ខេត្តស្វាយរៀង៖នាព្រឹកថ្ងៃសុក្រ ១២កើត ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៤ ខែមករា ឆ្នាំ២០២២ ឯកឧត្ដម តូច ប៉ូលីវ៉ា អភិបាលរងខេត្ត និងជាប្រធានក្រុមការងារPWG-RWSSH តំណាងឯកឧត្ដមអភិបាលខេត្តស្វាយរៀង បានអញ្ជើញចូលរួមជាគណៈអធិបតីក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០២១ និងលើកទិសដៅឆ្នាំ២០២២ របស់ក្រុមការងារបច្ចេកទេសវិស័យផ្គត់ផ្គង់ទឹក ការសំអាត និងអនាម័យជនបទថ្នាក់ខេត្ត(PWG-RWSSH) និងប្រកាសលទ្ធផលពិនិត្យផ្ទៀងផ្ទាត់ ODF ( ការឈប់បន្ទោរបង់ពាសវាលពាសកាល ) ប្រជាជនបានប្រកាន់យកឥរិយាបទសំអាតដៃ និងប្រើប្រាស់ទឹកស្អាត ក្នងខេត្តស្វាយរៀង ដោយគណម្មការថ្នាក់ជាតិ ក្រោមអធិបតីភាព ឯកឧត្ដមបណ្ឌិត ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជន និងឯកឧត្ដម ថោង ពោជ អនុរដ្ឋលេខាធិការក្រសួងអភិវឌ្ឍន៍ជន នាសាលប្រជុំនន្ទីរ អគារ ខ សាលាខេត្តស្វាយរៀង ។
កិច្ចប្រជុំនេះមានការចូលរួមពី លោកប្រធាននាយកដ្ឋានថែទាំសុខភាពជនបទ លោក លោកស្រីអភិបាលរងក្រុងស្រុកទាំង០៨ លោកប្រធានមន្ទីរអភិវឌ្ឍន៍ជនខេត្ត លោក លោកស្រី គណកម្មការផ្ទៀងផ្ទាត់ ODF ថ្នាក់ជាតិ លោកប្រធានសម្របសម្រួលអង្គការ IDE ប្រចាំខេត្ត និងជាប្រធានសម្របសម្រួលអង្គការដៃគូ តំណាងនាយកដ្ឋានផ្គត់ផ្គង់ទឹកជនបទ នៃក្រសួងអភិវឌ្ឍន៍ជនបទ នាយកដ្ឋានថែទាំសុខភាពជនបទ នៃក្រសួងអភិវឌ្ឍន៍ជនបទ លោក លោកស្រី ប្រធានមន្ទីរ នានាជុំវិញខេត្តដែលជាសមាជិក PWG/RWSSH) លោក លោកស្រី លេខាធិការដ្ឋាន PWG/S តំណាងអង្គការដៃគូនានាក្នុងខេត្ត លោក លោកស្រី ប្រធានការិយាល័យអភិវឌ្ឍន៍សេដ្ឋកិច្ច និងអភិវឌ្ឍន៍សហគមន៍ក្រុង ស្រុកទាំង៨។
កិច្ចប្រជុំនេះរៀបចំក្នុងគោលបំណង
-បង្ហាញវឌ្ឍនភាពការងារផ្គត់ផ្គង់ទឹក ការសំអាត និង អនាម័យជនបទ ប្រចាំឆ្នាំ២០២១ និងទិសដៅឆ្នាំ២០២២ ដែលអនុវត្តដោយ PWG/RWSSH ខេត្តស្វាយរៀង ។
-ឆ្លុះបញ្ចាំងការពិនិត្យផ្ទៀងផ្ទាត់ ODF ខេត្តស្វាយរៀង ដោយគណកម្មការថ្នាក់ជាតិ និងប្រកាសលទ្ធផល ខេត្តស្វាយរៀងទទួលបាន ODF 100% ស្របតាមការប្រកាសលទ្ធផលផ្ទៃក្នុងកាលពីថ្ងៃ៣០ តុលា ឆ្នាំ២០២១ ។
