ខេត្តស្វាយរៀង ៖ នាព្រឹកថ្ងៃទី២៥ ខែវិច្ឆិកា ឆ្នាំ២០១៦នេះ នៅសាលប្រជុំសាលាខេត្ត ឯកឧត្ដម សំ ប៊ុណ្ណារិន អភិបាលស្ដីទី នៃគណៈអភិបាលខេត្តស្វាយរៀង បានអញ្ជើញជាអធិបតី ក្នុងពិធីសំណេះសំណាលជាមួយមន្ត្រីក្របខ័ណ្ឌក្រសួងមហាផ្ទៃ ចំនួន ១៧រូប ស្រី ៣រូប ដែលទើបប្រឡងជាប់ ហើយនឹងត្រូវចូលទៅបម្រើការងារនៅតាមបណ្ដាស្រុកគោលដៅ នៃខេត្តស្វាយរៀង នាពេលខាងមុខ ។
ក្នុងឱកាសនោះ ឯកឧត្ដមអភិបាលខេត្តស្ដីទី បានសម្ដែងនូវការអបអរសាទរចំពោះមន្ត្រីក្របខ័ណ្ឌដែលទើបប្រឡងជាប់ទាំងអស់ និងបានពាំនាំប្រសាសន៍ផ្ដាំផ្ញើរបស់ឯកឧត្ដមអភិបាលខេត្ត ដល់ក្មួយៗដែលជាមន្ត្រីក្របខ័ណ្ឌថ្មី ត្រូវខិតខំបំពេញការងារទៅតាមតួនាទី ភារកិច្ច និងការចាត់តាំងរបស់ប្រធានអង្គភាព ឲ្យបានល្អប្រសើរទៅតាមសមត្ថភាព និងលទ្ធភាពរបស់ខ្លួន ប្រកាន់ខ្ជាប់នូវឥរិយាបថទាំង៤ របស់មន្ត្រីរាជការ គឺឆន្ទៈម្ចាស់ការ ភក្ដីភាព មនសិកាវិជ្ជាជីវៈ និងវប្បធម៌សេវាសាធារណៈ ធ្វើយ៉ាងណាចូលរួមចំណែកផ្ដល់សេវាសាធារណៈ ជាពិសេសសេវាតម្រូវការ ជូនប្រជាពលរដ្ឋឲ្យបានត្រឹមត្រូវតាមច្បាប់ ឆាប់រហ័ស និងទាន់ពេលវេលា ដើម្បីជំរុញការអនុវត្តការកែទម្រង់រដ្ឋបាលសាធារណៈ សំដៅឲ្យរដ្ឋបាលសាធារណៈកាន់តែមានភាពឆ្លើយតបប្រកបដោយប្រសិទ្ធភាព ប្រសិទ្ធផល និងជំនឿទុកចិត្ត និងអភិវឌ្ឍន៍ស្ថាប័ន និងស្រុកដែលខ្លួនត្រូវទៅបម្រើការងារឲ្យមានការរីកចម្រើន និងការអភិវឌ្ឍ ព្រោះក្មួយៗទាំងអស់គឺជាធនធានមនុស្សដ៏សំខាន់ប្រកបដោយសក្ដានុពល ដែលបានឆ្លងកាត់នូវការប្រឡងប្រជែងដ៏តឹងតែង ក្នុងចំណោមបេក្ខជនរាប់ពាន់នាក់ ។
សូមបញ្ជាក់ថា មន្ត្រីក្របខ័ណ្ឌថ្មីដែលទើបប្រឡងជាប់ រួមមាន មន្ត្រីរដ្ឋបាលជាន់ខ្ពស់ក្រសួងមហាផ្ទៃ ៥រូប ក្រមការ ៤រូប និងលេខាធិការរដ្ឋបាល ៨រូប និងត្រូវទៅបម្រើការងារនៅស្រុកស្វាយជ្រំ ៤រូប (ជាន់ខ្ពស់ ១ ក្រមការ ១ លេខា ២) ស្រុករមាសហែក ៣រូប (ជាន់ខ្ពស់ ១ ក្រមការ ១ លេខា ១) ស្រុករំដួល ៤រូប (ជាន់ខ្ពស់ ១ ក្រមការ ១ លេខា ២) ស្រុកចន្ទ្រា ២រូប (ជាន់ខ្ពស់ ១ លេខា ១) ស្រុកកំពង់រោទិ៍ ៣រូប (ជាន់ខ្ពស់ ១ ក្រមការ ១ លេខា ១) និងស្រុកស្វាយទាប ១រូប (លេខា) ៕
