ក្នុងឆ្នាំ២០២១ ការផ្សព្វផ្សាយសារ និងវីដេអូពាក់ព័ន្ធនឹងដំណឹងក្លែងក្លាយ ព័ត៌មានមិនពិត ញុះញង់ បំពុលសង្គម និងជេរប្រមាថថ្នាក់ដឹកនាំសរុប១៩៣៨ ករណី
គណៈកម្មការតាមដានការផ្សព្វផ្សាយព័ត៌មានក្លែងក្លាយនៃក្រសួងព័ត៌មានបានបង្ហាញឱ្យដឹងថា នៅក្នុងឆ្នាំ២០២១នេះ គណៈកម្មការបានអនុវត្តន៍ការងារស្រង់ប្រភពដែលផ្សព្វផ្សាយសារ និងវីដេអូពាក់ព័ន្ធនឹងដំណឹងក្លែងក្លាយ ព័ត៌មានមិនពិត ញុះញង់ បំពុលសង្គម និងជេរប្រមាថថ្នាក់ដឹកនាំសរុបចំនួន១៩៣៨ ករណី។
យោងតាមរបាយការណ៍របស់គណៈកម្មការតាមដានការផ្សព្វផ្សាយព័ត៌មានក្លែង ក្លាយនៃក្រសួងព័ត៌មាន ដែលបានចេញផ្សាយ នាថ្ងៃទី១៧ ខែធ្នូ ឆ្នាំ២០២១នេះ បានឱ្យ ដឹងថា ក្នុងការផ្សាយសារ និងវីដេអូពាក់ព័ន្ធនឹងដំណឹងក្លែងក្លាយសរុបចំនួន១៩៣៨ ករណីនេះ ក្នុងនោះរួមមាន ញុះញង់រិះគន់រាជរដ្ឋាភិបាល និងប្រឌិតបំភ្លៃកាពិតចំនួន ១ ០២៣ ករណី ជេរប្រមាថព្រះមហាក្សត្រ និងថ្នាក់ដឹកនាំ ចំនួន៨០៩ ករណី ព័ត៌មានមិនពិត និង បំពុលសង្គមចំនួន ១០៦ ករណី។ ក្នុងចំណោមប្រភពដែលតែងតែផ្សាយព័ត៌មានមិនពិត ញុះញង់ ជេរប្រមាថខាងលើ គឺមានគណនី ទំព័រ Facebook, Tik Tok, YouTube គេហទំព័រ ចំនួន ៣៨៣ ដែលសកម្មក្នុងការផ្សព្វផ្សាយ។
បើតាមរបាយការណ៍គណៈកម្មការបានបញ្ជាក់ថា ចំពោះសកម្មភាពអនុគណៈកម្មការទំនាក់ទំនង និងចាត់វិធានការលើការផ្សព្វផ្សាយសារ និងវីដេអូពាក់ព័ន្ធនឹងដំណឹងក្លែងក្លាយ ព័ត៌មានមិនពិត ញុះញង់ បំពុលសង្គមទាំងនេះ គឺបានធ្វើការបញ្ជូនទៅក្រុមការងារអន្តរក្រសួងដើម្បីស្រាវជ្រាវ និងចាត់វិធានការចំនួន ៩៩ ករណី សមត្ថកិច្ចបានទទួលស្រាវជ្រាវ និងចាត់វិធានការជាបន្តបន្ទាប់។ ទន្ទឹមនេះ ឆ្លើយតបនឹងការផ្សាយវាយប្រហារមកលើរាជរដ្ឋាភិបាលកម្ពុជាគឺ ប្រព័ន្ធផ្សព្វផ្សាយរដ្ឋ និងឯកជន ព្រមទាំងអ្នកជំនាញបានចូលរួមបញ្ជាក់ បំភ្លឺ និងផ្សព្វផ្សាយបន្សាបនូវរាល់ការផ្សាយព័ត៌មានមិនពិតទាំងឡាយ និងបង្ហាញពីកិច្ចអភិវឌ្ឍន៍របស់រាជរដ្ឋាភិបាល។ ចំពោះសកម្មភាពក្រុមប្រឆាំងព័ត៌មាន ក្លែងក្លាយ គឺរួមមាន ក្រុមជួរមុខ (RNK, AKP, TVK, APP) បានបញ្ជូនព័ត៌មានពិត យ៉ាងសម្បូរបែបក្នុងនោះមានដូចជា ព័ត៌មានប្រចាំថ្ងៃអំពីស្ថានភាពនៃការឆ្លងរីករាលដាលជំងឺកូវីដ-១៩ យុទ្ធនាការចាក់វ៉ាក់សាំងការពារជំងឺកូវីដ-១៩ ទូទាំងប្រទេស សមិទ្ធផលរបស់រាជរដ្ឋាភិបាលកម្ពុជា បទយកការណ៍ បទអត្ថាធិប្បាយ និងបទវិចារណកថាជាច្រើន។ ជាមួយគ្នានេះដែរ ក៏ការចូលរួមរបស់ប្រព័ន្ធផ្សព្វផ្សាយឯកជន ដោយបានបញ្ជូនព័ត៌មានពិត ព័ត៌មានដែលត្រូវការផ្ទៀងផ្ទាត់ ការសុំអន្តរាគមន៍ជួយជនរងគ្រោះក្នុងករណីផ្សេងៗ និងការចូលរួមមតិទាក់ទងនឹងអ្នកឡាយតាមបណ្តាញទំនាក់ទំនងសង្គម ធ្វើឱ្យប៉ះពាល់ដល់វប្បធម៌ សីលធម៌សង្គម កិត្តិយស សេចក្តីថ្លៃថ្នូ និងតម្លៃស្រ្តីជាដើម។
បើតាមរបាយការណ៍របស់គណៈកម្មការក៏បានធ្វើការកត់សម្គាល់ និងបង្ហាញឱ្យឃើញផងដែរថា អង្គភាពសារព័ត៌មានចុះបញ្ជីនៅក្រសួងព័ត៌មាន ផ្សព្វផ្សាយព័ត៌មានបំភ្លើស និងមិនមានការផ្ទៀងផ្ទាត់ច្បាស់លាស់ចំនួន ១១ អង្គភាព។
ក្នុងរបាយការណ៍របស់គណៈកម្មការតាមដានការផ្សព្វផ្សាយព័ត៌មានក្លែង ក្លាយនៃក្រសួងព័ត៌មានក៏បានដាក់ចេញនូវទិសដៅការងារ ដើម្បីបន្តតាមដានការផ្សាយ ព័ត៌មានមិនពិតតាមបណ្តាញទំនាក់ទំនងសង្គមបន្ថែមទៀតដូចជា Twitters, WeChat, Telegram ជាដើម ក្រៅពី Facebook, YouTube និង Tik Tok។ ស្វែងរកកិច្ចសហការ ពីដៃគូនានា ជាពិសេសអ្នកតំណាងរបស់បណ្តាញសង្គមនីមួយៗ។ កំណត់ និងចងក្រង មុខសញ្ញា ដែលផ្សព្វផ្សាយព័ត៌មានមិនពិត ដើម្បីស្នើសុំកិច្ចសហការជាមួយក្រុមការងារអន្តរក្រសួង៕
