នៅថ្ងៃព្រហស្បតិ៍ ១៥កើត ខែផល្គុនឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី១៧ខែមីនា ឆ្នាំ២០២២នេះ

ឯកឧត្តម តូច ប៉ូលីវ៉ា អភិបាលរង នៃគណៈអភិបាលខេត្តស្វាយរៀង តំណាងឯកឧត្តម ម៉ែន វិបុល អភិបាលខេត្ត ដោយមានការចូលរួមពី លោក សុខា រ៉ាម អភិបាល នៃគណៈអភិបាលស្រុករំដួល លោក សុខ សុទ្ធាវុធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត លោក លោកស្រី មន្រ្តីពាក់ព័ន្ធ បានអញ្ជើញជាគណអធិបតីក្នុងពិធីចែកអង្ករផ្តល់ជូនកសិកររងផលប៉ះពាល់ដោយជំងឺកូវីដ-១៩ ចំនួន ១០០គ្រួសារ នៅក្នុងបរិវេណវត្តបន្ទាយ ស្រុករំដួល ខេត្តស្វាយរៀង។

ក្នុងពិធីនេះដែរ ឯកឧត្ដម បានមានប្រសាសន៍សំណេះសំណាល និងការផ្ដាំផ្ញើសួរសុខទុក្ខពីសំណាកលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច និងជាប្រធានក្រុមការងារចុះមូលដ្ឋានខេត្ត ឯកឧត្ដម ម៉ែន វិបុល អភិបាលនៃគណៈអភិបាលខេត្ត និងឯកឧត្ដម នាយឧត្ដមសនីយ៍ ខ្វាន់ ស៊ាម ប្រធានក្រុមការងារចុះមូលដ្ឋានស្រុករំដួល មកជូនដល់បងប្អូនប្រជាពលរដ្ឋផងដែរ ។

ឯកឧត្ដមបន្ថែមទៀតថាទោះបីខេត្តស្វាយរៀង មិនមានការឆ្លងរីករាលដាលជំងឺកូវីដ-១៩ ដូចមុន ក៏មិនត្រូវភ្លេចខ្លួនក្នុងការចូលរួមប្រយុទ្ធប្រឆាំងនឹងជំងឺកូវីដ អនុវត្តតាមការណែនាំរបស់ក្រសួងសុខាភិបាល វិធានការ ៣ការពារ ៣កុំ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងរៀនរស់នៅតាមបែបគន្លងថ្មី ។

                      ១