កែប ៖ ផ្លូវចាប់ពីរង្វង់មូលនាងគង្ហីងមកទល់នឹងផ្លូវជាតិលេខ៣៣មានប្រវែង២០០០ម៉ែត្រស្ថិតក្នុងឃំុពងទឹក ស្រុកដំណាក់ចង្អើរ ខេត្តកែប ត្រូវបានបើកការដ្ឋានជួសជុលដោយចាក់ក្រាលកៅស៊ូ(DBST)នៅរសៀលថ្ងៃទី២៤ខែមេសា ឆ្នាំ២០១៧ក្រោមវត្តមានដ៏ខ្ពង់ខ្ពស់ ឯកឧត្តម កែន សត្ថា អភិបាលនៃគណៈអភិបាលខេត្តកែបនិងឯកឧត្តម សំ សារីន ប្រធានក្រុមប្រឹក្សាខេត្ត ព្រមទាំងអភិបាលរង និងអស់លោកជាប្រធាន អនុប្រធានមន្ទីរជំនាញ គ្រប់អង្គភាព អាជ្ញាធរដែនដីគ្រប់លំដាប់ថ្នាក់រួមនិងប្រជាពលរដ្ឋចូលរួមដ៏ច្រើនកុះករផងដែរ ។
លោក ម៉ម ទូច ប្រធានមន្ទីរសាធារណៈការនិងដឹកជញ្ជូនខេត្តកែប បានឲ្យដឹងថា ផ្លូវលេខ១៣៣៣និង១៣៣៥មានប្រវែងសរុបក្នុងភូមិសាស្ត្រខេត្តកែប២៦គម ឆ្លងកាត់ភូមិចំនួនបី គឺភូមិចំការចេក ចំការបី និងអន្ទង់ស ដែលក្នុងនោះកំណាត់ផ្លូវលេខ១៣៣៣មានប្រវែង១៥គម បំបែកចេញពីផ្លូវជាតិលេខ៣៣ត្រង់PK21+200(ខាងកើតវិទ្យាល័យ ហ៊ុន សែន ចំការដូង)និងបញ្ចប់ត្រង់ចំការចេកនៃខេត្តកែបនិងភូមិដំណាក់កន្ទួតខាងត្បូងនៃខេត្តកំពតនិងផ្លូវលេខ១៣៣៥មានប្រវែងសរុប១១គម បំបែកចេញពីផ្លូវជាតិលេខ៣៣ត្រង់PK27+480និងបញ្ចប់ត្រង់ព្រំប្រទល់ភូមិចំការបីនៃខេត្តកែបនិងភូមិស្រែជាខាងត្បូងនៃខេត្តកំពត។លោកបញ្ជាក់ទៀតថា ផ្លូវទាំងពីរខ្សែខាងលើនេះ ជាផ្នែកមួយយ៉ាងសំខាន់បំផុតរបស់ខេត្តកែបពិសេសជាចំណងតភ្ជាប់លំហូរភ្ញៀវទេសចរណ៍ជាតិ-អន្តរជាតិ ពីទីប្រជុំជនក្រុងកែបមកតំបន់អេកូទេសចរណ៍ភ្នំវល្លិ៍ បែបកសិឧស្សាហកម្មដ៏មានសក្តានុពលនិងភាពទាក់ទាញ ។ ជាមួយគ្នានេះដែរ ខាងជំនាញក៏បានជួយពង្រីកមុខព្រួញដល់វិស័យដ៏ទៃទៀតក្នុងការរួមចំណែកអភិវឌ្ឍន៍ខេត្តរបស់យើង។ដើម្បីឆ្លើយតបទៅនឹងតម្រូវការអភិវឌ្ឍន៍ខេត្តទេសចរណ៍តំបន់ឆ្នេរនិងធានាសណ្តាប់ធ្នាប់របៀបរៀបរយនិងលើកកម្ពស់សោភណភាពខេត្ត ពិសេស ដើម្បីសម្រួលដល់ការធ្វើចរាចតណ៍របស់បងប្អូនប្រជាពលរដ្ឋនៅតំបន់នេះនិងទាក់ទងភ្ញៀវទេសចរណ៍ជាតិនិងអន្តរជាតិឲ្យមកកាន់តំបន់នេះទៀត ។ ខណៈនោះដែរ ឯកឧត្តម កែន សត្ថា អភិបាលខេត្តក៏លើកសំណើរសុំកសាងផ្លូវ២ខ្សែខាងលើពីផ្លូវគ្រួសក្រហមមកជាផ្លូវចាក់ក្រាលកៅស៊ូវិញ ។ បន្ទាប់មកសម្តេចតេជោ ហ៊ុន សែន នាយករដ្ឋមន្ត្រី បានអនុញាតិឲ្យ MPET និង MEF នៅឆ្នាំ២០១៧នេះ ធ្វើការចាក់កៅស៊ូDBSTប្រវែង២០០០ម៉ែត្រ ទទឹង៧មែត្រចិញ្ចើមគ្រួសក្រហម១,៥០ម៉ែត្រដោយភ្ជាប់ពីរង្វង់មូលនាងគង្ហីងឆ្ពោះទៅផ្លូវជាតិលេខ៣៣ ។
ថ្លែងសំណេះសំណាលនាឱកាសនោះ ឯកឧត្តម កែន សត្ថា បានបញ្ជាក់ថា កាលពីមុនទីតាំងចំណុចផ្លូវខាងលើគឺមានទំហំតូចៗ ក្រាលដោយគ្រួសក្រហមពីបាកធ្វើដំណើរ ហើយចំណុចភ្នំវល្លិ៍នេះកន្លែងខ្លះក៏មិនទាន់បានស្ថាបនាផ្លូវនៅឡើយដែរទើបតែពេលនេះដោយមានការលើកជាសំណើរទៅប្រមុខរាជរដ្ឋាភិបាល ទើបសម្តេច តេជោហ៊ុន សែន ប្រទានតាមសំណូមពររបស់អាជ្ញាធរសំរាប់ជាចំណងដៃជូនដល់ប្រជាពលរដ្ឋក្នុងតំបន់តែម្តង។ឯកឧត្តមបានក្រើនរំឭកដល់ប្រជាពលរដ្ឋគ្រប់តំបន់នៃខេត្តកែប បើបានផ្លូវចាក់កៅស៊ូពង្រីកធំទូលាយបែបនេះហើយសូមជួយថែរក្សាទាំងអស់គ្នាហើយសូមធ្វើចរាចរណ៍ដោយស្មារតីប្រុងប្រយត្នខ្ពស់ក្នុង ពេលធ្វើដំណើរទៅមក សូមកុំបើកបរក្នុងស្ថានភាពប្រថុយប្រថាន កុំបើកបរក្នុងស្ថានភាពស្រវឹងនិងបញ្ជៀសឲ្យឆ្ងាយពីគ្រឿងញៀន ៕
ណារិទ្ធ
