ខេត្តបាត់ដំបង ៖ មានការរិះគន់ពីអ្នករកស៊ីដឹកទំនិញនៅថ្ងៃទី៥ខែកុម្ភ:ឆ្នាំ២០១៧ថា លោក យ៉ែម ហេមរ៉ាត់ ប្រធានការរិយាល័យគយនិងរដ្ឋាករច្រកអូររំដួលចុះបង្ក្រាបឃ្លាំងទំនិញមិនស្មើភាពគ្នា ព្រោះឃ្លាំងទំនិញមួយចំនួនទៀតមិនបានឆែកឆេរទេ។
គួរបញ្ជាក់ថា ៖ នៅម៉ោង១០.៣០នាទីថ្ងៃទី៣ខែកុម្ភះឆ្នាំ២០១៧ លោក យ៉ែម ហេមរ៉ាត់បានសហការជាមួយលោក ពុទ សុខាជំនួយការនាយកដ្ឋានបង្ការនិងបង្ក្រាបបទល្មើសបានដឹកនាំមន្ត្រីគយចល័តក្រោមឱវាទអមដោយដីការអនុញ្ញាតអោយឆែកឆេលេខ៤៦៩ត.ទ្រ សហការជាមួយកងរាជអាវុធហត្ថលើផ្ទៃប្រទេស ព្រមទាំងអាជ្ញាធរមូលដ្ឋានគ្រប់ស្ថាប័ណ្ណចុះឆែកឆេរឃ្លាំងផ្ទុកទំនិញដែលជាកម្មសិទ្ធិឈ្មោះ ចាន់ ធូ ភេទស្រីអាយុ៣២ឆ្នាំហើយនិងប្ដីជាជនជាតិថៃឈ្មោះ ចាន សម្ប្តត្តិភេទប្រុសអាយុ៥៥ឆ្នាំ ព្រមទាំងម្ចាស់ទំនិញមានឈ្មោះថា ផេង តុងហេងភេទប្រុសអាយុ៣៣ឆ្នាំរស់នៅភូមិ គីឡូលេខ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ។
ក្រោយពីត្រួតពិនិត្យរួចបានឃើញក្នុងទំនិញទាំងនោះ មានដូចជាការបូបយួរដៃសំរាប់ស្ដ្រីចំនួន ១៩៨៨ គីឡូក្រាម និងកាបូបស្ពាយរបស់ស្ត្រីចំនួន២៨៥គីឡូក្រាម ព្រមទាំងខ្សែក្រវ៉ាត់មានចំនួន២៤០ខ្សែស្មើនិង២៤គីឡូក្រាមមុខទំនិញទាំងនោះសុទ្ទតែគ្មានពន្ធនាំចូលទេ។
ដោយឃើញទំនិញទាំងអស់នោះសុទ្ទតែអត់មានពន្ធ ដូច្នេះមន្ត្រីគយបានសម្រេចឃាត់ទំនិញបទល្មើសទាំងអស់នោះរក្សាទុកនៅទីស្នក់ការគយ និងរដ្ឋាករច្រកអូររំដួល ដែលស្ថិតនៅភូមិអូរឃុំពេជ្រចន្ដារស្រុកភ្នំព្រឹកខេត្តបាត់ដំបង រួចធ្វើកំណត់ហេតុល្មើសច្បាប់គយ ដើម្បីបញ្ជូនមកអគ្គនាយកដ្ឋានគយនិងរដ្ឋារកម្ពុជាដើម្បីរងចាំសេចក្ដីសម្រេចវិនិច្ឆ័យដ៏ខ្ពង់ខ្ពស់ពី ឯកឧត្តម អគ្គនាយកនៃអគ្គនយកដ្ឋានគយនិងរដ្ឋាករកម្ពុជា ៕
