ខេត្តបន្ទាយមានជ័យ៖មានករណីអគ្គីភ័យឆាបឆេះមួយបានកើតឡើងនៅវេលាម៉ោង ០៤នឹង៣៥នាទីល្ងាចនៅថ្ងៃអាទិត្យ ២កើត ខែចេត្រ ឆ្នាំឆ្លូវ ត្រីស័ក ព.ស.២៥៦៥ ត្រូវនឹង ថ្ងៃទី០៣ ខែមេសា ឆ្នាំ២០២២នេះអាជ្ញាធរក្រុងប៉ោយប៉ែតនិងកងកម្លាំងពន្លត់អគ្គីភ័យក្រោយទទួលព័ត៌មានពីកន្លែងកើតហេតុភ្លាម លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានដឹកនាំក្រុមការងាររដ្ឋបាលក្រុងប៉ោយប៉ែត សហការជាមួយកម្លាំងសមត្ថកិច្ចនគរបាលក្រុងប៉ោយប៉ែត ដឹកនាំដោយលោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត ចុះអន្តរាគមន៍ជួយពន្លត់អគ្គីភ័យដែលបានឆាបឆេះបន្ទប់មួយក្នុងអគារនាគទិព្វ១ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ដោយកិច្ចសហការល្អគ្រប់ភាគីពាក់ព័ន្ធ និងកិច្ចអន្តរាគមន៍បានទាន់ពេលវេលា ជាលទ្ធផល ក្រុមការងារពន្លត់អគ្គីភ័យដឹកនាំដោយផ្ទាល់ពីសំណាកលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងជាប្រធានគណៈបញ្ជាការឯកភាពក្រុង បានធ្វើការពន្លត់បានទាន់ពេលវេលា និងមិនបណ្តាលឱ្យមានអ្នករងរបួស និងបាត់បង់ជីវិតឡើយ។
ក្នុងកិច្ចអន្តរាគមន៍ពន្លត់អគ្គីភ័យនេះ មានវត្តមានចុះផ្ទាល់ពីសំណាកលោក តាន់ គឹមរិទ្ធ សមាជិកក្រុមប្រឹក្សាក្រុងប៉ោយប៉ែត, លោក ខាត់ ធា នាយករងរដ្ឋបាលក្រុងប៉ោយប៉ែត ព្រមទាំងក្រុមការងារសមត្ថកិច្ចពន្លត់អគ្គីភ័យនៃអធិការដ្ឋាននគរបាលក្រុងប៉ោយប៉ែត, មូលដ្ឋានកងរាជអាវុធហត្ថក្រុងប៉ោយប៉ែត រួមនឹងកម្លាំងប្រជាការពារភូមិជាច្រើននាក់បានចូលរួម ។
កិច្ចអន្តរាគមន៍ពន្លត់អគ្គីភ័យនេះ បានប្រើប្រាស់ឡានទឹករបស់អធិការដ្ឋាននគរបាលបាលក្រុងប៉ោយប៉ែត, ឡានទឹករបស់មូលដ្ឋានកងរាជអាវុធហត្ថក្រុងប៉ោយប៉ែត និងឡានទឹកកាស៊ីណូ ត្រូពីកាណា ក្នុងកិច្ចចូលរួមជួយអន្តរាគមន៍នៅកន្លែងកើតហេតុផ្ទាល់ផងដែរ៕
ដោយ៖លោកចាន់ពុធ
