មណ្ឌលគីរី ៖ ក្រុមយុវជននៃអង្គការសប្បុរសធម៌កុលបុត្រកម្ពុជា ធ្វើដំណើរមកដល់ខេត្តមណ្ឌលគិរី ហើយ នៅព្រឹកថ្ងៃទី៣០ខែ មករាឆ្នាំ២០១៧នេះ ក្នុងយុទ្ធនាការរៃអង្គាសប្រាក់ពីប្រជាពលរដ្ឋទូទៅជួយដល់មន្ទីរពេទ្យគន្ធបុប្ផា សម្រាប់ព្យាបាលជំងឺដល់កុមារ និងជួយដល់អង្គការសប្បុរសធម៌កុលបុត្រ សម្រាប់សាងសង់អគារស្នាក់នៅរបស់កុមារកំព្រា។
ក្រុមយុវជននៃអង្គការសប្បុរសធម៌កុលបុត្រកម្ពុជា ប្រមាណ ១២នាក់ បានធ្វើដំណើរដោយជិះកង់ចាកចេញពីខេត្តរតនះគិរី កាលពីថ្ងៃទី២៩ ខែមករា ឆ្ពោះមកខេត្តមណ្ឌលគិរី ដែលជាខេត្តទី១២ ដើម្បីរួមគ្នាជាមួយក្រុមយុវជនយុវនារីនៃសហភាពសហព័ន្ធយុវជន និងយុវជន១៥៧កាកបាទក្រហមខេត្តមណ្ឌលគិរី ២៥នាក់ ដើររៃអង្គាសប្រាក់ជាលើកទីពីរ នៅទីផ្សារក្រុងសែនមនោរម្យ ដើម្បីប្រមូលថវិកាផ្ដល់ទៅឲ្យមន្ទីរពេទ្យគន្ធបុប្ផា ជួយកុមារកំពុងព្យាបាលជំងឺក្នុងមន្ទីរពេទ្យនេះ និងអង្គការសប្បុរសធម៌កម្ពុជាកុលបុត្រ សម្រាប់សាងសង់អគារស្នាក់នៅរបស់កុមារកំព្រាផងដែរ ។
ក្រុមយុវជនស្ម័គ្រចិត្តដើររៃអង្គាសប្រាក់ អ្នកខ្លះកាន់បដារូបភាពមានអត្ថន័យ កង់គន្ធបុប្ផាគ្មានស្រា កង់គន្ធបុប្ផា ១លានដុល្លារ និងកង់គន្ធបុប្ផា ២៥ខេត្តក្រុង។ ក្រៅពីបដាពាក្យស្លោកអ្នកស្ម័គ្រចិត្ត ខ្លះទៀតកាន់ហិបប្រមូលវិភាគទាន ខ្លះកាន់ឧបករណ៍បំពងសំឡេងអំពាវនាវឲ្យសប្បុរសជនចូលរួមជាមួយយុទ្ធនាការសប្បុរសធម៌នៅទូទាំង ២៥ ខេត្ត ក្រុងនៃប្រទេសកម្ពុជា។
សំឡេងអំពាវនាវតាមឧបករណ៍បំពងសំឡេងដាស់អារម្មណ៍ប្រជាពលរដ្ឋក្រុងសែនមនោតម្យ មិនថាមនុស្សចាស់ ឬមនុស្សវ័យកណ្ដាលនោះទេ សូម្បីកុមារក៏បានចូលរួមបរិច្ចាគ ប្រាក់ក្នុងហិបប្រាក់មនុស្សធម៌ជាហូរហែពេញមួយថ្ងៃនៃយុទ្ធនាការជិះកង់ប្រមូលថវិកាសប្បុរសនៅខេត្តមណ្ឌលគិរីនេះ។
អនុប្រធានក្រុមយុវជននៃអង្គការសប្បុរសធម៌កម្ពុជាកុលបុត្រ លោក ធុល វិសាល បានអោយដឹងថា យុទ្ធនាការសប្បុរសធម៌នេះគឺមានគោលបំណងប្រមូលប្រាក់ជួយកុមារកម្ពុជា ហើយថវិកាដែលប្រមូលបាននោះ ៥០% ជួយមន្ទីរពេទ្យគន្ធបុប្ផា និង ៥០% ជួយអង្គការសប្បុរសធម៌កម្ពុជាកុលបុត្រ ដើម្បីកសាងមណ្ឌលកុមារកំព្រា និងធ្វើអគារស្នាក់នៅឲ្យកុមារកំព្រា។
លោកបន្តថា យុទ្ធនាការនេះគ្រោងប្រមូលថវិកាឲ្យបាន ១លានដុល្លារសម្រាប់ដំណើរជិះកង់នៅខេត្តក្រុងចំនួន២៥។យុទ្ធនាការជិះកង់ ២៥ខេត្ត-ក្រុងនេះ បានឆ្លងកាត់ខេត្តចំនួន ១១ រួមមានខេត្តកំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ សៀមរាប កំពង់ធំ ព្រះវិហារ ស្ទឹងត្រែងនឹង រតនះគិរី។ ខេត្តដែលប្រមូលថវិកាបានច្រើនជាងគេគឺខេត្តប៉ៃលិន ប្រមូលថវិកាបានជាង ១ម៉ឺនដុល្លារ។
លោក សាង រ៉ា អនុប្រធាន (ស ក យ ក) ខេត្តមណ្ឌលគិរីបានអោយដឹងថា សកម្មភាពយុវជន១៥៧កាកបាទក្រហម និងសកម្មជនសហភាពសហព័ន្ធយុវជនកម្ពុជា ខេត្តមណ្ឌលគិរី ២៥នាក់ បានចូលរួមប្រមូលប្រាក់នៅខេត្តមណ្ឌលគិរី ជាមួយយុវជនជិះកង់ប្រមូលថវិកាសប្បុរសនេះ។
លោកថា នេះជាសកម្មភាពមនុស្សធម៌ដ៏សំខាន់ដែលយុវជននៅខេត្តភាគឦសានសម្រេចចិត្តចលនាមហាជនឲ្យបរិច្ចាគប្រាក់ដើម្បីប្រយោជន៍សង្គម៕
