ខេត្តរតនគិរី ៖ ប្រជាពលរដ្ឋនៅក្នុងក្រុងបានលុងជាច្រើននាក់បានផ្ទុះកំហឹងជាខ្លាំង បន្ទាប់ពីកម្លាំងនគរបាលការិយាល័យទេសចរណ៍ សហការជាមួយនឹងការិយាល័យចរាចរណ៍ផ្លូវគោកបានវាយក្បាលមួយទំហឹងមកលើអ្នកជិះម៉ូតូសង់ការ៉េមួយគ្រឿងដោយចោទថា អ្នកជិះម៉ូតូនោះជិះបុកសមត្ថកិច្ចកំពុងតែធ្វើការផាក់ពិន័យច្បាប់ចរាចរណ៍ផ្លូវគោក នៅវេលាម៉ោង៧និង០០នាទីយប់ ថ្ងៃទី២៥ ខែវិច្ឆិកា ឆ្នាំ២០១៦ នៅចំណុច ភូមិអូរកន្ទិល សង្កាត់បឹងកន្សែង ក្រុងបានលុង។
លោក ឡាក់ វិចិត្រ មន្ត្រីនគរបាលទេសចរណ៍ និងជាអ្នកដៃដល់ បានចោទប្រកាន់ថា អ្នកជិះម៉ូតូឈ្មោះញឹម ចាន់ដារ៉ា ជាមន្ត្រីកងវិស្វ័កម្ម បានជិះម៉ូតូម៉ាកសង់កូរ៉េ ឌុបគ្នាចំនួន៣នាក់ រួមទាំងក្មេងតូចម្នាក់ មកបុកខ្លួន ពេលដែលកំពុងធ្វើការអនុវត្តច្បាប់តាមផ្លូវជាតិលេខ៧៨A ដោយអ្នកបើកបរម៉ូតូគ្មានគោរពច្បាប់ចរាចរណ៍ ដូចជាអត់មួកសុវត្ថិភាព ឌុបគ្នាមច្រើនពេកជាដើម។
លោក ញឹម ចាន់ដារ៉ា នាយរងកងវិស្វ័កម្មតំបន់ប្រតិបត្តិការសឹករងរតនគិរី បានអោយដឹងថាពេលនោះលោកបានឌុបកម្មករចំនួន៣នាក់ និងក្មេងតូចម្នាក់លើកម៉ូតូតែមួយ ដោយលោកបានសុំមន្ត្រីចរាចរណ៍ផ្នែកខាងដើមរួចហើយ តែមកដល់ខាងមុខទៀត មាននគរបាលម្នាក់ទៀតបានលើកដំបូងរាំង និងឈរបាំងពីមុខម៉ូតូ បណ្តាអោយបុកត្រូវជើងសមត្ថកិច្ចបន្តិច ខណៈនោះសមត្ថកិច្ចឈ្មោះឡាក់ វិចិត្រ បានយកដំបងវាយគាត់មួយទំហឹងចំថ្ងាស់ខាងធ្វេងធ្វើអោយគាត់វិលមុខចង់ដួលម៉ូតូ ពេលនោះគាត់មានការខឹងសម្បាលយ៉ាងខ្លាំងចំពោះសមត្ថកិច្ចដែលយកដំបងមកវាយក្បាលរបស់គាត់។
សាក្សីពីប្រជាពលរដ្ឋជាច្រើនរូបនៅកន្លែងកើតហេតុបានរិះគន់ថា ការអនុវត្តចរាចរណ៍ផ្លូវគោករបស់សមត្ថកិច្ចហាក់បីដូចហួសហែតពេកហើយវាយគាត់មួយដំបងហើយ នាំគ្នាចាប់គាត់វាយបន្ថែមទៀតរុញចូលក្នុងឡាន ហាក់បីដូចជាអ្នកទោសធ្ងន់ធ្ងរណាស់ ក្រុមប្រជាពលរដ្ឋដែលបានឃើញទិភាពទាំងនោះបានសំណូមពរអោយថ្នាក់ដឹកនាំផ្នែកសណ្តាប់ធ្នាប់ធារណៈ និងចរាចរណ៍ផ្លូវគោកគួរតែធ្វើការកែតម្រូវឡើងវិញចំពោះសមត្ថកិច្ចដែលធ្វើការផាក់ពិន័យបច្ចុប្បន្ន តែងតែដាក់កម្លាំងនៅទីងងឹតពួនស្ទាក់ និងគ្មានដាក់ស្លាក់សញ្ញាសំគាល់អោយឃើញ ដល់អ្នកធ្វើដំណើរតាមទោចក្រក្រយានយន្ត និងរថយន្ត។
លោក អ៊ុង សុភាព ស្នងការរងទទួលបន្ទុកសណ្តាប់ធ្នាប់សាធារណៈ បានអោយដឹងថា ករណីនេះលោកកំពុងអោយខាងការិយាល័យចរាចរណ៍ធ្វើការសម្របសម្រួល និងស្រាវជ្រាវថាតើរឿងនេះវាយ៉ាងណានោះប្រសិនបើមន្ត្រីរបស់លោកធ្វើខុសពិតប្រាកដមែននោះ លោកនឹងដកមកប្រឈរជើង ឫចាត់ការតាមក្រុមប្រឹក្សាវិន័យ និងច្បាប់នគរបាលជាតិ ៕
ដោយ ៖ សន ចាន់ឌី
