ខេត្តប៉ៃលិន ៖ អាជ្ញាធរ និងមន្ត្រីជំនាញពាក់ព័ន្ធបានសម្របសម្រួលដោះស្រាយការសាងសង់ទំនប់ស្ទាក់ទឹករបស់ក្រុមហ៊ុនទឹកស្អាត «ថូម៉ាក់» នៅខាងក្រោមរម្មណីយដ្ឋានទឹកធ្លាក់អូរតាវ៉ៅ ដើម្បីរក្សាទុកទឹកប្រើប្រាស់ ចែកចាយជូនប្រជាពលរដ្ឋនារដូវប្រាំងឆ្នាំ២០១៧ ខាងមុខនេះ ។ ក្រោយពីការសាងសង់ទំនប់នេះ មានការជំទាស់ពីម្ចាស់រម្មណីយ៍ដ្ឋានទឹកធ្លាក់អូរតាវ៉ៅ និង សហគមន៍ប្រើប្រាស់ទឹកស្អាតសង្កាត់អូរតាវ៉ៅផងដែរ ។
បើតាមតំណាងម្ចាស់រម្មណីយ៍ដ្ឋានទឹកធ្លាក់អូរតាវ៉ៅបានឱ្យដឹងថា ការសាងសង់ទំ នប់បេតុងស្ទាក់ទឹនេះ អាចធ្វើឱ្យបះពាល់ដល់បរិស្ថាន និង ធនធានធម្មជាតិ ដែលបញ្ហានេះលោកស្នើសុំឱ្យអាជ្ញាធរ និង មន្ត្រីពាក់ព័ន្ធធ្វើការសិក្សាតាមលក្ខណៈបច្ចេកទេសសិន ដើម្បីធានា និង ទទួលខុសត្រូវចំពោះការបះពាល់នាថ្ងៃអនាគត ។
ចំណែកតំណាងសហគមន៍ប្រើប្រាស់ទឹកស្អាតអូរតាវ៉ៅ បានលើកឡើងថា ការធ្វើទំ នប់ស្ទាក់ទឹកនេះ ខាងសហគមន៍មិនជំទាស់អ្វីទេ ។ តែពេលធ្វើទំនប់រួចហើយ ក្រុមហ៊ុនទឹកស្អាត ថូម៉ាក់ ត្រូវចែកចាយទឹកដល់សហគមន៍ប្រើប្រាស់ឱ្យបានគ្រប់គ្រាន់ និង ស្មើភាពគ្នា ជាពិសេសការសុំស្នើពីប្រជាពលរដ្ឋរស់នៅក្បែរនោះ ។
បើតាមលោក កើត សុធា អភិបាលខេត្តប៉ៃលិន បានឱ្យដឹងកាលពីថ្មីៗ កន្លងទៅនេះថា ការសាងសង់ទំនប់ស្ទាក់ទឹកនេះ ក្រុមហ៊ុន «ថូម៉ាក់» មានបំណងរក្សាទឹក ទុកប្រើប្រាស់ នារដូវប្រាំងខាងមុខ ព្រោះថា កាលពីរដូវប្រាំងឆ្នាំ២០១៦កន្លងមក ក្រុមហ៊ុនមិនអាចផ្គត់ផ្គង់ទឹកចែកចាយ ជូនប្រជាពលរដ្ឋនៅក្នុងក្រុងបានគ្រប់គ្រាន់នោះឡើយ។ ហេតុដូច្នេះហើយ ក្រុមហ៊ុនធ្វើទំនប់ស្ទាក់ទឹកនេះ ដើម្បីត្រៀមទឹកទុកដោះស្រាយបញ្ហាខ្វះខាតជូនប្រជាពលរដ្ឋនៅរដូវប្រាំងខាងមុខ កុំឱ្យខ្វះខាតដូចរដូវប្រាំងដូចឆ្នាំមុនៗទៀត ។
លោកបន្តទៀតថា នាបច្ចុប្បន្ននេះ ស្របតាមគោលនយោបាយរបស់រាជរដ្ឋាភិបាល គឺសម្តេចតេជោ ហ៊ុន សែន បានអំពាវនាវដល់អាជ្ញាធរ មន្ទីរធនធានទឹក និងក្រុមហ៊ុនផ្គត់ផ្គង់ទឹកស្អាតទាំងអស់ ត្រូវតែមានវិធានការធ្វើអាងស្តុកទឹក ទំនប់ស្ទាក់ទឹក ទុកសំរាប់ប្រើប្រាស់នាពេលខ្វះខាតទឹកប្រើប្រាស់នៅថ្ងៃណាមួយ ។
លោកបានបញ្ជាក់ទៀតថា ក្នុងនាមអាជ្ញាធរ និង មន្ត្រីមន្ទីរជំនាញពាក់ព័ន្ធ ព្រមទាំងភាគី ទំនាស់ទាំងអស់ នឹងបើកកិច្ចប្រជុំដោះស្រាយនាពេលឆាប់ៗខាងមុខនេះ ដើម្បីពិនិត្យ ផ្នែកបច្ចេកទេស និង ផលប៉ះពាល់ ដែលអាចទទួលយកបានទាំងអស់គ្នា ធ្វើយ៉ាងណាឈរលើការការពារផលប្រយោជន៍ និង ការផ្តល់សេវ៉ាជូនប្រជាពលរដ្ឋផងដែរ ។
សូមបញ្ជាក់ថា ទំនប់ស្ទាក់ទឹក ដែលក្រុមហ៊ុនទឹកស្អាត ថូម៉ាក់ សាងសង់នេះ គឺធ្វើអំពីបេតុងអាមេ មានប្រវែង២៥ម៉ែត្រ ទទឺង៨តឹក ដែលស្ថិតនៅផ្នែកខាងលើស្ពានទី១ ក្នុងតំបន់រមនីយដ្ឋានទឹកធ្លាក់អូរតាវ៉ៅ ក្នុងភូមិខ្លុង សង្កាត់អូរតាវ៉ៅ ក្រុងប៉ៃលិន ៕
ដោយ ៖ នីយ៉ា
