កែប៖ នៅព្រឹកថ្ងៃទី២២ ខែមេសា ឆ្នាំ២០១៧ ក្នុងសាលប្រជុំគណបក្សប្រជាជនកម្ពុជា ខេត្តកែប បានធ្វើកិច្ចប្រជុំត្រួតពិនិត្យសកម្មភាព លទ្ធផលការងាររបស់គណបក្សនិងក្រុមការងារគ្រប់ថ្នាក់ ត្រៀមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណតិ្តទី៤ក្នុងត្រីមាសទី១ដើមឆ្នាំ២០១៧និងទិសដៅអនុវត្តន៍បន្ត ក្រោមការអញ្ជើញចូលរួមដ៏ខ្ពង់ខ្ពស់ ឯកឧត្តម បណ្ឌិត ចម ប្រសិទ្ធ សមាជិកគណៈកម្មាធិការកណ្តាល ទេសរដ្ឋមន្ត្រី រដ្ឋមន្ត្រី ក្រសួងឧស្សាហកម្មនិងសិប្បកម្ម និងជាប្រធានក្រុមការងាររបស់គណៈកម្មាធិការកណ្តាលគណបក្សប្រជាជនកម្ពុជា ចុះជួយខេត្តកែប ហែរហមដោយក្រុមការងារនិងឯកឧត្តម កែន សត្ថា ប្រធានគណៈកម្មាធិការគណបក្សខេត្ត ឯកឧត្តម សំ សារីន ប្រធានក្រុមប្រឹក្សាខេត្ត ព្រមទាំងអស់លោកជាថ្នាក់ដឹកនាំមន្ទីរ ស្ថាប័នអង្គភាពផ្សេងៗ និងសមាជិក សមាជិការរបស់គណបក្សទូទាំងខេត្តផងដែរ។
ដោយផ្អែកលើរបាយការណ៍ដែលថ្លែងដោយ ឯកឧត្តម កែន សត្ថា ជាប្រធានគណៈកម្មាធិការគណបក្សប្រជាជនខេត្តកែប បានឲ្យដឹងថា ក្នុងត្រីមាសទី១ដើមឆ្នាំ២០១៧នេះ ក្រុមការងាររបស់គណៈកម្មាធិការកណ្តាលចុះជួយខេត្ត ថ្នាក់ដឹកនាំគណបក្សខេត្ត សមាជិកសភាមណ្ឌលខេត្តកែប សមាជិកសភាភូមិភាគ៥រួមជាមួយគណបក្សនិងក្រុមការងាររបស់គណបក្សខេត្តគ្រប់ថ្នាក់បានចំណាយទាំងកំលាំងកាយ ចិត្ត រួមទាំងថវិកាក្នុងការដោះស្រាយរាល់សំណូមពរនិងដោះស្រាយទុក្ខលំបាកជូនប្រជាពលរដ្ឋនៅគ្រប់មូលដ្ឋាន ។ ជារួមការចំណាយលើកិច្ចការផ្សេងៗ ក្រុមការងាររបស់គណៈកម្មាធិការកណ្តាលជុះជួយខេត្ត ថ្នាក់ដឹកនាំគណបក្សខេត្តរួមទាំងស្ថាប័នជាច្រើនទៀតក៏បានចំណាយថវិកាអស់សរុប ប្រមាណ១១០.៧៥៩.០០០រៀលនិងប្រាក់ដុល្លា១៤.២៧៥ដុល្លា ព្រមទាំងសម្ភារៈប្រើប្រាស់ជាច្រើនទៀត។ក្រៅពីនោះក្រុមការងារគ្រប់ឃុំ សង្កាត់និងភូមិបានបន្តយកចិត្តទុកដាក់ ជម្រុញការជួសជុល កែលម្អ ផ្លាកគណបក្សបានចំនួន១៤២ផ្កាកនិងលើកផ្លាកយីហោថ្មីបានចំនួន១៣០ផ្លាក សរុប២៧២ផ្លាកផងដែរ។ចំពោះការអនុវត្តផែនការឆ្ពោះទៅការបោះឆ្នោតជ្រើសរើសក្រុមប្រឹក្សាឃុំ សង្កាត់អាណតិ្តទី៤ឆ្នាំ២០១៧របស់គណៈអចិន្ត្រៃយ៍គណៈកម្មាធិការកណ្តាលក៏បានរៀបចំផែនការទទួលបានជោគជ័យ និងបន្តអនុវត្តន៍កម្មវិធីនយោបាយរបស់គណបក្សប្រជាជនកម្ពុជានិងគោលការណ៍ដឹកនាំរបស់គណៈអចិន្ត្រៃយ៍គណៈកម្មាធិការកណ្តាលឲ្យបានហ្មត់ចត់បំផុត។ពង្រឹងយន្តការក្នុងរចនាសម្ព័ន្ធ ចាត់តាំងក្បាលម៉ាសីុនគណបក្សគ្រប់ផ្នែក គ្រប់ថ្នាក់ដើម្បីលើកកម្ពស់ការអនុវត្តន៍តួនាទីភារកិច្ចឲ្យកាន់តែមានប្រសិទ្ធភាព ដោយធ្វើសកម្មភាពផ្តោតឆ្ពោះទៅមូលដ្ឋានឲ្យបានជាប់ជាប្រចាំ និងសហការរវាងគណៈកម្មការរៀបចំការបោះឆ្នោតក្នុងការចែកប័ណ្ណព័ត៌មានឲ្យបានដល់គ្រប់សមាជិកគណបក្សដើម្បីបានដឹងពីថ្ងៃខែបោះឆ្នោតដឹងលេខរៀងឈ្មោះក្នុងបញ្ជីបោះឆ្នោតនិងការិយាល័យដែលត្រូវទៅបោះឆ្នោត។បន្តផ្តល់ប័ណ្ណសម្គាល់ខ្លួនសមាជិក គណបក្សឲ្យបានគ្រប់គ្នានិងបំផុសដឹកនាំណែនាំសមាជិកគណបក្សទៅចូលរួមបោះឆ្នោតជូនគណបក្សប្រជាជនឲ្យបានគ្រប់ៗគ្នាផងដែរ។
នាឱកាសនោះ ឯកឧត្តម បណ្ឌិត ចម ប្រសិទ្ធ បានមានប្រសាសន៍ថា ឥឡូវនេះជិតដល់យុទ្ធនាការបោះឆ្នោតហើយ សូមក្រុមការងារគ្រប់ថ្នាក់ខិតខំជម្រុញការងាររបស់ខ្លួនឲ្យបានប្រាកដប្រជា ដើម្បីត្រៀមលក្ខណៈការបោះឆ្នោតឆ្នាំ២០១៨ឲ្យទទួលបានជោគជ័យ ទន្ទឹមនឹងភារកិច្ចនេះក្រុមការងារត្រូវបន្តខិតខំអភិវឌ្ឍន៍នៅគ្រប់តំបន់ដើម្បីជួយលើកកម្ពស់ជីវភាពប្រជាពលរដ្ឋឲ្យកាន់តែមានការរីកចម្រើនជាលំដាប់ ត្រៀមលក្ខណៈនូវមធ្យោបាយ សម្ភារៈ ថវិកា សម្រាប់ព្យូហយាត្រាឲ្យបានល្អប្រសើរនិងពង្រឹង ការថែរក្សា ការពារ សន្តិសុខ សណ្តាប់ធ្នាប់ឲ្យបានល្អប្រសើរនិងរឹងមាំ ទាំងមុនពេល ក្នុងពេលនិងក្រោយពេលបោះឆ្នោត ពិសេសពង្រឹងការអនុវត្តគោលនយោបាយភូមិ ឃុំ មានសុវត្ថិភាពឲ្យបានល្អប្រសើរ ៕
ណារិទ្ធ
