ក្រសួងសាធារណការ និងដឹកជញ្ជូន គ្រោងរៀបចំការបណ្តុះបណ្តាលមន្ត្រីបង្គោលមកពីក្រសួង-ស្ថាប័ន ពាក់ព័ន្ធអំពីការប្រើប្រាស់ប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ផែ(Port EDI)នៅពេលប្រព័ន្ធនេះត្រូវបានដំឡើងដំណាក់កាលដំបូង

ក្រសួងសាធារណការ និងដឹកជញ្ជូន គ្រោងរៀបចំការបណ្តុះបណ្តាលមន្ត្រីបង្គោលមកពីក្រសួង-ស្ថាប័ន ពាក់ព័ន្ធអំពីការប្រើប្រាស់ប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ផែ(Port EDI)នៅពេលប្រព័ន្ធនេះត្រូវបានដំឡើងដំណាក់កាលដំបូង

ថ្ងៃអង្គារ ៥រោច ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៦ ខែតុលា ឆ្នាំ២០២១ នៅទីស្តីការ ក្រសួង ឯកឧត្ដម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំ កិច្ចប្រជុំប្រចាំខែស្ដីពីវឌ្ឍនភាពគម្រោងប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ផែ (Port EDI) ដោយមានការអញ្ជើញចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីថ្នាក់ដឹកនាំក្រសួង ទទួលបន្ទុក តំណាងអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ តំណាងកំពង់ផែស្វយ័តភ្នំពេញ តំណាងកំពង់ផែ ស្វយ័តក្រុងព្រះសីហនុ និងតំណាងអគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុ មន្ត្រីជំនាញ ក្រុមអ្នកបច្ចេកទេស និងភាគីពាក់ព័ន្ធផងដែរ។

អង្គប្រជុំបានផ្តោតការពិភាក្សាជាសំខាន់លើការកំណត់ពេលវេលាសម្រាប់ការបណ្ដុះបណ្ដាលមន្ត្រីបង្គោលអំពីការប្រើប្រាស់ប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ផែ (Port EDI)សម្រាប់មន្ត្រីគយនិងរដ្ឋាករ មន្ត្រីកំពង់ផែនិងមន្ត្រីសមត្ថកិច្ចពាក់ព័ន្ធផ្សេងទៀតមន្រ្តីនៅពេលប្រព័ន្ធនេះត្រូវបានដំឡើងដំណាក់កាល ដំបូង វឌ្ឍនភាពការងារសម្រេចបានទាក់ទងនឹងការអនុវត្តគម្រោង បញ្ហាប្រឈម សំណូមពរ ដំណោះ ស្រាយ និងលើកទិសដៅការងារបន្ត។

ថ្លែងក្នុងកិច្ចប្រជុំនាឱកាសនោះ ឯកឧត្តមរដ្ឋលេខាធិការ បានសំណូមពរឱ្យក្រសួង-ស្ថាប័ន និងភាគីពាក់ ព័ន្ធទាំងអស់បញ្ជូនឈ្មោះមន្ត្រីរបស់ខ្លួនដែលត្រូវចូលរួមការបណ្ដុះបណ្ដាលអំពីការប្រើប្រាស់ប្រព័ន្ធផ្លាស់ ប្ដូរទិន្នន័យអេឡិចត្រូនិកនៅកំពង់ផែ (Port EDI) មកក្រសួងសាធារណការ និងដឹកជញ្ជូនឱ្យបានមុន ដំណាច់ខែតុលា ឆ្នាំ២០២១ ដើម្បីក្រសួងមានមូលដ្ឋានក្នុងការត្រៀមរៀបចំការបណ្តុះបណ្តាល និងបន្ថែម ពីលើនេះ ឯកឧត្តមរដ្ឋលេខាធិការ បានសម្តែងសុទិដ្ឋិនិយមចំពោះវឌ្ឍនភាពនៃការអនុវត្តគម្រោងប្រព័ន្ធ ផ្លាស់ប្ដូរទិន្នន័យអេឡិចត្រូនិកនៅកំពង់ផែ (Port EDI) ដោយបានបន្ថែមថា៖ គម្រោងនេះនឹងបញ្ចប់តាម ផែនការគ្រោងទុក ដោយគ្មានការពន្យារពេល និងជួបប្រទះបញ្ហាអ្វីឡើយ។

សូមជម្រាបជូនថា៖ គណៈកម្មការគ្រប់គ្រងប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ផែ(Port EDI) ដែលសមាសភាពចូលរួមពីក្រសួង-ស្ថាប័នពាក់ព័ន្ធ រួមសហការជាមួយនឹងនាយកដ្ឋានព័ត៌មានវិទ្យា និង ទំនាក់ទំនងសាធារណ នៃក្រសួងសាធារណការ និងដឹកជញ្ជូន បានខិតខំប្រឹងប្រែងអភិវឌ្ឍប្រព័ន្ធផ្លាស់ ប្ដូរទិន្នន័យអេឡិចត្រូនិកនៅកំពង់ផែ (Port EDI) នេះឡើង ដើម្បីជួយសម្រួលដល់ការធ្វើបែបបទនាវាចរណ៍ចូល-ចេញ ឆ្លងកាត់មានភាពងាយស្រួល ចំណេញពេលវេលា មានប្រសិទ្ធភាព និងតម្លាភាព ស្របតាមយុគសម័យបដិវត្តន៍ឧស្សាហកម្ម៤.០៕