ថ្ងៃព្រហស្បតិ៍ ៦រោច ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី២៥ ខែវិច្ឆិកា ឆ្នាំ២០២១ ខេត្តសៀមរាប ឯកឧត្តមអនុរដ្ឋលេខាធិការ ជួប សុភក្តិ តំណាងឯកឧត្តម សួង ហេង រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលា និងវគ្គបណ្ដុះបណ្ដាលស្ដីពីការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ និងការរៀបចំរបាយការណ៍សមិទ្ធកម្មដល់មន្ត្រីប្រមូលចំណូលនៅតាមស្ថានីយជញ្ជីង និងអង្គភាពថវិកាក្រោមឱវាទក្រសួង។
កម្មវិធីនេះមានការចូលរួមពីអង្គភាពថវិកា មន្ទីរសាធារណការនិងដឹកជញ្ជូនរាជធានី-ខេត្តទាំង២៥ មន្ត្រីមកពីស្ថានីយជញ្ជីងចំនួន៣០កន្លែងទូទាំងប្រទេស និងមានការចូលរួមធ្វើបង្ហាញពីគ្រូបង្គោលមកពីអគ្គនាយកដ្ឋានថវិកាក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានទ្រព្យសម្បត្តិរដ្ឋ ចំណូលមិនមែនសារពើពន្ធនៃក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានផែនការ និងគោលនយោបាយ នៃក្រសួងសាធារណការ និងដឹកជញ្ជូន សរុបទាំងអស់ចំនួន១២០រូប។
កម្មវិធីសិក្ខាសាលា និងវគ្គបណ្ដុះបណ្ដាលនេះប្រព្រឹត្តទៅរយៈពេលពីរថ្ងៃ ចាប់ពីថ្ងៃទី២៥ ដល់ថ្ងៃទី២៦ ខែវិច្ឆិកា ឆ្នាំ២០២១ រៀបចំឡើងដោយក្រសួងសាធារណការ និងដឹកជញ្ជូន សហការជាមួយក្រសួងសេដ្ឋកិច្ច និងហិរញ្ញវត្ថុ ក្នុងក្របខ័ណ្ឌគណៈកម្មការកំណែទម្រង់គ្រប់គ្រងហិរញ្ញវត្ថុសាធារណៈ នៃក្រសួងសេដ្ឋកិច្ច និងហិរញ្ញវត្ថុ ក្នុងគោលបំណងដើម្បីពង្រឹងសមត្ថភាព និងលើកកម្ពស់ការយល់ដឹងថែមទៀតដល់មន្ត្រីទទួលបន្ទុកកិច្ចការហិរញ្ញវត្ថុ និងមន្ត្រីនៃស្ថានីយជញ្ជីងទាំងអស់អំពីការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ និងការរៀបចំរបាយការណ៍សមិទ្ធកម្មឱ្យបានគ្រប់ជ្រុងជ្រោយ ក៏ដូចជាដើម្បីប្រសិទ្ធភាពនៃការអនុវត្តផែនការសកម្មភាពប្រចាំឆ្នាំរបស់អង្គភាពថវិកាក្រោមឱវាទក្រសួងផងដែរ។
ថ្លែងទៅកាន់អង្គពិធីនាឱកាសនោះ ឯកឧត្តមអនុរដ្ឋលេខាធិការ បានគូសបញ្ជាក់ពីសារសំខាន់នៃសិក្ខាសាលា និងវគ្គបណ្តុះបណ្តាលនេះសម្រាប់មន្ត្រីទទួលបន្ទុកកិច្ចការហិរញ្ញវត្ថុ និងមន្ត្រីស្ថានីយជញ្ជីងទាំងអស់ក្នុងការពង្រឹងសមត្ថភាព និងលើកកម្ពស់ការយល់ដឹងថែមទៀតអំពីការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ និងការរៀបចំរបាយការណ៍សមិទ្ធកម្មឱ្យបានគ្រប់ជ្រុងជ្រោយ។
ជាមួយគ្នានោះដែរ ឯកឧត្តមអនុរដ្ឋលេខាធិការ បានជំរុញលើកទឹកចិត្តឱ្យអង្គសិក្ខាកាមទាំងអស់ផ្ដោតការយកចិត្តទុកដាក់ស្វែងយល់ និងពិភាក្សាឱ្យកាន់តែស៊ីជម្រៅបន្ថែមទៀតទៅលើការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ និងការរៀបចំរបាយការណ៍សមិទ្ធកម្ម ដើម្បីទទួលបានចំណេះដឹងថ្មីបន្ថែមទៀត សម្រាប់យកទៅអនុវត្តក្នុងការងារប្រចាំថ្ងៃស្របតាមនីតិវិធី ដើម្បីប្រសិទ្ធភាពការងារខ្ពស់ និងផ្សព្វផ្សាយឱ្យកាន់តែទូលំទូលាយបន្ថែមទៀតនៅក្នុងអង្គភាពរបស់ខ្លួន៕
