លោក ឃួង ស្រេង ណែនាំដល់គណៈកម្មាធិការគណបក្សខណ្ឌព្រែកព្នៅ និងក្រុមការងារត្រូវយកចិត្តទុកដាក់ថែរក្សា លើកទឹកចិត្ត សមាជិកគណបក្ស ដើម្បីឈានឆ្ពោះទៅយកជ័យជម្នះក្នុងការបោះឆ្នោតក្រុមប្រឹក្សាសង្កាត់

(ភ្នំពេញ)៖ លោក ឃួង ស្រេង ប្រធានគណៈកម្មាធិការគណបក្សប្រជាជាជនកម្ពុជារាជធានីភ្នំពេញ និងជាប្រធានក្រុមការងារចុះជួយខណ្ឌព្រែកព្នៅ បានណែនាំដល់ប្រធានគណៈកម្មាធិការគណបក្សប្រជាជនកម្ពុជាខណ្ឌ សង្កាត់ និងក្រុមការងារបក្សចុះជួយខណ្ឌព្រែកព្នៅត្រូវបន្តយកចិត្តទុកដាក់ថែរក្សា និងលើកទឹកចិត្តសមាជិកគណបក្សប្រជាជនកម្ពុជា ដោយត្រូវជួយទំនុកបំរុងទាំងសម្ភារៈ និងស្មារតី សំដៅធ្វើយ៉ាងណាឲ្យបក្សប្រជាជនកម្ពុជាទទួលបាននូវភាពជោគជ័យក្នុងការបោះឆ្នោតក្រុមប្រឹក្សាសង្កាត់អាណត្តិទី៥ ឆ្នាំ២០២២ នៅពេលខាងមុខនេះ។

ការណែនាំបែបនេះរបស់លោក ឃួង ស្រេង បានធ្វើឡើង នៅព្រឹកថ្ងៃទី២ ខែមេសា ឆ្នាំ២០២២នេះ នៅក្នុងកិច្ចប្រជុំក្រុមការងារគណបក្សចុះជួយមូលដ្ឋានខណ្ឌព្រែកព្នៅប្រចាំខែមីនា និងទិសដៅខែមេសា ឆ្នាំ២០២២ នៅទីស្នាក់ការគណបក្សប្រជាជនកម្ពុជាខណ្ឌព្រែកព្នៅ។

លោក ឃួង ស្រេង បានបន្តថា ក្នុងនាមប្រធានគណៈកម្មាធិការគណបក្សប្រជាជនកម្ពុជាខណ្ឌព្រែកព្នៅ សង្កាត់ទាំង៥ និងក្រុមការងារបក្សចុះជួយខណ្ឌព្រែកព្នៅទាំងអស់ ត្រូវយកចិត្តទុកដាក់ថែរក្សា លើកទឹកចិត្តសមាជិកគណបក្សប្រជាជនកម្ពុជាឲ្យបានល្អប្រសើរ ដោយត្រូវជួយទំនុកបំរុងទាំងសម្ភារៈ និងស្មារតី ធ្វើយ៉ាងណាឲ្យការបោះឆ្នោតក្រុមប្រឹក្សាសង្កាត់អាណត្តិទី៥នេះ ទទួលបាននូវភាពជោគជ័យ។

លោកបន្តថា ក្នុងនាមសមាជិក សមាជិកាគណបក្សប្រជាជនកម្ពុជាត្រូវធ្វើចុះសួរសុខទុក្ខ និងចលនាប្រជាពលរដ្ឋនៅក្នុងមូលដ្ឋានឲ្យបានជាប់ជាប្រចាំ ធ្វើយ៉ាងណាឲ្យពួកគាត់ស្រឡាញ់ពេញចិត្តជាមួយនឹងគណបក្សប្រជាជនកម្ពុជា ឈានទៅបោះឆ្នោតគាំទ្រគណបក្សប្រជាជនកម្ពុជា។

បន្ថែមពីលើនេះទៀតនោះ លោក ឃួង ស្រេង ក៏បានណែនាំឲ្យមន្ត្រីរបស់បក្សដែលចុះសួរសុខទុក្ខប្រជាពលរដ្ឋនៅក្នុងមូលដ្ឋានរបស់ខ្លួន ត្រូវប្រាប់ពួកគាត់ពីគោលបំណងល្អៗរបស់បក្ស ហើយបើពួកគាត់មានជីវភាពខ្វះខាត ពួកគាត់អាចទៅរកនៅទីស្នាក់ការគណបក្សប្រជាជនកម្ពុជានៅតាមសង្កាត់ នោះគណបក្សសង្កាត់នឹងជួយពួកគាត់ ដោយមិនទុកឱ្យស្លាប់ដោយការអត់ឃ្លាននោះទេ។

ចំណែក លោក សុខ សម្បត្តិ ប្រធានគណបក្សប្រជាជនកម្ពុជាខណ្ឌព្រែកព្នៅ បានលើកឡើងទៀតថា គណៈអចិន្ត្រៃយ៍គណៈកម្មាធិការគណបក្សប្រជាជនកម្ពុជាខណ្ឌព្រែកព្នៅ បានត្រៀមលក្ខណៈការងារឆ្ពោះទៅកាន់ការបោះឆ្នោតក្រុមប្រឹក្សាសង្កាត់អាណត្តិទី៥រួចរាល់ហើយ ហើយចំពោះការរៀបចំបេក្ខភាពក្រុមប្រឹក្សាសង្កាត់អាណត្តិទី៥នេះ គណៈអចិន្ត្រៃយ៍គណៈកម្មាធិការគណបក្សប្រជាជនកម្ពុជាខណ្ឌព្រែកព្នៅ ក៏បានរៀបចំបញ្ជីបេក្ខភាពក្រុមប្រឹក្សាសង្កាត់អាណត្តិទី៥ ទៅដាក់នៅគណៈកម្មការរៀបចំបោះឆ្នោតឃុំ-សង្កាត់ (CEC) បានរួចរាល់ជាស្ថារពរហើយដែរ ដោយពុំមានពាក្យបណ្តឹងតវ៉ានោះឡើយ៕