នៅរសៀល ថ្ងៃទី២៥ ខែវិច្ឆិកា ឆ្នាំ២០២១នេះ ឧត្តមសេនីយ៍ឯក សំ ចាន់ធួន អគ្គនាយករង អគ្គនាយកដ្ឋានយោធសេវា និងជាប្រធានអនុគណៈកម្មការ គោលនយោបាយយោធិនពលី មរណៈបង្កស្លាប់ បាត់ខ្លួន ពិការ និងសោធននិវត្តន៍ បានអញ្ជើញដឹកនាំក្រុមការងារចុះ បើកប្រាក់ឧបត្ថម្ភគោលនយោបាយលើកដំបូង ជូនយោធិនសោធននិវត្តន៍ចំនួន ៧នាក់ ក្នុងអង្គភាព តំបន់ប្រតិបត្តិការសឹករងបន្ទាយមានជ័យ។ ក្រុមការងារអនុគណៈកម្មការ បានសំណេះសំណាលជាមួយយោធិនសោធននិវត្តន៍ និងបានផ្សព្វផ្សាយនីតិវិធី នៃការបើកប្រាក់ឧបត្ថម្ភគោលនយោបាយមួយលើកដំបូងជូនដល់យោធិន មុននឹងផ្ទេរទៅក្រសួងសង្គមកិច្ច អតីតយុទ្ធជន និងយុវនីតិសម្បទា។
ឧត្តមសេនីយ៍ឯក សំ ចាន់ធួន អគ្គនាយករង អគ្គនាយកដ្ឋានយោធសេវា និងជាប្រធានអនុគណៈកម្មការ គោលនយោបាយយោធិនពលី មរណៈ បង្កស្លាប់ បាត់ខ្លួន ពិការ និងសោធននិវត្តន៍ បានថ្លែងថា យោងតាមអនុសាសន៍ណែនាំដ៏ខ្ពង់ខ្ពស់របស់ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិ ដែលជាប្រធានគណៈកម្មការ តែងតែធ្វើការណែនាំដល់អនុគណៈកម្មការ ពេលចុះបើកប្រាក់គោលនយោបាយ គឺហាមមិនឲ្យមានការកាត់ប្រាក់ឧបត្ថម្ភ ឬការសុំប្រាក់ពីយោធិននោះឡើយ។
នាឱកាសនេះផងដែរ លោកឧត្ដមសេនីយ៍ត្រី ជឹម ប៊ុនអាន មេបញ្ជាការ តំបន់ប្រតិបត្តិការសឹករងបន្ទាយមានជ័យ បានរាយការណ៍ថា យោធិនសោធននិវត្តន៍ ក្នុងអង្គភាព មានចំនួន ៧នាក់ ដែលនឹងត្រូវបើកប្រាក់គោលនយោបាយលើកដំបូង មុននឹងត្រូវផ្ទេរទៅក្រសួងសង្គមកិច្ច អតីតយុទ្ធជន និងយុវនីតិសម្បទា ចាប់ពីខែធ្នូ ឆ្នាំ២០២១នេះតទៅ៕
