ខេត្តប៉ៃលិន ៖ កាលពីវេលាម៉ោង៣និង៣០នាទីរសៀល ថ្ងៃទី២៤ ខែមករា ឆ្នាំ២០១៧ ខណ្ទរដ្ឋបាលជលផលខេត្តប៉ៃលិន ដឹកនាំដោយលោក បេង ឆាំ នាយខណ្ទរដ្ឋបាលជលផល ខេត្ត បានដឹកនាំមន្ត្រីក្រោមឪវាទ ចុះល្បាតតាមបណ្តោយដងស្ទឹងកុយ ក្នុងភូមិភ្នំកុយ ឃុំសាលាករៅ ស្រុកសាលាក្រៅ ខេត្តប៉ៃលិន ក៍ប្រទះឃើញប្រជាពលរដ្ឋ២ទៅ៣នាក់ កំពុងតែប្រព្រិត្តបទល្មើសឆក់មច្ឆាជាតិ ក្នុងតំបន់អភិរក្ស តែត្រូវបានរត់គេចខ្លូន ដោយបន្សល់ទុកប្រដាប់ឆក់មួយចំនួន ។
លោក បេង ឆាំ នាយខណ្ទរដ្ឋបាលជលផលខេត្តប៉ៃលិន បានឲ្យដឹងថា៖ កាលពីវេលាម៉ោងកើតហេតុខាងលើ លោក បានដឹកនាំមន្ត្រីក្រោមឪវាទចំនួន៤នាក់ ប្រើប្រាស់ដោយអូបរមួយគ្រឿង ចុះល្បាតតាមបណ្តោយដងស្ទឹងកុយ ក្នុងភូមិសាស្ត្រស្រុកសាលាក្រៅ ខេត្តប៉ៃលិន ក៍ប្រទះឃើញប្រជាពលរដ្ឋចំនួន២ទៅ៣នាក់ កំពុងឆក់ត្រី ពេលនោះកម្លាំងសមត្ថកិច្ចយើងបានដេញតាម ដើម្បីឃាត់ខ្លួនតែមិនបានសម្រេច ដោយពួកគាត់បានរត់គេចខ្លូនបាត់ស្រមោល ។លោកបន្តថា៖ កាលពីមុនខេត្តប៉ៃលិន មិនមានខណ្ទរដ្ឋបាលជលផលនោះទេ គឺតែងតែមានបទល្មើសប្រើឧបករណ៍ឆក់ជាបន្តបន្ទាប់ នៅពេលចាប់បានជនសង្ស័យ តែងតែអប់រំ ណែនាំកុំឲ្យប្រព្រិត្តបទល្មើស ផងដែរ ។ តែពេលនេះខេត្តយើង មានខណ្ទរដ្ឋបាលជលផល ដូច្នោះសមត្ថកិច្ចជលផលខេត្ត តែងតែចុះល្បាត់ជាបន្តបន្ទាប់ ដើម្បីចាប់ជនសង្ស័យ ដែលប្រព្រិត្តបទល្មើសនេសាទ យកមកផ្ទន្ទាទោសតាមច្បាប់ជាធរមាន ។
លោក បានឲ្យដឹងទៀតថា៖ នៅតំបន់ភូមិសាស្ត្រស្ទឹងកុយនេះ យើងមានតំបន់អភិរក្សមួយកន្លែង ដែលមានផ្ទៃក្រឡា១ម៉ឺនម៉ែត្រការេ ដែលមានប្រវែង៥ទៅ៦គឺឡូម៉ែត្រផងដែរ ។ក្នុងការចុះល្បាតនោះដែរ កម្លាំងសមត្ថកិច្ចបានរិបអួសឧបករណ៏ឆក់ត្រីមួយចំនួនរួមមានៈ អាំងវិចទ័រឆក់ចំនួន ១ គ្រឿង ដងឆក់ចំនួន ១ គូ អាគុយចំនួន ១ គឿង ផងដែរ។
សូមបញ្ជាក់ថា៖ នៅខេត្តប៉ៃលិន មានបទល្មើសជលផលជាបន្តបន្ទាប់ ពិសេសករណីឆក់ត្រីជាដើម ហើយកាលពីប៉ុន្មានថ្ងៃមុន មានប្រជាពលរដ្ឋ បានចុះទៅប្រព្រិត្តបទល្មើសនេសាទ ក្នុងតំបន់ហាមឃាត់ចំណុចឡាក់៦៨ រហូតបាត់ដំណឹង២ទៅ៣យប់ ទើបរកឃើញមកវិញ។
ចំពោះចំណុចស្ទឹងកុយនេះវិញ បើតាមមន្ត្រីមូលដ្ឋាន បានឲ្យដឹងថា៖ បទល្មើសជលផលតែងកើតមានជាបន្តបន្ទាប់ ហើយក៏ចាប់បានជាបន្តបន្ទាប់ដែរ តែមិនរាងចាល ដូច្នោះសូមមន្ត្រីខណ្ទរដ្ឋបាលជលផលខេត្ត មេត្តាចុះអប់រំផ្សព្វផ្សាយដល់ប្រជាពលរដ្ឋ តាមចំណុចខាងលើនេះផង ៕
