(បន្ទាយមានជ័យ)៖ នៅព្រឹកថ្ងៃទី០៣ មេសា នាយឧត្ដមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ បានដឹកនាំប្រតិភូចុះសួរសុខទុក្ខកងទ័ពនៅតំបន់ព្រំដែន ទិសទី១ ក្នុងខេត្តបន្ទាយមានជ័យ ដើម្បីអបអរសាទរពិធីបុណ្យចូលឆ្នាំថ្មីប្រពៃណីខ្មែរ។

ក្នុងមតិសំណេះសំណាល នាយឧត្ដមសេនីយ៍ វង្ស ពិសេន តំណាងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានវាយតម្លៃខ្ពស់ចំពោះស្មារតីលះបង់របស់ថ្នាក់ដឹកនាំ នាយទាហាន នាយទាហានរង និងពលទាហាន ឈរជើងនៅទិសទី១ ខេត្តបន្ទាយមានជ័យ ក្នុងកិច្ចខិតខំអនុវត្តភារកិច្ចការពារបូរណភាពទឹកដី។

នាយឧត្តមសេនីយ៍ វង្ស ពិសេន បានបង្ហាញពីអត្ថន័យដ៏ជ្រាលជ្រៅ និងសារៈសំខាន់បំផុតនៃពាក្យថា “អរគុណសន្តិភាព! អរគុណនយោបាយ ឈ្នះ ឈ្នះ! ដឹងគុណស្ថាបនិក មគ្គុទ្ទេសក៏ឯក និងប្រតិបត្តិករនយោបាយឈ្នះ ឈ្នះ ដែលនាំមកនូវសន្តិភាព និងការឯកភាពជាតិពេញលេញ“។

“សន្តិភាព និងស្ថិរភាពនយោបាយ គឺជាមូលដ្ឋានគ្រឹះសម្រាប់ការអភិវឌ្ឍ និងការរស់នៅប្រកបដោយភាពសុខក្សេមក្សាន្តរបស់ប្រជាជន។ ដូច្នេះកងកម្លាំងត្រូវតែថែរក្សាការពារឲ្យបានគត់មត់ មិនអនុញ្ញាតឲ្យកម្លាំងណាមួយមកបំផ្លាញបានឡើយ“ ។ នេះជាការបញ្ជាក់របស់ នាយឧត្តមសេនីយ៍ វង្ស ពិសេន ។

ពាក់ព័ន្ធដល់ស្ថានកសរណ៍បច្ចុប្បន្ន នាយឧត្តមសេនីយ៍ វង្ស ពិសេន បានលើកឡើងពីវិបត្តិធ្ងន់ធ្ងរនៃជំងឺរាតល្បាតសាកលកូវីដ-១៩ ដែលធ្វើឱ្យប៉ះពាល់ដល់សុខមាលភាព អាយុជីវិត និងសេដ្ឋកិច្ចជាតិ ។ ប្រឈមបញ្ហានេះ រាជរដ្ឋាភិបាលក្រោមការដឹកនាំរបស់សម្តេចតេជោ ហ៊ុន សែន បានដាក់ចេញយុទ្ធវីធី និងយុទ្ធសាស្ត្រទាន់ហេតុការណ៏ ពិសេសការស្វែងរកវ៉ាក់សាំងជូនដោយឥតគិតថ្លៃ និងការពារបានអាយុជីវិតប្រជាពលរដ្ឋពីជំងឺដ៏កាចសាហាវនេះ។

នៅចុងបញ្ចប់ នាយឧត្តមសេនីយ៍អគ្គមេបញ្ជាការ បានផ្តាំផ្ញើដល់កងកម្លាំងទាំងអស់ ត្រូវគោរពឲ្យបានម៉ឺងម៉ាត់រាល់បទបញ្ជា និងស្មារតីទទួលខុសត្រូវតួនាទីភារកិច្ចការពារខ្សែបន្ទាត់ព្រំដែននៃមាតុភូមិ តាមគោលនយោបាយដឹកនាំរបស់រាជរដ្ឋាភិបាល ក្នុងនោះត្រូវមានទំនាក់ទំនងល្អជាមួយប្រទេសជិតខាង ដើម្បីប្រែក្លាយតំបន់ព្រំដែនជាតំបន់សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ៕