ខេត្តប៉ៃលិន៖ ព្រឹកថ្ងៃទី២៣ ខែវិច្ឆិកា ឆ្នាំ២០១៦ នៅវិទ្យាល័យហ៊ុន សែន ក្រុងទេពនិម្មិត ស្ថិតក្នុងភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន មានរៀបចំពិធីផ្សព្វផ្សាយច្បាប់ចរាចរណ៍ផ្លូវគោក ស្ថិតក្រោមអធិបតីភាព ឯកឧត្តម ស៊ុំ រុំ អនុរដ្ឋលេខាធិការក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច តំណាងដ៏ខ្ពង់ខ្ពស់លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច ,លោក អៀង វុធ អភិបាលស្តីទីខេត្តប៉ៃលិន ,លោក គុយ ណារ៉េត សមាជិកក្រុមប្រឹក្សាខេត្ត ព្រមទាំងការអញ្ជើញចូលរួមពីលោក ម៉ម សំណាង ប្រធានមន្ទីរទំនាក់ទំនងរដ្ឋសភា ព្រឹទ្ធសភា និងអធិការកិច្ច ខេត្ត ,លោកប្រធាន អនុប្រធានមន្ទីរ លោកស្នងការនគរបាលខេត្ត កងរាជអាវុធហត្ថខេត្ត និង តំណាងមន្ទីរសាធារណៈការ និងដឹកជញ្ជួន សិស្សានុសិស្ស , ប្រជាពលរដ្ឋ សរុបចំនួន៣៩៨នាក់ ស្រី១៨៣នាក់ផងដែរ ។
លោក ម៉ម សំណាង ប្រធានមន្ទីរទំនាក់ទំនងរដ្ឋសភា និងព្រឹទ្ធសភា និងអធិការកិច្ចខេត្តប៉ៃលិនបានឲ្យដឹងថា៖ ខេត្តប៉ៃលិនស្ថិតនៅភាគពាយព្យនៃព្រះរាជាណាចក្រកម្ពុជា, មានចម្ងាយ៣៧១ គីឡូម៉ែត្រពីរាជធានីភ្នំពាញ។ ខេត្តប៉ៃលិនមានផ្ទៃដីចំនួន១.០៦២,៥២ គីឡូម៉ែត្រការ៉េ , មានក្រុងមួយ និងស្រុកមួយ, មាន៨ឃុំសង្កាត់ , មាន៩០ភូមិ និងមានប្រជាពលរដ្ឋសរុបចំនួន១៥.៥៦៦គ្រួសារ និងមានមនុស្សរាយ ៦៦.៩៧៦នាក់ ។
ក្នុងការបើកកម្មវិធីផ្សព្វផ្សាយឯកឧត្តម ស៊ុំ រុំ អនុរដ្ឋលេខាធិការក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច បានមានប្រសាសន៍ថា៖ ការផ្សព្វផ្សាយច្បាប់ចរាចរណ៍ផ្លូវគោកនាពេលនេះគឺក្នុងគោលបំណងដាស់ស្មារតីអោយសិស្សានុសិស្ស ប្រជាពលរដ្ឋ មន្ត្រីរាជការ ទាំងអស់ដែលប្រើប្រាស់ផ្លូវថ្នល់សាធារណៈ អោយផ្លាស់ប្តូឥរិយាបទដែលធ្លាប់មានភាពអនាធិបតេយ្យ មកប្រកាន់ឥរិយាបទដែលមានសណ្តាប់ធ្នាប់ របៀបរៀបរយ ,គោរពច្បាប់ចរាចរណ៍ពេលធ្វើដំណើរ បើកបរយានយន្តគ្រប់ប្រភេទ។
ឯកឧត្តម ក៏បានសំណូមពរដល់អាជ្ញាធរមានសមត្ថកិច្ចគ្រប់លំដាប់ថ្នាក់ ត្រូវខិតខំពង្រឹង រឹតបណ្តឹងការអនុវត្តច្បាប់ចរាចរណ៍បន្ថែមទៀត ដើម្បីអោយក្លាយទៅជាមធ្យោបាយដ៏មានប្រសិទ្ធភាព សម្រាប់ជម្រុញការកាត់បន្ថយគ្រោះថ្នាក់ចរាចរណ៍អោយនៅមានកម្រិតទាបបំផុតចូលរួមអភិវឌ្ឍន៍សង្គម សំដៅកាត់បន្ថយភាពក្រីក្ររបស់ប្រជាពលរដ្ឋ ស្របតាមគោលនយោបាយរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោហ៊ុន សែន ជានាយករដ្ឋមន្ត្រី ។
បន្ទាប់ពីការឆ្លើយសំណួរមួយចំនួនពីសិស្សានុសិស្ស , ប្រជាពលរដ្ឋ ដែលចោទសួរមកគណៈអធិបតីរួចមក លោក អៀង វុធ អភិបាលស្តីទីខេត្តប៉ៃលិនបានមានប្រសាសន៍បិទកម្មវិធីថា៖ ច្បាប់ ចរាចរណ៍ផ្លូវគោក ជាបញ្ហាចំបង ដែលរាជរដ្ឋាភិបាល កំពុងមានការយកចិត្តទុកដាក់ និងព្រួយបារម្ភយ៉ាងខ្លាំង ដោយសារវាបានធ្វើអោយមានរបួសស្នាម និង បាត់បង់អាយុជីវិតប្រជាពលរដ្ឋ សត្វ បរិស្ថាន និងខូចខាតត្រព្យសម្បត្តជាច្រើនរយលានដុល្លាក្នុងមួយឆ្នាំៗ និងបានបន្សល់ទុកនូវស្រី្តមេម៉ាយ កូនកំព្រា ជនពិការជាច្រើនក្នុងសង្គមជាតិរបស់យើង ។
លោក ក៏បានអំពាវនាវអោយប្រជាពលរដ្ឋទាំងអស់ ជាពិសេសអ្នកបើកយាន្តជំនិះគ្រប់ប្រភេទ ត្រូវស្វែងយល់ និងអនុវត្តអោយបានខ្ជាប់ខ្ជួននូវវិធានការមួយចំនួនដែលបានចែងក្នុងច្បាប់ស្តីពីចរាចរណ៍ផ្លូវគោកមានដូចជា៖ ត្រូវមានស្លាកសម្គាល់យានយន្ត, ត្រូវមានប័ណ្ណបើកបរ, អ្នកបើកត្រូវមានស្មារតីប្រុងប្រយ័ត្ន, ត្រូវពាក់មួក និងខ្សែក្រវ៉ាត់ការពារសុវត្ថភាពជាដាច់ខាត , មិនត្រូវបើកបរហួសល្បឿន និងផ្ទុកមនុស្ស ឬទំនិញលើសចំណុះ , និងបើកបរហាមពិសារគ្រឿងស្រវឹងជាដើម ។
សូមបញ្ជាក់ថា៖ការផ្សព្វផ្សាយនេះបានប្រព្រឹត្តទៅពេញមួយព្រឹកដោយមានវាគ្មិនជំនាញបង្ហាញពី ច្បាប់ចរាចរណ៍ផ្លូវគោកដែលមាន៖ សញ្ញាចរាចរណ៍ , អ្នកបើកបរយាន្តជំនិះ , ការប្រើភ្លើង និងសូរស័ព្ទយាន្តជំនិះ , ថ្មើជើង អ្នកជិៈ ឬសត្វ , ករណីមានគ្រោះថ្នាក់ចរាចរណ៍ ,ការគ្រប់គ្រងយាន្តជំនិះ និងការដឹកជញ្ជូន , សមត្ថកិច្ច និងសិទ្ធអំណាចរបស់នគរបាលចរាចរណ៍ , និង ទោសបញ្ញាត្តិ ព្រមទាំងមានការបកស្រាយនូវសំនួររបស់អ្នកចូលរួមផងដែរ ៕
