កំពត ៖ ផ្លូវចូលនៃបរិវេណផ្សារស្រុកកំពង់ត្រាច ត្រូវបានគេសាងសង់តូប រំលោភយកបានសម្រេចហើយ ប៉ុន្តែហាក់គ្មានអាជ្ញាធរឬជំនាញពាក់ព័ន្ធណាមកហាមឃាត់ឡើយ ដោយទុកឱកាសឱ្យគេសង់តូបដ៏ព្រហើនបង្អួតអ្នកដំណើរទៅវិញ។
យោងតាមសេចក្តីរាយការណ៍ពីសំណាក់ក្រុមអាជីវករក្នុងផ្សាខាងលើបានបង្ហើបឱ្យដឹងថា ទីតាំងដែលគេសង់ជាតូបនោះគឺជាចំណីផ្លូវចេញចូលក្នុងផ្សាកំពង់ត្រាច ប៉ុន្តែគេមិនដឹងថា អ្នកសង់តូបមានឥទ្ធិពលបែបណានោះទេ ទើបហ៊ានសង់តូបស្ថិតចំណោមក្រសែភ្នែកមហាជនយ៉ាងនេះ ។ ម្យ៉ាងទៀត ចំណុចដែលគេធ្វើតូបលក់ដូរនេះ វានៅជាប់បង្កើយនឹងដងផ្លូវចេញចូលដែលនាំបង្កការរំខានដល់អ្នកដំណើរឆ្លងកាត់ទីនេះផងដែរ ។
ប្រភពដដែលបានលួចទំលាយទៀតថា អ្នកដែលសង់តូបត្រង់ដីចំណីផ្លូវនោះត្រូវគេស្គាល់ជាកូនរបស់អ្នកគ្រប់គ្រងផ្សារខាងលើ ឈ្មោះ ហាម បាវ ដែលកន្លងមកធ្លាប់តែលេចឭមានបញ្ហាជាមួយអ្នករកសុីភាគហ៊ុនគ្មានឈប់ឈរនោះ ហើយគេក៏ឆ្ងល់ថា តើលោកហាម បាវមានឥទ្ធិពលប៉ុនណាទៅ ទើបហ៊ានបង្គាប់ឱ្យកូនចៅខ្លួនមកចាប់យកដីចំណីផ្លូវសំរាប់ធ្វើអាជីវកម្មបែបនេះ។គេបានខ្សឹបប្រាប់ទៀតថា ឥឡូវនេះការសង់តូបដែលមានទំហំ២គុណនឹង២ម៉ែត្រ របស់សាច់ញាតិលោកហាមបាវជិតបានរួចរាល់ជាស្ថាពរហើយ បែរជាមិនរំខានដល់អាជ្ញាធរទៅវិញ។
ទាក់ទិននឹងករណីសង់តូបលើដីចំណីផ្លូវដូចខាងលើ ក្នុងរសៀល ថ្ងៃទី២១ខែមីនា ឆ្នាំ២០១៧អ្នកសារព័ត៌មានមិនអាច សុំការពន្យល់ណាមួយពីលោកហាម បាវ អ្នកគ្រប់គ្រងផ្សាស្រុកកំពង់ត្រាចបានទេ។
ពាក់ព័ន្ធនឹងរឿងដដែល លោកអ៊ុម ស៊ីណាត អភិបាលស្រុកកំពង់ត្រាច បានប្រាប់ឱ្យដឹងតាមទូរសព្ទនារសៀលនេះថា បើមានករណីគេសង់តូបលើចំណីផ្លូវមែននោះ លោកនឹងចាត់ក្រុមការងារ ឱ្យចុះពិនិត្យមើលតែម្តង៕
