(ត្បូងឃ្មុំ)៖ ក្នុងនាមក្រុមការងារចុះមូលដ្ឋានតាមបណ្តាខេត្ត ក្រុង ស្រុក ត្រូវមានវត្តមាននៅមូលដ្ឋានពិតប្រាកដ ដែលជាការផ្តល់ភាពកក់ក្តៅ និងដើម្បីពិគ្រោះសុំយោបល់ ពីសំណាក់អ្នកនៅមូលដ្ឋាន ពោលគឺ បន្តអភិវឌ្ឍន៍ និងគាំទ្រយន្តការដ៍ល្អរបស់សម្តេចតេជោ ហ៊ុន សែន តែដាច់ខាតមែនមិនចុះដើម្បីបន្ថែមបន្ទុកបញ្ហាដល់មូលដ្ឋាន ដើម្បីបានលាភសក្ការៈណាមួយសម្រាប់ខ្លួននោះឡើយ ។ នេះជាការលើកឡើងរបស់ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ នៅថ្ងៃទី២៧ ខែមករា ឆ្នាំ២០២២នេះ ក្នុងឳកាសអញ្ជើញជាអធិបតីភាព ក្នុងកិច្ចប្រជុំត្រួតពិនិត្យលទ្ធផលបូកសរុបការងារប្រចាំឆ្នាំ២០២១ និងលើកទិសដៅការងារឆ្នាំ២០២២ នៅសាលាខេត្តត្បូងឃ្មុំ។
ឯកឧត្តមឧបនាយករដ្ឋមន្ត្រី ជា សុផារ៉ា បានលើកឡើងថា ក្នុងឆ្នាំកន្លងមកនេះក្រុមការងាររបស់រាជរដ្ឋាភិបាលចុះមូលដ្ឋានខេត្តត្បូងឃ្មុំ បានខិតខំយកចិត្តទុកដាក់អនុវត្តនូវតួនាទី និងភារកិច្ចរបស់ខ្លួនក្នុងការជម្រុញនិងលើកកម្ពស់ការទទួលខុសត្រូវលើការងារផ្តល់សេវាសាធារណៈ ការថែរក្សាសន្តិសុខសណ្តាប់ធ្នាប់ និងសុវត្ថិភាពសង្គម ព្រមទាំងការអភិវឌ្ឍនៅមូលដ្ឋានបានយ៉ាងល្អ និងចំគោលដៅ ទាំងការងារដោះបញ្ហាផ្សេងៗជូនប្រជាពលរដ្ឋ និងការស្តារ កសាងនូវហេដ្ឋារចនាសម្ព័ន្ធ នៅមូលដ្ឋាន ។
តែយ៉ាងណាឯកឧត្តម ក៏បានក្រើនរំលឹកដល់លោកមេភូមិ មេឃុំ អភិបាលក្រុងស្រុក ត្រូវសហការជាមួយកងកម្លាំងទាំង៣ ឲ្យទៅជាកម្លាំងប្រមូលផ្តុំតែមួយ ពោលគឺរៀបកម្លាំងខាងក្នុងបានល្អ ចេញទៅខាងក្រៅនឹងជោគជ័យ ដោយយកចិត្តទុកដាក់បំរើសេវាសាធារណៈ បំពេញតាមបំណងប្រាថ្នាជូនប្រជាពលរដ្ឋតាមគោលដៅឲ្យខានតែបាន និងមានប្រសិទ្ធភាពខ្ពស់។
ឯកឧត្តមឧបនាយករដ្ឋមន្ត្រី ក៏បានជម្រុញឱ្យថ្នាក់ដឹកនាំគ្រប់លំដាប់ថ្នាក់បានផ្សារភ្ជាប់ជាមួយប្រជាពលរដ្ឋនៅមូលដ្ឋាន សំដៅចូលរួមដោះស្រាយបញ្ហា ប្រឈម សំណូមពរ និងគាំទ្រជម្រុញការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលនីតិ កាលទី៦ នៃរដ្ឋសភា ឱ្យកាន់តែមានប្រសិទ្ធភាព។
ក្នុងឳកាសនោះ ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកពញាក្រែក ក៏បានឡើងអាននៅរបាយការណ៍សង្ខេបពាក់ព័ន្ធនឹងសមិទ្ធិផល និងលទ្ធផលការងារយ៉ាងច្រើនដែលក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំសម្រេចបានក្នុងឆ្នាំ២០២១នេះ និងលើកនូវផែនការទិសដៅសម្រាប់ឆ្នាំបន្ទាប់ផងដែរ។
ជាមួយគ្នានោះ ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ បញ្ជាក់ផងដែរថា សមិទ្ធិផល និងលទ្ធផលជាច្រើនដែលក្រុមការងាររាជរដ្ឋាភិបាលចុះមូលដ្ឋាន រួមទាំងអាជ្ញាធរមូលដ្ឋានក្នុងខេត្តត្បូងឃ្មុំទាំ សម្រេចបានសុទ្ធសឹងផ្តើមចេញពីកត្តាសន្តិភាព ដែលមានសម្តេចតេជោ ហ៊ុន សែន ជាប្រមុខដឹកនាំដ៏ឈ្លាសវៃ និងដោយមានការជ្រោមជ្រែងគ្រប់បែបយ៉ាងពីឯកឧត្តមឧបនាយករដ្ឋមន្ត្រី ជា សុផារ៉ា និងថ្នាក់ដឹកនាំក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំទាំងអស់ ។
ឯកឧត្តមបណ្ឌិត បន្ថែមថា លោកនឹងបន្តខិតខំដោះស្រាយនូវរាល់បញ្ហាប្រឈម សំណូមពរ និងសំណើនានារបស់ពលរដ្ឋក្នុងមូលដ្ឋានប្រកបដោយប្រសិទ្ធភាព តម្លាភាព និងគណនេយ្យភាព សំដៅកែលម្អ លើកកម្ពស់ជីវភាពរស់នៅរបស់ពលរដ្ឋឲ្យកាន់តែល្អប្រសើរឡើងជាលំដាប់។
ជាចុងក្រោយ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្ត បានប្រកាសគាំទ្រយ៉ាងពេញទំហឹង និងឳឡារិកក្នុងអង្គពិធីថា ឯកឧត្តមបណ្ឌិត ហ៊ុន ម៉ាណែត គឺជាបេក្ខជននាយករដ្ឋមន្ត្រីសម្រាប់ពេលអនាគត៕
