ប៉ៃលិន ៖ ស្មៀនឃុំសាលាក្រៅ ជាមួយនឹងប្រពន្ធកូនត្រូវគេវាយសម្លាប់ចងលួសរឹតក និងដុតឆេះខ្លោចក្នុងផ្ទះយ៉ាងព្រៃផ្សៃ កាលពីវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី២១ ខែវិច្ឆិកា ឆ្នាំ២០១៤ នៅចំណុចភូមិអូរ៧៥ ឃុំអូរអណ្ដូង ស្រុកសាលាក្រៅ ខេត្តប៉ៃលិន។ ក្រោយកើតហេតុសមត្ថកិច្ចចម្រុះចុះពិនិត្យសាកសពនិងស្រាវជ្រាវរកមុខសញ្ញាផងដែរ។
សាក្សីឈ្មោះឆោម ចំណាន អាយុ ៣២ឆ្នាំ ជាបងជនរងគ្រោះដែលមានផ្ទះជាប់គ្នាបានរៀបរាប់ថា វេលាម៉ោង១២ រំលងអធ្រាត្រ នៅពេលដែលគាត់កំពុងតែដេកលង់លក់ ស្រាប់តែឮស្នូររប៉េះរប៉ោះ ហើយឃើញភ្លើងក្រហម គាត់ក៏រត់ចេញមកក្រៅទើបឃើញភ្លើងកំពុងឆាបឆេះផ្ទះរបស់បងខ្លួន។ ពេលនោះគាត់ក៏បានឃើញម៉ូតូជនសង្ស័យ២គ្រឿងបានជិះចេញ បន្ទាប់មកគាត់ក៏បានស្រែកហៅឲ្យអ្នកជិតខាងជួយពន្លត់ភ្លើង ទើបដឹងថាបងនិងក្មួយរបស់ខ្លួនបានស្លាប់បាត់ទៅហើយ។
ជនរងគ្រោះដែលស្លាប់ក្នុងហេតុការណ៍នេះមានឈ្មោះ ហេង រ៉ាវី អាយុ ២៨ឆ្នាំមុខរបរជាស្មៀនឃុំសាលាក្រៅនិងជាម្ចាស់សៃឡូទទួលទិញពោតដំឡូងផងដែរនិងប្រពន្ធ-ឈ្មោះ ធី ផលឡៃ អាយុ២៤ឆ្នាំ មុខរបរលក់ដូរចាប់ហួយ និងកូនឈ្មោះ ហេង ម៉េងជូ អាយុ ៦ខែ រស់នៅក្នុងភូមិឃុំកើតហេតុខាងលើ ។
សមត្ថកិច្ចបានបញ្ជាក់ថា ករណីនេះគឺជាអំពើឃាតកម្ម ដោយសារគំនុំ វាយរឹតកសម្លាប់រួចដុតផ្ទះជាក្រោយ ព្រោះ ជនរងគ្រោះសុទ្ធតែមានលួសរុំជាប់បំពងក សមត្ថកិច្ច កំពុងធ្វើការស្រាវជ្រាវស៊ើបអង្កេតរកជនសង្ស័យយកមកផ្ដន្ទាទោសតាមផ្លូវច្បាប់ ៕
