ប្រទេសថៃ ៖ ជនសង្ស័យចំនួន៣នាក់ ដែលពាក់ព័ន្ធនឹងករណីជួញដូរគ្រឿងញៀន ត្រូវបានក្រុមតម្រួតថៃ នៅក្នុងខេត្ត រៈយ៉ង និងខេត្ត ណាខន ប៉ាធុំ ធ្វើការឃាត់ខ្លួនបានជាបន្តបន្ទាប់ ខណៈដែលមុខសញ្ញាទាំងនេះ កំពុងដឹកនាំគ្រឿងញៀន តាមរថយន្តដើម្បីធ្វើសកម្មភាពចែកចាយជាក់ស្តែង ។
យោងតាមរបាយការណ៍របស់ថៃ ដែលកម្ពុជាថ្មី ទទួលបាន គឺបានបញ្ជាក់ថា ជំហាន ដំបូង សមត្ថកិច្ចជំនាញបានដាក់កំលាំងអោយទាក់ទងទៅកាន់មុខសញ្ញា តាមវិធាន ញុះញង់ ដើម្បីសុំទិញគ្រឿងញៀន ដែលមុខសញ្ញានោះមានឈ្មោះ ធិន កន ហៅធិន ជូបក្រង ភេទប្រុស អាយុ២៤ឆ្នាំ រស់នៅភូមិ១ ឃុំយ៉ាង ស្រុកណាំយឺន ខេត្ត អ៊ុប៊ុន រ៉ាចថានី ។
របាយការណ៍បានបន្តថា នៅពេលនោះដែរ មុខសញ្ញាបានបង្ហាញខ្លួននៅកន្លែងទីណាត់ ជួបជាមួយនឹងកំលាំង ក ស ដោយគេបានប្រើប្រាស់រថយន្តម៉ាក តូយ៉ូតា ព៌ណខ្មៅពាក់ស្លាកលេខ ៧៤៩៤ ។ ប៉ុន្តែនៅពេលដែលមុខសញ្ញាសង្ស័យថាមានតម្រួត គេ ក៏បានបើករថយន្តរត់គេចតែម្តង ព្រមទាំងបានបុកជាមួយនឹងរថយន្តរបស់ក្រុមតម្រួតថែមទៀត នៅទីបំផុត មុខសញ្ញានេះត្រូវបានឃាត់ខ្លួន ព្រមទាំងបានដកហូតនូវសារធាតុ ញៀនប្រភេទម៉ាទឹកកកមួយចំនួន នៅក្នុងរថយន្ត ។
តាមការសារភាព គឺមុខសញ្ញាទីពីរត្រូវបានលាតត្រដាង ដែលគេនោះមានឈ្មោះវីរៈ ស័ក ហៅវ៉ែន ភេទប្រុស អាយុ៤៤ឆ្នាំ រស់នៅភូមិ៦ ឃុំស្រះកែវ ស្រុកថាសាលា ខេត្ត ណាខន ស៊ីថាំរ៉ាច ដោយជននេះ ត្រូវបានកំលាំងតម្រួតថៃ ចុះចាប់ខ្លួននៅនឹងផ្ទះ លេខ២៥៩/៨៣ ភូមិ១១ ឃុំធុងសុខឡា ស្រុកសារីរ៉ាឆា ខេត្តឆុនបុរី ។ ដោយនៅពេលនោះ សមត្ថកិច្ចបានធ្វើការដកហូតគ្រឿងញៀនប្រភេទយ៉ាម៉ាចំនួន ៨៤ ០០០ គ្រាប់ និងគ្រឿងញៀនប្រភេទម៉ាទឹកកកចំនួន ១០,៤៩ ក្រាម ។ ក្រោយមកកំលាំងក៏បានឈានទៅចាប់ខ្លួនមុខសញ្ញាម្នាក់ទៀតឈ្មោះ ខាំរ៉ុន ហៅម៉ៃសារី ច័ន្ទឥន្ទ្រ ភេទប្រុស អាយុ៥៦ឆ្នាំ រស់នៅខេត្តណាខន ប៉ាធុំ ខណៈដែលជនសង្ស័យចុងក្រោយនេះ បើករថយន្តមកក្នុងចំណតកណ្តាលខេត្ត ព្រមទាំងបាន ដកហូតថ្នាំញៀនប្រភេទយ៉ាម៉ាចំនួន ៦៤ ០០០ គ្រាប់ និងគ្រឿងញៀនប្រភេទម៉ាទឹកកក ចំនួន ១ គីឡូក្រាម ។បច្ចុប្បន្នមុខសញ្ញាសង្ស័យទាំង៣នាក់ រួមទាំងវត្ថុតាងគឺថ្នាំញៀនជាង១សែនគ្រាប់
ត្រូវបានកំលាំងជំនាញថៃ រៀបចំបញ្ជូនខ្លួនទៅកាន់តុលាការ តាមនិតិវិធីច្បាប់ ៕
