រដ្ឋបាលខេត្តបន្ទាយមានជ័យ ប្រាព្ធពិធីអបអរសាទរ ខួបអនុស្សាវរីយ៍លើកទី១១១ ទិវាអន្តរជាតិនារី ៨មិនា ឆ្នាំ២០២២!
ខេត្តបន្ទាយមានជ័យ៖នៅព្រឹកថ្ងៃទី០៩ ខែមិនា ឆ្នាំ២០២២នេះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដឹកនាំមន្ត្រីនគរបាលស្រី្តចូលរួម ពិធីអបអរសាទរ ខួបអនុស្សាវរីយ៍លើកទី១១១ ទិវាអន្តរជាតិនារី ៨មិនា ក្រោមប្រធានបទ សមភាពយេនឌ័រថ្ងៃនេះ ដើម្បីចីរភាពនាពេលអនាគត នៅសាលាខេត្តបន្ទាយមានជ័យ។
ពិធីនេះត្រូវបានប្រារព្ធធ្វើឡើង ក្រោមអធិបតីភាព លោកជំទាវ អគ្គមហាឧបាសិកាពុទ្ធសាសនរូបត្ថម្ភក៍ ម៉ៅ ម៉ាល័យ កែ គឹមយ៉ាន ប្រធានសមាគមនារីដើម្បីកម្ពុជា និង ការអភិវឌ្ឍន៍ លោកជំទាវ នួម សោភ័ណ សមាជិកព្រឹទ្ធសភាមណ្ឌលខេត្តបន្ទាយមានជ័យ ឯកឧត្តម ខេង ស៊ុម ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលខេត្តបន្ទាយមានជ័យ ក្នុងនោះក៏មានការអញ្ជើញរួមពី លោក លោកស្រី មន្ត្រីរាជការ មកពីមន្ទីរ ស្ថាប័ន កងម្លាំងគ្រប់ប្រភេទជាស្រ្តីជាច្រើនរូប។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានចាត់ទុកថា នារីគឺជាឆ្អឹងកងក្នុងការចូលរួមចំណែកអភិវឌ្ឍន៍គ្រួសារ និងសង្គមជាតិ ដែលមិនអាចខ្វះបាន។ ក្រៅពីនេះនារី ក៏បានធ្វើកិច្ចទាំងឯកជន រាជការ និង ការងារសង្គម ពិសេសគឺ ជួយដោះស្រាយបញ្ហាប្រឈមនានា ជាមួយបញ្ហា ស្ត្រី និងកុមារ។ លោកបានបន្តថា ការងារមួយចំនួន ដូចជាក្នុងជួររាជការ មន្ទីរ ក្រសួង នារីត្រូវបានថ្នាក់ដឹកនាំលើកទឹកចិត្តតែងតាំងជាថ្នាក់ដឹកនាំ ដើម្បីចូលរួមអភិវឌ្ឍន៍សង្គមជាតិ។
ទន្ទឹមគ្នានោះ លោកក៏បានផ្តាំផ្ញើរដល់ថ្នាក់ដឹកនាំនិងសមាជិកគ្រប់បណ្តាអង្គភាពពាក់ពន្ធ័ត្រូវបន្តអនុវត្តន៍វិធានការសុខាភិបាល គឺ៣កុំ ៣ការពារ ទាំងអស់គ្នា ដើម្បីគេចផុតពីជម្ងឺកូវីដ១៩បំលែងខ្លួនថ្មី៕
