អ្នកមានអំណាចមានពិសណា ខ្លះលួចនាំចូលពីស្រុកវៀតណាម
ខេត្តតាកែវ ៖ ក្មួយប្រុសលោកថៃ លី ប្រធានការិយាល័យផលិតកម្មពេទ្យខេត្តតាកែវ ដឹកជ្រូកវៀតណាមតាមច្រកតាអូរាប់រយក្បាលក្នុងមួយយប់ៗរាប់ឆ្នាំគ្មានអ្នកដឹង ។ ប្រភពពីសមត្មកិច្ចសុំមិនបញ្ចេញឈ្មោះនៅក្នុងស្រុកគីរីវង់ខេត្តតាកែវបានអោយដឹងថា មេឈ្មួញដឹកជ្រូកវៀតណាមដ៏ល្បីល្បាញឈ្មោះ សើ ត្រូវជាក្មួយប្រុសរបស់លោកថៃ លី ប្រធានការិយាល័យផលិតកម្មពេទ្យនៃមន្ទីរកសិកម្មរុក្ខាប្រមាញ់ និងនេសាទខេត្តតាកែវ លួចដឹកជ្រូកវៀតណាមតាមច្រកតាអូ ឬហៅច្រក (យ៉ិយ៉ា) ឃុំតាអូ ចាប់ពី៣០០ក្បាល រហូត៥០០ក្បាលក្នុង១យប់ៗ ពុំមានមន្រ្តីណាហ៊ានធ្វើការបង្ក្រាបនោះទេ។
ប្រភពដដែលបានអោយដឹងទៀតថា ការផ្ទេរជ្រូកគឺធ្វើសកម្មភាពនៅពេលយប់ចាប់ពីម៉ោង១២យប់ រហូតដល់ម៉ោង៤ជិតភ្លឺ គឺធ្វើនៅទីតាំងច្រករបៀងតាអូ ឬច្រកយ៉ិនយ៉ានោះតែម្ដង ដោយប្ររថយន្តចាប់ពី៥តោនឡើងទៅហើយដឹកយកមកចែកចាយតាមកុងស៊ីមួយចំនួនក្នុងខេត្តនិងបន្តដឹកយកទៅចែកចាយបន្ថែមនៅក្រុងភ្នំពេញបន្តទៀត ។
ប្រភពបន្តទៀតថា ក្មួយប្រុសលោកថៃ លី ជាមេខ្លោងរៀបចំការងារដឹកជញ្ជូនជ្រូកពីស្រុកយួននៅស្រុកគីរីវង់ គ្មានអ្នកណាហ៊ានរំខានទេ ។ ចំណែកជ្រូកចេញផុតពីទឹកដីស្រុកគីរីវង់ គឺមេឈ្ញួញម្នាក់ទៀតឈ្មោះចាន់នៅស្រុកសំរោងជាអ្នកចាត់ចែងរត់ការបន្តដោយជោគជ័យ ។
ពាក់ពន្ធ័ករណីខាងលើ លោកថៃ លី ប្រធានការិយា័ល័យផលិតកម្មពេទ្យខេត្តតាកែវបានទទួលស្គាល់ថា ឈ្មោះសើ ពិតជាបានដឹកជ្រូកវៀតណាចេញតាមច្រក់ខាងលើពិតមែន តែពុំបានដឹកទៀងទាត់នោះទេ ។ ករណីជ្រូកវៀតណាមដឹកចូលខ្មែរតាមច្រកខាងលើ គឺនៅមានអ្នកពាក់ព័ន្ធច្រើនណាស់ ជាពិសេសចៅហ្វាយរងខេត្តតាកែវម្នាក់ ជាអ្នកចេញមុខកាងដែលយើងទាក់ទងបំភ្លឺមិនទាន់បាន ។
រឿងមេពេទ្យសត្វកាងជ្រូកនាំចូលពីក្រៅប្រទេសដោយលួចលាក់ មិនមែនមានតែនៅខេត្តតាកែវប៉ុណ្ណោះទេ សូម្បីនាំជ្រូកចូលពីប្រទេសថៃតាមច្រកព្រំដែននានា មានច្រកខេត្តឧត្តរមានជ័យ, ច្រកបន្ទាយមានជ័យក៏មានពាក់ព័ន្ធកាងពីមេពេទ្យសត្វធំពីថ្នាក់លើផងដែរ ព្រោះមុខរបរនេះធ្វើឱ្យមានបានឆាប់ណាស់ ដែលយើងនឹងផ្សាយជូននៅពេលក្រោយទៀត ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ។
