លោកស្រី ទេព រង្ស៉ី ខៀវកាញារីទ្ធ កោតសរសើរលោកគ្រូ អ្នកគ្រូថ្នាក់ដឹកនាំសាលា ដែលបានយកចិត្តទុកដាក់មើលថែ និងជួយបង្រៀនដល់កុមារខ្សោយសតិបញ្ញា និងអូទីស្សឹមនៅក្រុងតាខ្មៅ

(កណ្តាល)៖ លោកស្រី ទេព រង្ស៉ី ខៀវ កាញារីទ្ធ ប្រធានកិត្តិយសសមាគមន៍នារីកម្ពុជា ដើម្បីសន្តិភាព និងអភិវឌ្ឍន៍សាខា ក្រសួងព័ត៌មាន បានកោតសរសើរ និងវាយតម្លៃខ្ពស់ ចំពោះលោកគ្រូ អ្នកគ្រូ ថ្នាក់ដឹកនាំសាលា ដែលបានយកចិត្តទុកដាក់ក្នុងការមើលថែ និងជួយបង្រៀនដល់កុមារខ្សោយសតិបញ្ញា និងអូទីស្សឹម ព្រោះថាកុមារខ្សោយសតិបញ្ញា និងអូទីស្សឹម ខណ:ដែលពួកគាត់មានលក្ខណៈខុសពីកុមារធម្មតា ដែលមិនងាយក្នុងការគ្រប់គ្រង និងបង្ហាត់បង្រៀនឡើយ។

លោកស្រីបានថ្លែងកោតសរសើរបែបនេះ នៅគ្រាដែលលោកស្រី បានដឹកនាំភរិយាថ្នាក់ដឹកនាំ និងសប្បុរសជននានា អញ្ជើញចុះសួរសុខទុក្ខ និងឧបត្ថម្ភសិស្សអូទីស្សឹម នៃវិទ្យាល័យអប់រំពិសេសក្រុងតាខ្មៅ ស្ថិតនៅក្រុងតាខ្មៅ ខេត្តកណ្ដាល នៅថ្ងៃទី១៦ ខែធ្នូ ឆ្នាំ២០២១នេះ។

លោក ចាន់ សារិន នាយកវិទ្យាល័យអប់រំពិសេស ក្រុងតាខ្មៅ និងជាប្រធានអង្គការ HHC បានឲ្យដឹងថា សាលាកុមារអូទីស្សឹម នៃអង្គការ HHC បានបង្កើតឡើងក្នុងរយៈពេល៩ឆ្នាំ ហើយបានប្រមូលកុមារពិការភាព ខ្សោយសតិបញ្ញា និងអូទីស្សឹមឲ្យបានចូលរៀនស្របតាមច្បាប់អប់រំជាតិ និងគោលនយោបាយរបស់រាជរដ្ឋាភិបាលកម្ពុជា ដែលដឹកនាំដោយសម្តេចតេជោ នាយករដ្ឋមន្រ្តី ដោយសហការជាមួយមន្ទីរអប់រំ យុវជន និងកីឡាខេត្ត មន្ទីរព័ត៌មាន មន្ទីរសង្គមកិច្ច ដើម្បីរៀបចំសាលាកុមារអូទីស្សឹម បានចំនួន៥ទីតាំង ដោយប្រើប្រាស់ថវិកាឧបត្ថម្ភ សម្តេចប្រធានកាកបាទក្រហមកម្ពុជា ព្រមទាំងស្ថានទូតប៉ូឡូញ ប្រចាំទីក្រុងបាងកក ស្ថានទូតសាំងហ្គាពួរជាដើម។

លោកថា សព្វថ្ងៃនេះមានកុមារពិការខ្សោយសតិបញ្ញា និងអូទីស្សឹម បានចុះឈ្មោះចូលរៀនបានចំនួន២០៥នាក់ ស្រី៦៨ ព្រមទាំងបានជួយបង្រៀនកុមារ ដែលមានពិការភាពធ្ងន់ធ្ងរនៅតាមផ្ទះបានចំនួន២៥នាក់ផងដែរ។ ដោយមានការគាំទ្រពីរាជរដ្ឋាភិបាលកម្ពុជា អាណាព្យាបាល និងសប្បុរសជននានា និងដោយសារសិស្ស ពិការភាពសតិបញ្ញា និងអូទីស្សឹម មានការកើនឡើង ប្រមុខរាជរដ្ឋាភិបាលកម្ពុជា តាមរយៈក្រសួងអប់រំ បានប្រែក្លាយ សាលាអង្គការជំនួយ នៃក្ដីសង្ឃឹមសម្រាប់សហគមន៍ HHC ឲ្យទៅជាវិទ្យាល័យអប់រំពិសេស ក្រុងតាខ្មៅ កាលពីថ្ងៃទី០៣ ខែ កុម្ភៈ ឆ្នាំ២០២១ ដែលអនុញ្ញាតអោយវិទ្យាល័យមួយនេះ មានវិសាលភាពចាប់ពីកម្រិតមត្តេយ្យសិក្សា រហូតដល់មធ្យមសិក្សា។

ក្នុងដំណើរសួរសុខទុក្ខនេះ លោកស្រី ទេព រង្ស៉ី ខៀវ កាញារីទ្ធ បាននាំយកនូវសម្ភារៈ និងថវិកាមួយចំនួន ដែលបានឧបត្ថម្ភពីសប្បុរសជននានា ជូនដល់វិទ្យាល័យអប់រំពិសេសក្រុងតាខ្មៅ ដោយក្នុងនោះរួមមាន៖ អង្ករ៥០០គីឡូក្រាម និងថវិកា១៨,០០០ដុល្លារ និងបានឧបត្ថម្ភដល់លោកគ្រូ អ្នកគ្រូ ក្នុងម្នាក់ៗទទួលបាន អាវរងាចំនួន១ និងថវិកា៥ម៉ឺនរៀល។

បន្ទាប់មកគណអធិបតី បានអបអរសាទរខួប៩ឆ្នាំ ក្នុងការបង្កើតអង្គការ HHC ហើយសព្វថ្ងៃនេះប្រែក្លាយជាវិទ្យាល័យអប់រំពិសេស ក្រុងតាខ្មៅ និងអញ្ជើញទស្សនាការលេងល្បែងកម្សាន្ដនានា ពីសំណាក់កុមារខ្សោយសតិបញ្ញា និងអូទីហ្សឹម៕