ពេលវេលា៣៨ឆ្នាំ ហាក់មួយពព្រិចភ្នែក ខ្ញុំបាននឹកឃើញដល់ប្រទេសជាតិរបស់យើង មុនថ្ងៃរំដោះ៧មករា ឆ្នាំ១៩៧៩ គឺបានខ្ទេចខ្ទីស្ទើរគ្មានសល់។ របបប៉ុល ពលបានបំផ្លាញទាំងហេដ្ឋារចនាសម្ព័ន្ធសង្គម ធនធានមនុស្ស និងសាសនា។ ប៉ុន្តែ ក្រោមការដឹកនាំរបស់គណបក្សប្រជាជនកម្ពុជា នៅក្រោយថ្ងៃ៧ មករា ឆ្នាំ១៩៧៩ បើទោះបីយើងបានចេញដំណើរពីបាតដៃទទេ តែយើង (គណបក្សប្រជាជនកម្ពុជា) បានផ្តល់នូវអ្វីៗ ដែលពលរដ្ឋត្រូវទទួលបាន ជូនពលរដ្ឋវិញ បន្ទាប់ពីពួកអាវខ្មៅ បានដកហូតជាង៣ឆ្នាំនោះ។
គណបក្សប្រជាជនកម្ពុជា បានផ្តល់ជូននូវសិទ្ធិរស់រានមានជីវិត ជំនឿសាសនា ដែលជាវត្ថុជាមូលដ្ឋាននៃមនុស្សជាតិត្រូវទទួលបាន ចាប់ពីថ្ងៃ៧ ខែមករា ឆ្នាំ១៩៧៩ មក។ យើងបានធ្វើដំណើររួមគ្នា រហូតមកដល់ពេលនេះ គឺទទួល បានសង្គមជាតិមួយ ដែលកំពុងមានការអភិវឌ្ឍលើគ្រប់វិស័យ ការជួបជុំ និងការទទួលបាននូវសុខសន្តិភាពពេញផ្ទៃប្រទេស។
៣៧ឆ្នាំបានកន្លងផុតទៅ កម្ពុជាបច្ចុប្បន្ន បានឃ្លាតឆ្ងាយពីការរស់រានមួយថ្ងៃដើម្បីមួយថ្ងៃ មកជាការរស់រានមួយ ដែលមានសង្ឃឹម និងការជឿជាក់លើជោគវាសនា អនាគត នៃក្រុមគ្រួសារ ប្រទេសជាតិ ថានឹងទទួលបានភាពរុងរឿងជានិច្ចកាល តទៅ។
ខ្ញុំ សូមថ្លែងអំណរគុណយ៉ាងជ្រាលជ្រៅ ចំពោះព្រះសង្ឃ ពលរដ្ឋ យុវជនយុវនារី និងបងប្អូនឥស្លាមសាសនិក គ្រឹស្តសាសនិក អង្គទូតនានា ដែលបានចូលរួមអបអរសាទរខួប ទី៣៨ នៃទិវាជ័យជំនះ ៧មករា នាថ្ងៃនេះ យ៉ាងច្រើនកុះករ និងយ៉ាងមហោឡារិក ក្រៃលែង នាថ្ងៃនេះ ដែលធ្វើឲ្យយើងខ្ញុំជាថ្នាក់ដឹកនាំគណបក្សប្រជាជនកម្ពុជាទាំងអស់ មានក្តីរំភើបជាទីបំផុត និងបានប្តេជ្ញាបន្តទៀត ក្នុងការបម្រើប្រទេសនិងប្រជាជន តទៅមុខទៀត មិនរាថយនោះឡើយ។
សូមឲ្យស្មារតី៧មករា ស្ថិតស្ថេរក្នុងដួងចិត្តពលរដ្ឋខ្មែរជារៀងរហូតទៅ ដើម្បីយើងរួមគ្នាអភិវឌ្ឍន៍ប្រទេសជាតិ របស់យើង ទៅមុខទៀត ដូចអ្វីដែលយើងបានរួមរស់ជាមួយគ្នា ៣៧ឆ្នាំមកនេះ។
ខ្ញុំសូមជូនពរ ជនរួមជាតិទាំងអស់ សុខសប្បាយរីករាយ នៅថ្ងៃចុងសប្តាហ៍ ក្នុងដំណើរកម្សាន្តជិតឆ្ងាយ នៅទូទាំងប្រទេស ជាមួយនឹងសមិទ្ធផល៧មករា ឆ្នាំ១៩៧៩ ដែលមាន ផ្លូវ ស្ពាន និងហេដ្ឋារចនាសម្ព័ន្ធសង្គមជាច្រើនទូទាំងប្រទេស។
សូមបងប្អូន ជនរួមជាតិទាំងក្នុង និងក្រៅប្រទេសជួបប្រទះតែសេចក្តីសុខ ចម្រើន ព្រមទាំងពុទ្ឋពរ៤ ប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕
