(ខេត្តស្វាយរៀង) ៖ នៅថ្ងៃទី២៤ខែមិនាឆ្នាំ២០២២ ឯកឧត្តម តូច ប៉ូលីវ៉ា អភិបាលរងតំណាងឯកឧត្តមអភិបាលខេត្តស្វាយរៀងបានអញ្ជើញជាអធិបតីក្នុងកិច្ចប្រជុំស្ដីពីការបង្កលក្ខណៈងាយស្រួលដល់គ្រប់គណបក្សនយោបាយដែលបានចុះឈ្មោះក្នុងបញ្ជីនៅក្រសួងមហាផ្ទៃធ្វើសកម្មភាពដើម្បីចូលរួមក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ឆ្នាំ២០២២និងការបោះឆ្នោតជ្រើសតាំងតំណាងរាស្ត្រទី៧ឆ្នាំ២០២៣។

ក្នុងឪកាសនោះក៏មានការចូលរួមពីសំណាក់លោក ហែមស៊ីណា នាយករងរដ្ឋបាលសាលាខេត្តលោកនាយកទីចាត់ការអន្តរវិស័យសាលាខេត្តអស់លោកកងកំលាំងទាំង៣និងលោកអភិបាលក្រុងស្រុកតាមប្រពន្ធ័អនឡាញzoomនិងលោកលោកស្រីមេឃុំចៅសង្កាត់ដែលពាក់ពន្ធ័ផងដែរ។

បន្ទាប់ពីលោក អុឹង បូរ៉ា នាយកទីចាត់ការអន្តរវិស័យសាលាខេត្តបានធ្វើបទបង្ហាញពីច្បាប់ស្ដីពីគណបក្សនយោបាយរួចមក ឯកឧត្តម តូច ប៉ូលីវ៉ា អភិបាលរងខេត្តស្វាយរៀងបានមានប្រសាសន៍ថា៖ដើម្បីបង្កលក្ខណៈងាយស្រួលដល់គណបក្សនយោបាយដែលបានចុះ បញ្ជីត្រឹមត្រូវតាមច្បាប់ បានចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ និងការបោះឆ្នោតជ្រើសតាំងតំណាងរាស្ត្រ អាណត្តិទី៧ ឆ្នាំ២០២៣ ខាងមុខ ប្រកបដោយលក្ខណៈ សេរី ត្រឹមត្រូវ និងយុត្តិធម៌ ស្របតាមគោលការណ៍លទ្ធិប្រជាធិបតេយ្យ សេរីពហុបក្ស និងដើម្បីធានាការអនុវត្ត ឱ្យបានត្រឹមត្រូវតាមច្បាប់ស្តីពីគណបក្សនយោបាយ ច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ ច្បាប់ស្តីពីការបោះឆ្នោតជ្រើសតាំងតំណាងរាស្ត្រ បទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥ ឆ្នាំ២០២២ និងបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត អាណត្តិទី៧ ឆ្នាំ២០២៣ ព្រមទាំងលិខិតបទដ្ឋានគតិយុត្តជាធរមានងាយស្រួលដល់គ្រប់គណបក្ស នយោបាយដែលបានចុះបញ្ជីរួចហើយនៅក្រសួងមហាផ្ទៃ ក្នុងការធ្វើសកម្មភាពស្របតាមច្បាប់ ។ឯកឧត្តមបានមានប្រសាសន៍បន្តទៀតថា៖ការបើកទីស្នាក់ការគណបក្សនយោបាយនៅតាមលំនៅដ្ឋានឯកជន ឬទីតាំងឯកជននានា ត្រូវមានការយល់ព្រមជាមុនពីម្ចាស់កម្មសិទ្ធិទាំងនោះ ដោយមានកិច្ចសន្យាជួល ឬកិច្ចព្រមព្រៀងជាលាយលក្ខណ៍ អក្សរ។ ទន្ទឹមនេះ សាមីគណបក្សនយោបាយនីមួយៗគ្រាន់តែជូនដំណឹងជាលាយលក្ខណ៍អក្សរទៅអាជ្ញាធរឃុំ សង្កាត់ អំពីការបើកទីស្នាក់ការគណបក្សនយោបាយតែប៉ុណ្ណោះ ដោយមិនតម្រូវឱ្យសុំការអនុញ្ញាតជាមុនពី អាជ្ញាធរឡើយ។

បន្ទាប់ពីទទួលបានលិខិតជាលាយលក្ខណ៍អក្សររបស់គណបក្សនយោបាយរួចហើយ អាជ្ញាធរ ឃុំ សង្កាត់ ត្រូវរាយការណ៍ជូនអាជ្ញាធរក្រុង ស្រុក ខណ្ឌ រាជធានី ខេត្ត ដើម្បីសម្របសម្រួលជាមួយសមត្ថកិច្ចពាក់ព័ន្ធ ក្នុងការគាំទ្រ និងសហការអនុវត្តតាមសមត្ថកិច្ចរៀងៗខ្លួន។

ហើយ គណបក្សនយោបាយសាមី ឬម្ចាស់លំនៅដ្ឋាន ឬម្ចាស់ទីតាំងឯកជន ត្រូវផ្តល់នូវកិច្ចសហការជាមួយអាជ្ញាធរមានសមត្ថកិច្ចប្រកបដោយការយោគយល់អំពី វិធានការសន្តិសុខ សណ្តាប់ធ្នាប់ និងសុវត្ថិភាពសាធារណៈ។

ហើយចំពោះការលើកផ្លាកសញ្ញាគណបក្សនៅទីស្នាក់ការរបស់ខ្លួន ឬលំនៅដ្ឋានឯកជន ឬទីតាំងឯកជន ត្រូវមាន ការយល់ព្រមជាមុនពីម្ចាស់លំនៅដ្ឋាន ឬម្ចាស់ទីតាំងទាំងនោះ។

ទន្ទឹមនេះ សាមីគណបក្សនយោបាយនីមួយៗ គ្រាន់តែជូនដំណឹងជាលាយលក្ខណ៍អក្សរទៅអាជ្ញាធរឃុំ សង្កាត់ អំពីការលើកផ្លាកសញ្ញាគណបក្សតែប៉ុណ្ណោះ ដោយមិនតម្រូវឱ្យសុំការអនុញ្ញាតជាមុនពីអាជ្ញាធរឡើយ លើកលែងតែការលើកផ្លាកសញ្ញាគណបក្សនៅតាម ទីសាធារណៈ ទីប្រជុំជន ឬតាមដងផ្លូវនានា។

ឯកឧត្តមបានមានប្រសាសន៍បន្ថែមថា៖អស់លោកលោកស្រីជាអភិបាលក្រុងស្រុកមេឃុំចៅសង្កាត់ដែលបានចូលរួម ប្រជុំនាពេលនេះរួចមកត្រូបន្តចាត់ចែង ផ្សព្វផ្សាយនិងអាជ្ញាធរមានសមត្ថកិច្ចពាក់ព័ន្ធនានា ដើម្បីផ្ដល់កិច្ច សហការគាំទ្រ និងសម្របសម្រួលក្នុងការអនុវត្តកិច្ចការខាងលើឲ្យមានប្រសិទ្ធភាពខ្ពស់និងត្រូវបន្តអនុវត្តវិធានការណ៏របស់រាជរដ្ឋាភិបាល៣កុំ៣ការពារជាប់ជានិច្ច៕