កែប ៖ ថ្វីត្បិតរមណីយដ្ឋានខេត្តកែប មានទំហំផ្ទៃដីតូចជាងបណ្តាខេត្តនានា ក្នុងព្រះរាជាណាចក្រកម្ពុជាក៏ពិតមែន ប៉ុន្តែបើផ្តោតលើវិស័យទេសចរណ៍ គឺមានសក្តានុពលខ្ពស់ មិនចាញ់រមណីយដ្ឋានក្នុងខេត្តទេសចរណ៍ដ៏ទៃឡើយ ដោយអំឡុងពេលបច្ចុប្បន្នខេត្តទេសចរណ៍ដ៏តូចច្រឡឹងមួយនេះ ក៏ត្រូវបានរៀបចំស្តា និងអភិវឌ្ឍន៍ហេដ្ឋារចនាសម្ព័ន្ធគ្រប់ផ្នែក និងគ្រប់វិស័យ ដែលបានធ្វើឱ្យខេត្តកែបកាន់តែមានភាពស្រស់បំព្រងគ្រប់រដូវកាល ។
ជាទូទៅមហាជនភាគច្រើនជាអ្នកទេសចរណ៍តែងតែផ្តោតអារម្មណ៍នូវសម្រស់ធម្មជាតិនៃតំបន់ឆ្នេរកែបពិសេសព្រៃកោងកាងដែលដុះនៅប្របមាត់ឆ្នេរ គាប់ជួនបច្ចុប្បន្ន អាជ្ញាធរខេត្តក៏បានជំរុញដល់មន្ទីរពាក់ព័ន្ធស្ថាបនាដងផ្លូវសសៀរតាមមាត់ឆ្នេរនានាក្នុងភូមិសាស្ត្រខេត្តកែប ដែលមានប្រវែងរាប់សិបគីឡូម៉ែត្រផងដែរ ហើយក៏មានភាពងាយស្រួលក្នុងការធ្វើចរាចរណ៍ប្រកបដោយសុវត្ថិភាព ។ លើសពីនេះ ដងផ្លូវសំខាន់ៗជាច្រើនក្នុងរមណីយដ្ឋានឆ្នេរកែប ក៏ត្រូវបានស្ថាបនាដោយពង្រីកអ័ក្សផ្លូវដ៏ធំទូលាយ ពិសេសកំណាត់ផ្លូវចាប់ពីរង្វង់មូលសេះសមកកាន់់ឆ្នេរលេងទឹក ។
លោក ម៉ម ទូច ប្រធានមន្ទីរសាធារណៈការខេត្តកែបបានឱ្យដឹងថា រមណីយដ្ឋានឆ្នេរកែប បច្ចុប្បន្នពិតជាមានការរីកចម្រើនខាងវិស័យទេសចរណ៍ បើរាប់បញ្ចូលទាំងអ្នកដំណើរក្នុងស្រុកផង គឺនៅតាមដងផ្លូវនានាពិតជាត្រូវកកស្ទះ ពិសេសក្រុមភ្ញៀវទេសចរណ៍តែងតែនាំគ្នាសំរុកចូលមកលំហែនៅថ្ងបុណ្យជាតិផ្សេងៗ ដូចជាបុណ្យចូលឆ្នាំប្រពៃណីជាតិខ្មែរ បុណ្យភ្ជុំបិណ្ឌ បុណ្យឆ្លងឆ្នាំសកល បុណ្យចូលឆ្នាំចិន វៀតណាម៘ លើសពីនេះសូម្បីតែថ្ងៃធម្មតាក៏មានអ្នកទេសចរណ៍មកលេងដែរ ទើបឯកឧត្តមអភិបាលខេត្តកែបជម្រុញឱ្យមានការស្ថាបនាផ្លូវជាច្រើនខ្សែជុំវិញទីប្រជុំជនខេត្តតែម្តង ។
លោកប្រធានមន្ទីរបានបញ្ជាក់ផងដែរថា ចំពោះផ្លូវមួយខ្សែដែលតភ្ជាប់ពីទីប្រជំជនសេះស មកកាន់មាត់សមុទ្រនោះមានប្រវែង7800ម៉ែត្រ ដោយបានស្ថាបនារួចរាល់ប្រវែង4450ម៉ែត្រ ក្រាលដោយបេតុងកៅស៊ូ ជាអំណោយដ៏ថ្លៃថ្លារបស់រាជរដ្ឋាភិបាលកម្ពុជា ចំណែកចំងាយផ្លូវនៅសល់ប្រវែង3350ម៉ែត្រទៀតត្រូវបានពង្រីករួចរាល់ប៉ុន្តែមិនទាន់ក្រាលកៅស៊ូ តែយើងនឹងសំរេចផែនការឱ្យបានរួចរាល់នាបំណាច់ឆ្នាំ2018ខាងមុខ ។
លោក ម៉ម ទូច ក៏បានលើកឡើងទៀតថា ដោយឡែក ផ្លូវសសៀរមាត់ឆ្នេរទៅកាន់ឆ្នេរអង្កោល ដែលចាក់ពង្រីកលាយថ្មភ្នំមានប្រវែង14630 ម៉ែត្រនោះ ឥឡូវយើងសំរេចផែនការបាន8925ម៉ែត្រហើយ ក្នុងនោះក៏បានស្ថាបនាស្ពានពីរកន្លែងដែលជាសំណង់សិល្បៈការ ឯផ្លូវសេសសល់យើងនឹងបន្តអនុវត្តនាពេលក្រោយគីអាស្រ័យលើកញ្ចប់ថវិកា ។
ឯកឧត្តម កែន សត្ថា អភិបាលខេត្តកែបក៏បានលើកឡើងដែរថា រយៈពេលប៉ុន្មានឆ្នាំនេះ លោកបាននិងកំពុងជំរុញដល់គ្រប់មន្ទីរស្ថាប័នជំវិញខេត្ត ពិសេសមន្ទីរជំនាញលៃលកយ៉ាងណារួបរួមគ្នាអនុវត្តន៍ផែនការសំខាន់ៗ ដែលរាជរដ្ឋាភិបាលប្រគល់ជូន ជាប្រយោជន៍សំរាប់បំរើប្រជាពលរដ្ឋ ក៏ដូចជាសង្គមជាតិទាំងមូល ។ ឯកឧត្តមបានគូសបញ្ជាក់ទៀតថា ដើម្បីបំរើសេវាកម្មដល់ភ្ញៀវទេសចរណ៍ជាតិនិងអន្តរជាតិក្នុងនាមជាអាជ្ញាធរលោកខិតខំពុះពាធ្វើកិច្ចការមិនស្គាល់ថ្ងៃសំរាកឡើយ ព្រោះរយៈពេលនេះ ក្រុមអ្នកទេសចរណ៍កាន់តែសំរុកមកលំហែរក្នុងរមណីយដ្ឋានឆ្នេរកែបកាន់តែទ្វេរដង មិនថាថ្ងៃបុណ្យសូម្បីតែថ្ងៃធម្មតាក៏មានមនុស្សអ៊ូអរដែរ ។
ឯកឧត្តមបានឱ្យដឹងផងដែរថា បច្ចុប្បន្ន ក្រុមភ្ញៀវចូលមកខេត្តកែបមិនសំដៅតែនៅតាមមាត់ឆ្នេរកែបទេ ដោយមួយផ្នែកក៏បន្តជិះទូកទៅលំហែរនៅឯកោះទន្សាយ ដែលមានចំងាយពីមាត់ឆ្នេរកែបប្រមាណជាង5គីឡូម៉ែត្រប៉ុណ្ណោះ ។
មជ្ឈដ្ឋានជាច្រើនតែងតែឱ្យតម្លៃរមណីយដ្ឋានឆ្នេរកែបបៀប ប្រដូចជាឋានតុសិត ព្រោះតែរមណីយដ្ឋាននេះ សំបូរដោយខ្យល់អាកាសបរិសុទ្ធ ដែលបានធ្វើឱ្យពួកគេអាចបំបាត់ភាពកង្វល់ខណៈដែលគេបានមកលំហែរនៅទីនេះ ។ មិនតែប៉ុណ្ណោះ ធម្មជាតិនៅក្នុងតំបន់ខេត្តកែបពិតជាមានសម្រស់ដ៏ត្រកាលមានព្រៃប្រឹក្សា មានផ្ទៃសមុទ្រពណ៏ខៀវស្រងាត់ មានឆ្នេរខ្សាច់ពណ៏សស្បុស ថែមទាំងមានអាហារដ៏មានឱជារសនិងមានខ្យល់អាកាសដ៏បរិសុទ្ធ។
នេះជាការខិតខំប្រឹងប្រែងយកចិត្តទុកដាក់ខ្ពស់ពីសំណាក់អាជ្ញាធរខេត្តកែប ដែលជានិច្ចកាលបានប្រឹងប្រែងអស់ពីកំលាំងកាយ ចិត្ត ទាំងកំលាំងស្មារតី ទើបធ្វើឱ្យខេត្តមួយនេះមានសក្តានុពលលើវិស័យទេសចរណ៍ថែមទាំងមានការរីកចំរើនស្ទើគ្រប់វិស័យ។យ៉ាងណាមិញការមកលេងកំសាន្តនៅរមណីយដ្ឋានឆ្នេរកែបពិតជាទទួលបានអត្ថប្រយោជន៍គ៏គំនិតបញ្ញាភ្លឺថ្លា វាងវៃនិងប្រកបដោយសុវត្ថិភាពជាចំបង ៕
