ខេត្តប៉ៃលិន ៖ យ៉ាងហោចណាស់ ក៏មានពលរដ្ឋខ្មែរ២នាក់ ក្នុងចំណោម៥នាក់ ត្រូវ បានកម្លាំងអភិរក្សការពារព្រៃឈើរបស់ថៃ ចាប់ឃាត់ខ្លួនបញ្ជូនទៅតុលាការ ខេត្តចាន់បូរី ខណៈពួកគេទាំងនោះ តែងតែលួចឆ្លងដែនទៅកាប់ឈើប្រណីតនៅទីនោះ ។
ហេតុការណ៍សមត្ថកិច្ចថៃ ចាប់ឃាត់ខ្លួនពលរដ្ឋខ្មែរនេះ បានកើតឡើងនៅវេលាម៉ោ ង៩ និង០០នាទីយប់ថ្ងៃទី២២ ខែមេសា ឆ្នាំ២០១៧ ស្ថិតនៅភូមិបាកាត ឃុំខ្លងយ៉ៃ ស្រុកពោ ងណាំរ៉ន ខេត្តចាន់បូរី ប្រទេសថៃ ហើយត្រូវបានគេបញ្ជូនទៅតុលាការនៅឯខេត្តចាន់បូរី នៅវេលាម៉ោង១០ និង០០នាទី ថ្ងៃទី២៤ ខែមេសា ឆ្នាំ២០១៧នេះ ។
ប្រភពព័ត៌ពីលោក ឧត្តមសេនីយ៍ត្រី ទី សុខា ប្រធានទំនាក់ទំនងព្រំដែនកម្ពុជាថៃ ច្រកទ្វារអន្តរជាតិព្រំ បានឱ្យដឹងថា ពលរដ្ឋខ្មែរទាំងពីរនាក់ ដែលត្រូវថៃឃាត់ខ្លួននោះមាន ទី១. ឈ្មោះ កង មិង ភេទប្រុស អាយុ៣១ឆ្នាំ រស់នៅភូមិបហ៊ុយត្បូង សង្កាត់បយ៉ាខា ក្រុងប៉ៃលិន ទី២. ឈ្មោះ ឆាយ ទុយហៀង ភេទប្រុស អាយុ២៩ឆ្នាំ រស់នៅភូមិបុស្អំ ឃុំស្ទឹងកាច់ ស្រុកសាលាក្រៅ ។
ប្រភពបន្តទៀតថា ពាក់ព័ន្ធទៅនឹងបញ្ហានេះ លោកបានចាត់ឱ្យកងកម្លាំងរបស់ខ្លួន ចូលទៅក្នុងទឹកដី ខេត្តចាន់បូរី ដើម្បីចរចាជាមួយភាគីថៃហើយ ដោយខាងក្រសួងបរិស្ថានថៃ ជាអ្នកចាប់ ហើយមានការលំបាកក្នុងការសុំដោះលែងឱ្យមកខ្មែរវិញណាស់ ព្រោះនៅចំណុចខាងលើនេះ គេតែងតែចាប់ពលរដ្ឋខ្មែរ ដោយក្នុងនោះក៏មាននគរបាលការពារព្រំដែនមួយរូបផងដែរ ដោយបានសុំឱ្យគេដោះលែងចំនួន៦ដងមកហើយ ។ បើសិនជាទាហា នថៃចាប់វិញ យើងមានកិច្ចសន្យា អាចទំនាក់ទំនងនិយាយគ្នាស្រួល ។ ម្យ៉ាងវិញទៀតពល រដ្ឋខ្មែរ ដែលតែងតែឆ្លងដែនខុសច្បាប់ទៅលួចកាប់ឈើរបស់គេនោះគឺនៅក្នុងដែនអភិរក្សរបស់ស្តេចថៃ សូម្បីតែជនជាតិថៃផ្ទាល់ក៏មិនហ៊ានប៉ះពាល់ព្រៃឈើនោះដែរ កុំថាឡើយទៅកាប់ឈើប្រណីតបែបនោះ សូម្បីតែកាច់មែកតូចមួយក៏មិនបានផង ។
លោកបានបញ្ជាក់ថា ប្រជាពលរដ្ឋ ដែលឆ្លងដែនខុសច្បាប់ចូលទៅកាប់ឈើនៅឯប្រទេសថៃចន្លោះបង្គោលសីមា លេខ៦៧,៦៨ និង៦៩នេះ មិនមែនចេះបំបាំងកាយនោះទេ ដោយមានការឃុបឃិតរវាងសមត្ថកិច្ចនគរបានការពារព្រំដែនទាំងនោះ ជាមួយឈ្មួញរក ស៊ីឈើផងដែរ ។ កន្លងមក ដោយសារមានកិច្ចសហការសម្របសម្រួលគ្នារវាងឯកឧត្តម អ៊ី ឈាន អតីអភិបាលខេត្តប៉ៃលិន ជាមួយនឹងអាជ្ញាធរថៃ សុំកុំឱ្យមានការបាញ់សម្លាប់ ពល រដ្ឋខ្មែរ ដែលលួចឆ្លងដែន ទៅប្រទេសថៃ ទើបពេលគេចាប់បានគ្រាន់តែបញ្ជូនត្រឡប់មកខ្មែរវិញប៉ុណ្ណោះ ។ ចំណែកនៅខេត្តផ្សេងៗ ពេលទាហានថៃ ឃើញខ្មែរឆ្លងដែនទៅទីនោះ បានដេញបាញ់សម្លាប់យ៉ាងព្រៃផ្សៃ បណ្តាលឱ្យរងរបួស និងស្លាប់ជាច្រើននាក់ផងដែរ ។
សូមបញ្ជាក់ កន្លងមកមានប្រជាពលរដ្ឋរាយការណ៍ថា នៅចំណុចច្រកព្រំដែនខាង លើ តែងតែមានការឃុបឃិតគ្នារវាងនគរបាលព្រំដែន និងក្រុមឈ្មួញ ជួលប្រជាពលរដ្ឋខ្មែរ ឱ្យឆ្លងដែនខុសច្បាប់ទៅលីសែងឈើនៅប្រទេសថៃ ដោយមិនគិតខ្វល់ពីការចាប់ខ្លួន ឬ ការបាញ់សម្លាប់ពីខាងសមត្ថកិច្ចថៃនោះឡើយ ៕
