ខេត្តប៉ៃលិន ៖ បើតាមការរៀបរាប់ពីប្រជាពលរដ្ឋរស់នៅក្នុងខេត្តប៉ៃលិន បានឱ្យដឹង ថា បន្ទាប់ពីពួកគាត់បានអាន និង ទស្សនាព័ត៌មានកាលពីពេលថ្មីៗកន្លងមក ដោយឃើញខាងមន្ត្រីអគ្គនាយកដ្ឋានកាំកុងត្រូល និង មន្ត្រីជំនាញសាខាកាំកុងត្រូល ខេត្តព្រះសីហនុ រកឃើញសារធាតុគីមី នៅលើគ្រឿងសមុទ្រស្រស់ និងអាហារទទួលទានមួយចំនួន ដែលអាជីវករដាក់លក់នៅលើទីផ្សារវាលរេញ ខេត្តព្រះសីហនុ កាលពីព្រឹកថ្ងៃអង្គារទី១៧ ខែមករា ឆ្នាំ២០១៧ កន្លងទៅ ដោយរកឃើញបង្គាស្រស់ និងស្ពៃជ្រក់មានផ្ទុកសារធាតុគីមី រហូតមកដល់ថ្ងៃទី៣១ ខែមករា ឆ្នាំ២០១៧ នេះ ប្រជាពលរដ្ឋជាច្រើន រស់នៅក្នុងខេត្តប៉ៃលិន មានការព្រួយបារម្ភយ៉ាងខ្លាំងចំពោះសុវត្ថិភាព សុខភាពម្ហូបអាហារ ខណៈពួកគេទិញពីផ្សារយកទៅទទួលទាន នៅមានមន្ទិលក្នុងខ្លួនថា មិនដឹងជាម្ហូបអាហារជាច្រើន ដូចជាត្រី សាច់ជ្រូក សាច់គោ បង្គារ បង្កង មឹក និងងៀវ ដែលអាជីវករលក់ដូរនៅក្នុងផ្សារសាមគ្គី ហៅប៉ាហ៊ី និងផ្សារជាច្រើនទៀត មានសារធាតុគីមីដែរ ឬអត់នោះទេ ។
ប្រភពបន្តទៀតថា ក្រោយពីមន្ត្រីជំនាញខេត្តព្រះសីហនុ បានដកហូតចំណីអាហារមានផ្ទុកសារធាតុគីមីមានស្ពៃជ្រក់ និងបង្គារស្រស់ប្រមាណ១៤គីឡូក្រាម ទៅរក្សាទុកនៅសាខាកាំកុងត្រូលខេត្តព្រះសីហនុ ដើម្បីឈានដល់មានវិធានការតាមផ្លូវច្បាប់ និងដុតកម្ទេ ចចោល ។
ប្រភពបន្តទៀតថា ស្រាប់តែមន្ត្រីជំនាញពេទ្យសត្វខេត្តព្រៃវែង កាលពីព្រឹកថ្ងៃទី១៩ ខែមករា ឆ្នាំ២០១៧ កន្លងទៅ បានបើកប្រតិបត្តិការ ចុះត្រួតពិនិត្យអនាម័យម្ហូបអាហារ ស្ថិតនៅចំណុចភូមិព្រៃអាស្ទាំង ឃុំអង្គររាជ្យ ស្រុកព្រះស្តេច ខេត្តព្រៃវែង បានរកឃើញគ្រឿងក្នុងសត្វគោ ខូចគុណភាពចំនួន១២៥គីឡូក្រាម ដែលត្រូវឈ្មួញនាំចូលមកពីប្រទេសវៀតណាម ហើយមានដាក់លាយសារធាតុគីមី អាចរក្សាទុកបានយូរ ។ ជាពិសេសការដឹកជញ្ជូនគឺគ្មានការត្រួតពិនិត្យពីមន្ត្រីជំនាញ ដោយពុំមានលិខិតបញ្ជាក់ពីអនាម័យសត្វ និង គុ ណភាពផលិតផលពីមន្ត្រីពេទ្យសត្វ និងពុំមានលិខិតអនុញ្ញាតិឱ្យនាំចូលពីក្រសួងកសិកម្ម រុក្ខាប្រមាញ់និងនេសាទនោះទេ ។
ប្រជាពលរដ្ឋបានលើកឡើងទាំងក្តីព្រួយបារម្ភបន្តទៀតថា ហេតុដូច្នេះហើយ ជារៀងរាល់ថ្ងៃនេះ នៅក្នុងខេត្តប៉ៃលិន ទោះបីជាពួកគាត់ឧស្សាហ៍ឃើញខាងកាំកុងត្រូលដើរឆែក ឆេររកទំនិញខូចគុណភាព និងហួសសុពលភាពនៅតាមតូបលក់ដូររបស់ប្រជាពលរដ្ឋជាញឹកញាប់ក៏ដោយ ។
តែចំពោះបញ្ហាម្ហូបអាហារ ត្រី សាច់ និងគ្រឿងម្ហូបផ្សេងៗជាច្រើននៅក្នុងផ្សារ ពួកគាត់មិនសូវឃើញមានការត្រួតពិនិត្យប៉ុន្មាននោះទេ ទើបធ្វើឱ្យមានការព្រួយបារម្ភយ៉ាងខ្លាំងចំពោះបញ្ហាមួយនេះ ខណៈពួកគាត់ទិញរបស់ទាំងនោះយកមកទទួលទានជួបជុំគ្រួសារ ជារឿងរាល់ថ្ងៃ ។ លើសពីនេះ បញ្ហាសារធាតុគីមី នៅក្នុងម្ហូបអាហារ ដែលអាជីវករដាក់លក់នៅក្នុងផ្សារខេត្តប៉ៃលិន ក៏អាចនឹងមានជាច្រើនគួរឱ្យព្រួយបារម្ភផងដែរ ៕
