលោកដែលមានវត្តមានក្នុងទិវាផ្តល់ថ្នាំបង្កា ព្រមទាំងជួយជ្រោមជ្រែងគ្រប់សកម្មភាព ពិសេសកិច្ចសហការយ៉ាងស្អិតរមួត រវាងរាជរដ្ឋាភិបាលកម្ពុជាផងដែរ ៕
ណារិទ្ធ
