ឧត្តម សាន់ យូ អភិបាលរងខេត្តកំពង់ឆ្នាំង បានដឹកនាំកម្លាំងចម្រុះ និងកម្លាំងសមត្ថកិច្ចជំនាញ ចុះធ្វើប្រតិបត្តិការបង្ក្រាប ទប់ស្កាត់បទល្មើសនេសាទនៅតំបន់បឹងទន្លេសាបក្នុងភូមិសាស្ត្រស្រុកជលគីរី ស្រុកកំពង់លែង និងស្រុកបរិបូណ៌
កំពង់ឆ្នាំង៖ អនុវត្តតាមបទបញ្ជាដ៏ម៉ឺងម៉ាត់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចាប់តាំងពីថ្ងៃទី២៤ ខែមីនា ឆ្នាំ២០២២ ឯកឧត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង បានចាត់តាំងក្រុមការងារចម្រុះ ដឹកនាំដោយឯកឧត្តមសាន់ យូ អភិបាលរងខេត្ត រួមជាមួយកម្លាំងសមត្ថកិច្ច មន្ទីរកសិកម្ម រុក្ខាប្រមាញ់ និងនេសាទ មន្ទីរ អង្គភាពជំនាញពាក់ព័ន្ធ និងអាជ្ញាធរមូលដ្ឋាន ចុះធ្វើប្រតិបត្តិការបង្ក្រាប ទប់ស្កាត់បទល្មើសនេសាទនៅតំបន់បឹងទន្លេសាប ក្នុងភូមិសាស្ត្រស្រុកជលគីរី ស្រុកកំពង់លែង និងស្រុកបរិបូណ៌។
លទ្ធផលសម្រេចបានក្នុងថ្ងៃទី២៤ ខែមីនាម្សិលម៉ិញនេះ រួមមាន៖ បានរុះរើរបាំងសាច់អួនចំនួន ២៧កន្លែង ស្មើនឹង ២ ២០០ម៉ែត្រ បង្គោលចំនួន ៨៥០ដើម លូសាច់អួនចំនួន ៣៤លូ រុះរើសម្រាស់ចំនួន ៧កន្លែង ស្មើនឹង ៥៦០ម៉ែត្រការ៉េ បង្គោលចំនួន ១៣០ដើម មែកសម្រាស់ចំនួន ៣ ៤០០មែក។
នាថ្ងៃទី២៥ ខែមីនា ឆ្នាំ២០២២នេះ ក្រុមការងារចម្រុះជាង ១០០នាក់ បានបែងចែកជា ៤ក្រុម កំពុងបន្តប្រតិបត្តិការយ៉ាងសស្រោកសស្រាំព្រមគ្នា ក្នុងភូមិសាស្ត្រស្រុកទាំងបីខាងលើជាបន្តទៀត។
