ប៉ៃលិន៖ នៅរសៀលថ្ងៃទី២៦ ខែកញ្ញា ឆ្នាំ២០២៦ លោកស្រីបណ្ឌិត បាន ស្រីមុំ អភិបាលខេត្តប៉ៃលិន និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត បានដឹកនាំមន្ត្រីជំនាញ អាជ្ញាធរមូលដ្ឋាន និងក្រុមការងារ ចុះពិនិត្យស្ថានភាពផលប៉ះពាល់ និងផ្តល់អំណោយសង្គ្រោះបន្ទាន់ជូនប្រជាពលរដ្ឋដែលរងផលប៉ះពាល់ដោយជំនន់ទឹកភ្លៀង នៅឃុំស្ទឹងត្រង់ ស្រុកសាលាក្រៅ ខេត្តប៉ៃលិន។
ជំនន់ទឹកភ្លៀងនេះកើតឡើងបន្ទាប់ពីមានភ្លៀងធ្លាក់ខ្លាំងជាបន្តបន្ទាប់អស់រយៈពេលជាច្រើនថ្ងៃ បណ្តាលឱ្យទឹកហូរជន់លិច និងប៉ះពាល់ដល់លំនៅឋានប្រជាពលរដ្ឋ ហេដ្ឋារចនាសម្ព័ន្ធ ផ្លូវថ្នល់ និងផលដំណាំកសិកម្មមួយចំនួន។
ក្នុងឱកាសចុះជួបប្រជាពលរដ្ឋ លោកស្រីបណ្ឌិត បាន ស្រីមុំ បាននាំយកប្រសាសន៍ផ្តាំផ្ញើសួរសុខទុក្ខ និងក្តីនឹករលឹកពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជូនដល់ប្រជាពលរដ្ឋដែលកំពុងរងផលប៉ះពាល់ដោយគ្រោះធម្មជាតិ។
លោកស្រីអភិបាលខេត្តបានបញ្ជាក់ថា រាជរដ្ឋាភិបាលតែងយកចិត្តទុកដាក់ចំពោះសុខទុក្ខ និងសុវត្ថិភាពរបស់ប្រជាពលរដ្ឋ ហើយបានណែនាំដល់រដ្ឋបាលខេត្ត និងអាជ្ញាធរពាក់ព័ន្ធ ឱ្យចុះពិនិត្យស្ថានភាពជាក់ស្តែង និងជួយដោះស្រាយបញ្ហាជូនប្រជាពលរដ្ឋដែលរងផលប៉ះពាល់ឱ្យបានទាន់ពេលវេលា ដោយមិនប្រកាន់វណ្ណៈ ជាតិសាសន៍ ពណ៌សម្បុរ ឬនិន្នាការនយោបាយឡើយ។
លោកស្រីអភិបាលខេត្តបានលើកឡើងថា គ្រោះមហន្តរាយធម្មជាតិមិនអាចកំណត់ទុកជាមុនបានឡើយ ដូច្នេះ រាជរដ្ឋាភិបាល អាជ្ញាធរមានសមត្ថកិច្ចគ្រប់លំដាប់ថ្នាក់ និងប្រជាពលរដ្ឋ ត្រូវចូលរួមអនុវត្តវិធានការបង្ការ ទប់ស្កាត់ និងសង្គ្រោះ ដើម្បីការពារអាយុជីវិត និងទ្រព្យសម្បត្តិរបស់ប្រជាពលរដ្ឋឱ្យបានទាន់ពេលវេលា និងមានប្រសិទ្ធភាព។
លោកស្រីក៏បានថ្លែងការកោតសរសើរចំពោះកងកម្លាំងប្រដាប់អាវុធ និងអាជ្ញាធរមានសមត្ថកិច្ចគ្រប់លំដាប់ថ្នាក់ ដែលបានសហការគ្នាយ៉ាងសកម្មក្នុងការត្រៀមបង្ការ តាមដានស្ថានភាព និងជួយសង្គ្រោះប្រជាពលរដ្ឋនៅតំបន់ប្រឈមនានា។ លោកស្រីបានណែនាំឱ្យបន្តតាមដានយ៉ាងយកចិត្តទុកដាក់ ហើយប្រសិនបើមានស្ថានការណ៍ប្រឈម ត្រូវចាត់វិធានការជួយសង្គ្រោះប្រជាពលរដ្ឋទៅកាន់ទីទួលមានសុវត្ថិភាព និងរាយការណ៍ជូនថ្នាក់ដឹកនាំ ឬអាជ្ញាធរមានសមត្ថកិច្ចដែលនៅជិតបំផុតជាបន្ទាន់។
ជាមួយគ្នានេះ លោកស្រីបណ្ឌិត បាន ស្រីមុំ ក៏បានអំពាវនាវដល់ប្រជាពលរដ្ឋដែលរស់នៅតាមដងស្ទឹង និងតំបន់ទំនាប សូមបង្កើនការប្រុងប្រយ័ត្ននៅពេលមានភ្លៀងធ្លាក់ខ្លាំងជាប់ៗគ្នា។ ប្រសិនបើមានស្ថានភាពប្រឈម ត្រូវរាយការណ៍ជូនអាជ្ញាធរមូលដ្ឋានឱ្យបានឆាប់រហ័ស។
លោកស្រីក៏បានណែនាំឱ្យប្រជាពលរដ្ឋបង្កើនការប្រុងប្រយ័ត្នចំពោះសត្វអសិរពិស និងកុមារតូចៗ ដើម្បីចៀសវាងគ្រោះថ្នាក់ដោយសារការលង់ទឹក ព្រមទាំងយកចិត្តទុកដាក់លើសុខភាព និងអនាម័យ ដូចជា លាងដៃជាមួយសាប៊ូ ផឹកទឹកឆ្អិន និងដេកក្នុងមុងជាប្រចាំ ដើម្បីបង្ការជំងឺផ្សេងៗ។ ក្នុងករណីមានបញ្ហាសុខភាព ត្រូវប្រញាប់ទៅកាន់មណ្ឌលសុខភាព ឬមន្ទីរពេទ្យដែលនៅជិតបំផុត ដើម្បីទទួលបានការព្យាបាលទាន់ពេលវេលា។
បើតាមរបាយការណ៍បឋម ជំនន់ទឹកភ្លៀងដែលបង្កឡើងដោយភ្លៀងធ្លាក់ខ្លាំងជាបន្តបន្ទាប់ បានប៉ះពាល់ដល់ឃុំ-សង្កាត់ចំនួន ៦ ស្មើនឹង ១៩ភូមិ និងប្រជាពលរដ្ឋចំនួន ២៣២ខ្នងផ្ទះ។ ជំនន់ក៏បានប៉ះពាល់ដល់ហេដ្ឋារចនាសម្ព័ន្ធ ផ្លូវកៅស៊ូ ផ្លូវបេតុង និងបណ្តាលឱ្យផលដំណាំកសិកម្មរងការខូចខាតមួយចំនួនធំ។ ជាអកុសល គ្រោះទឹកជំនន់នេះក៏បានបណ្តាលឱ្យមនុស្សម្នាក់បាត់បង់ជីវិត ដោយសារត្រូវទឹកគួច៕
