កំពត ៖ ជនសង្ស័យប្រុស ស្រី ចំនួន៧ម្នាក់ដែលជាប់ពាក់ព័ន្ធនឹងបទល្មើសគ្រឿងញៀនត្រូវបានសមត្ថកិច្ចនៃស្នងការដ្ឋាននគរបាលខេត្តកំពតស្រាវជ្រាវបង្ក្រាបបានជាបន្តបន្ទាប់ ខណៈពួកគេកំពុងធ្វើសកម្មភាព ជួញដូរ និងប្រើប្រាស់សារធាតុញៀន។
ក្រុមជនសង្ស័យទាំង៧នាក់មានប្រុស៤នាក់និងនារី៣នាក់ ត្រូបានកំលាំងសមត្ថកិច្ចប៉ូលិសឃាត់ខ្លួននៅវេលាខុសគ្នាស្ថិតក្នុងភូមិសាស្ត្រក្រុងកំពត ហើយប្រតិបតិ្តការខាងលើសមត្ថកិច្ចក៏បានដកហូតនូវសារធាតុញៀននិងសម្ភារៈមួយចំនួនទៀតផង។
លោកវរសេនីយ៍ឯក ទូច ឌន ប្រធានការិយាល័យប្រឆាំងបទល្មើសគ្រឿងញៀននៃស្នងការនគរបាលខេត្តកំពត បានឲ្យដឹងថា ក្រុមជនសង្ស័យចំនួន៧នាក់នេះត្រូវបានកំលាំងរបស់លោកសហការជាមួយកំលាំងអន្តរាគមន៍ពិសេស(កំលាំងឈុតខ្មៅ)ធ្ចើការបង្ក្រាបនៅវេលាខុសគ្នា រួមមាន៖ទី១.ឈ្មោះ ហ៊ួរ លីណា ភេទស្រី អាយុ២៦ឆ្នាំត្រូវសមត្ថកិច្ចឃាត់ខ្លួនបាននៅល្ងាច ថ្ងៃទី២៣ខែមេសា ឆ្នាំ២០១៧ត្រង់ចំណុចភួមិទ្វីខាងត្បូង សង្កាត់អណ្តូងខ្មែរ ក្រុង-ខេត្តកំពតដោយដកហូតថ្នាំញៀនបានមួយកញ្ចប់តូច។ចំណែកជនសង្ស័យចំនួន៦នាក់ត្រូវបានសមត្ថកិច្ចបង្ក្រាបបាននៅរសៀលនិងពេលល្ងាចក្នុងថ្ងៃទី២៤ខែមេសា ឆ្នាំ២០១៧ស្ថិតក្នុងភូមិសាស្ត្រក្រុងកំពតដដែលរួមមាន៖ទី១.ឈ្មោះ លី តៅហ៊ួរ ភេទប្រុស អាយុ២៣ឆ្នាំ ទី២.ឈ្មោះ ជា ចាន់ដារ៉ា ភេទប្រុស អាយុ៣៤ឆ្នាំ ទី៣ឈ្មោះ អន អាណា ភេទស្រី អាយុ៣០ឆ្នាំ(៣នាក់នេះបង្ក្រាបនៅភូមិក្រាំងអម្ពិល សង្កាត់ក្រាំងអម្ពិល)ដោយដកហូតបានសារធាតុញៀនចំនួន២កញ្ចប់ ទី៤.ឈ្មោះ ស៊ន កុសល្យ ភេទប្រុស អាយុ២១ឆ្នាំ ទី៥.ឈ្មោះ យ៉ែម សុរដ្ឋា ភេទប្រុស អាយុ១៦ឆ្នាំនិងទី៦.ឈ្មោះ ឈឹម យាន ភេទស្រី អាយុ១៥ឆ្នាំ(បង្ក្រាបនៅសង្កាត់កំពង់កណ្តាល ក្រុងកំពត)ហើយសមត្ថកិច្ចដកហូតវត្ថុតាងថ្នាំញៀន១៩កញ្ចប់ ក្នុងនោះមានមួយកញ្ចប់ធំផងដែរ។
បច្ចុប្បន្ន ក្រុមជនសង្ស័យទាំង៧នាក់ ត្រូវបានសមរ្ថកិច្ចការិយាល័យប្រឆាំងបទល្មើសគ្រឿងញៀនកំពុងសាកសួរ ដើម្បីកសាងសំណុំរឿងបញ្ជូនទៅសាលាដំបូងខេត្តកំពត ចាត់ការតាមនីតិវិធី។
គួររំឭកថា ក្នុងរយៈពេលប៉ុន្មានខែនេះសមត្ថកិច្ចនៃស្នងការដ្ឋាននគរបាលខេត្តកំពត ដឹកនាំផ្ទាល់ពីសំណាក់ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានបញ្ជាកំលាំងគ្រប់បណ្តាភូមិសាស្ត្រទូទាំងខេត្ត ដើម្បីចុះប្រតិបតិ្តការនិងបង្ក្រាបបទល្មើសគ្រប់រូបភាពទទួលបានជោគជ័យដ៏ត្រចះត្រចង់ ដែលធ្វើឲ្យប្រជាពលរដ្ឋស្ថិតក្នុងតំបន់និមួយៗ មានភាពកក់ក្តៅ និងមានទំនុកចិត្តដោយសារក្នុងតំបន់នានាទូទាំងខេត្តពោរពេញដោយ ភូមិ ឃុំ មានសុវត្ថិភាពជាចម្បងពិសេសគឺការបង្ក្រាបបទល្មើសគ្រឿងញៀនតែម្តងដែលធ្វើឲ្យពលរដ្ឋសប្បាយចិត្តព្រោះតែកន្លងមកសារធាតុញៀននេះពិតជាបានផ្តល់នូវអសន្តិសុខនិងបង្កគ្រោះថ្នាក់ដល់សង្គមនិងខូចអនាគតកូនចៅរបស់ពួកគាត់ផងដែរ ៕
ណារិទ្ធ
